40
Ix yalanxi Jehová dꞌa vin̈aj Job chiꞌ icha tic:2 Ach Job, ix a nibꞌej a telaj a bꞌa vedꞌoc a in to Syal Vuj Smasanil, ¿ayto am tas tza nibꞌej tzal dꞌayin? Tacꞌvan̈ dꞌayin, xchi Jehová chiꞌ.
3 Ix tacꞌvi vin̈aj Job chiꞌ dꞌa Dios icha tic:
4 ¿Tas ol vutej in tacꞌvi a in malaj jabꞌoc velcꞌoch tic? Vachꞌ ama to malaj tas svalaꞌ.
5 Chael oxelxo ix in loloni, man̈xalaj tas vachꞌ valani, xchi vin̈.
6 Ix lolonpaxelta Jehová chiꞌ dꞌa vin̈ dꞌa scal jun chacxuxum icꞌ chiꞌ, ix yalan icha tic:
7 Tecꞌbꞌej a bꞌa dꞌa vichan̈, ol a pacan dꞌayin tastac juntzan̈ ol in cꞌanbꞌej tic dꞌayach:
8 ¿Tzam a tecꞌbꞌej a bꞌa alani to man̈ tojoloc svutej in bꞌa, yujto malaj a mul alani?
9 ¿Tocval ecꞌbꞌal ip dꞌa vichan̈? ¿Tzam n̈ilili scꞌan̈ yol a jaj icha scꞌan̈ vic tic?
10 Chꞌoxnec vil an tato nivan elcꞌochi, checlajocabꞌ a bꞌinajnaquil yedꞌ a poder.
11 Scham val ilan ebꞌ syicꞌchaan̈ sbꞌa, acꞌ oval yedꞌ ebꞌ, emnaquil tzutejcan ebꞌ tato syal uuj.
12 A ebꞌ syicꞌ val chaan̈ sbꞌa te chuc sbꞌeybꞌal chiꞌ, yaln̈ej bꞌajtil ay ebꞌ, tecꞌcanem ebꞌ dꞌa sat luum vilaꞌ.
13 Tza mucancan ebꞌ dꞌa yol luum. Tza macancanem ebꞌ bꞌaj ayecꞌ ebꞌ chamnac.
14 Icha chiꞌ ol aj vilani to yel ay a jelanil, syal a colan a bꞌa yedꞌ val ip.
15 Ilnabꞌ nocꞌ nivac Behemot, a in ix in bꞌo nocꞌ icha ix vutej ach in bꞌoani. A an̈ an̈ scꞌux nocꞌ icha nocꞌ vacax.*
16 Ina te ay yip snan̈al nocꞌ yedꞌ yip sbꞌacꞌchil xubꞌ nocꞌ.
17 A sn̈e nocꞌ lajan stzatzil icha teꞌ cꞌuteꞌ, axo schꞌan̈al xubꞌ nocꞌ pixquiltac yaji.
18 A sbꞌaquil nocꞌ lajan icha qꞌuen tubo nabꞌa bronce, axo yoc nocꞌ icha qꞌuen hierro.
19 An̈ej juntzan̈ nocꞌ chiꞌ satubꞌtac yilji ix in bꞌo dꞌa scal masanil nocꞌ nocꞌ. A inn̈ej syal in satanel nocꞌ, yujto a in ix in bꞌo nocꞌ.
20 A dꞌa jolomtac vitz bꞌaj stajni nocꞌ cꞌultaquil nocꞌ, ataꞌ say an̈ an̈cꞌultac nocꞌ scꞌuxuꞌ.
21 Axo dꞌa yen̈ultac te teꞌ tzꞌem cutzan nocꞌ, mato dꞌa scaltac teꞌ aj bꞌaj cꞌubꞌeltac, bꞌaj sitzꞌatac.
22 A te teꞌ ay yen̈ul chiꞌ, a dꞌa yen̈ul teꞌ sicꞌbꞌan nocꞌ. A dꞌa scaltac teꞌ bꞌacmam oyanoch dꞌa stitac a aꞌ, ataꞌ ay nocꞌ.
23 Vachꞌchom ste nivanbꞌi a aꞌ chiꞌ, max xivlaj nocꞌ. Vachꞌchom sqꞌuecꞌoch aꞌ Jordán dꞌa yol sn̈iꞌ nocꞌ, malaj tas sna nocꞌ.
24 ¿Mach val junoc syal yicꞌanqꞌueta yol sat nocꞌ, ma syal yacꞌanecꞌ junoc lasu dꞌa yol sn̈iꞌ nocꞌ?