39
¿Tom ojtac bꞌaqꞌuin̈ tzꞌaj yuneꞌ nocꞌ cꞌultaquil chiva? ¿Tom tzilaꞌ chajtil tzꞌaj yalji yuneꞌ nocꞌ cꞌultaquil chej?2 ¿Tom ojtac jayeꞌ ujal scuchoch yuneꞌ nocꞌ, bꞌaqꞌuin̈ pax tzꞌaj yuneꞌ nocꞌ chiꞌ?
3 Ayic tzꞌaj yuneꞌ nocꞌ chiꞌ, tzꞌem votzꞌan nocꞌ yic tzꞌel yuneꞌ nocꞌ chiꞌ yic tzꞌecꞌ syail.
4 Ayic toxo ix och yip nocꞌ yunetac chiꞌ, sqꞌuibꞌ nocꞌ dꞌa caltac teꞌ, maxtzac meltzajlaj nocꞌ dꞌa snun chiꞌ.
5 ¿Mach acꞌjinaccan nocꞌ caltacteꞌal bꞌuru? ¿Mach aljinaccani, yuj chiꞌ libre yajcan nocꞌ?
6 A in valnac bꞌajtactil scajnajcanecꞌ nocꞌ, aton dꞌa taquin̈ luum yedꞌ dꞌa pan̈quiltac bꞌaj malaj tas sqꞌuibꞌi.
7 Max yal-laj scꞌol nocꞌ tzꞌaj bꞌaj ay av yuj anima, malaj mach syal yacꞌan munlaj nocꞌ.
8 Tzꞌecꞌ nocꞌ say va sbꞌa dꞌa tzalquixtac, sayan an̈ an̈cꞌultac nocꞌ scꞌuxuꞌ.
9 ¿Tom tza naꞌ to a nocꞌ caltacteꞌal vacax syal acꞌan munlajoc, mato tzꞌochcan nocꞌ junoc acꞌval dꞌa yol a macteꞌ?
10 ¿Tom syal a tzecꞌanoch teꞌ yugo dꞌa nocꞌ, yic tzacꞌan pural nocꞌ smunlaj dꞌa arado edꞌoc, ma tzꞌoch tzacꞌan nocꞌ dꞌa a patic yic tzach dꞌocvi lum yedꞌ nocꞌ?
11 ¿Tom yujto te ay yip nocꞌ syal acꞌanoch nocꞌ yipoc a cꞌool dꞌa a munlajel?
12 ¿Tom tza naꞌ to syal a cꞌanan nocꞌ yic tza molan sat tas tzavej bꞌaj smolbꞌaji?
13 Ilnabꞌ nocꞌ avestruz, slavlavan scꞌaxil nocꞌ dꞌa tzalajcꞌolal, palta max yal-laj sbꞌat jen̈en̈oc nocꞌ icha nocꞌ garza.
14 A dꞌa scal qꞌuen arena syaqꞌuem sn̈olobꞌ nocꞌ yic sqꞌuixnaj yuj sqꞌuixinal qꞌueen.
15 Max snalaj nocꞌ tato ay mach ol tecꞌan pojoc, ma junocxo nocꞌ sqꞌue tecꞌtecꞌ dꞌa yibꞌan̈.
16 Te chuc nocꞌ dꞌa yuneꞌ, ichato man̈ yuneoc nocꞌ. Malaj sna nocꞌ, vachꞌchom max qꞌueta nocꞌ yuneꞌ chiꞌ.
17 Yujto a in maj vacꞌ spensar nocꞌ, yuj chiꞌ icha chiꞌ syutej sbꞌa nocꞌ.
18 Ayic sqꞌue vaan nocꞌ sbꞌat lemnaj nocꞌ, max xivlaj nocꞌ syamchaj yuj nocꞌ chej ayqꞌue anima dꞌa yibꞌan̈, yujto max tzacꞌvan sbꞌey nocꞌ chej chiꞌ dꞌa nocꞌ.
19 ¿Tom a ach acꞌnac yip nocꞌ chej chiꞌ? ¿Tom a ach acꞌnac xil yibꞌ sjaj nocꞌ yic vachꞌ yilji nocꞌ yuuj?
20 ¿Tom a ach tzacꞌqꞌue chennaj nocꞌ icha nocꞌ chil? Ste xiv ebꞌ soldado yuj nocꞌ ayic sjornaj sn̈iꞌ nocꞌ.
21 Smacꞌan lum luum nocꞌ dꞌa acꞌlictac yujto stecꞌton yip nocꞌ, max xivlaj nocꞌ sbꞌat dꞌa oval.
22 Man̈ yojtacoclaj nocꞌ tato ay tas ay smay, max xivlaj nocꞌ, max ochlaj tecꞌnaj nocꞌ yuj qꞌuen espada.
23 Vachꞌchom toxon̈ej stzin̈iljubꞌ qꞌuen qꞌueen ayoch dꞌa vin̈ ayqꞌue dꞌa yibꞌan̈ nocꞌ, scopoljubꞌ qꞌuen espada yedꞌ qꞌuen slanza vin̈,
24 palta yedꞌ val yip nocꞌ sbꞌat n̈icnajoc. Ayic tzꞌocꞌ qꞌuen trompeta yic oval, maxtzac yal syamchajoch vaan nocꞌ.
25 Ayic tzꞌocꞌ qꞌuen trompeta chiꞌ tzꞌocꞌ pax nocꞌ. Najatto ay nocꞌ, syabꞌan nocꞌ to ay oval, syabꞌan nocꞌ yoch sjaj ebꞌ yajal.
26 ¿Tom te jelan ach, tom syal a cꞌaybꞌan nocꞌ chꞌacbꞌa yic sbꞌat jen̈en̈oc nocꞌ dꞌa stojolal sur?
27 ¿Tom a ach tzal dꞌa nocꞌ dꞌiv to sbꞌo soꞌ nocꞌ bꞌaj te chaan̈?
28 A dꞌa sattac qꞌuen tenam ayecꞌ nocꞌ tzꞌecꞌ cꞌu tzꞌecꞌ acꞌval. A dꞌa sjolomtac qꞌueen sqꞌue tecꞌtecꞌ nocꞌ.
29 A dꞌa chaan̈ chiꞌ smaclej yil nocꞌ bꞌajtil sbꞌat nocꞌ syam schibꞌej.
30 A nocꞌ yuneꞌ nocꞌ an̈ej chicꞌ icꞌan pitzan nocꞌ. A bꞌaj ay snivanil chamnac, ataꞌ ayn̈ejecꞌ nocꞌ, xchi Jehová.