Spac slolonel vin̈aj Job ix yacꞌ Dios
38
Ix lajvi chi, ix lolonelta Jehová dꞌa vin̈aj Job dꞌa scal jun chacxuxum icꞌ, ix yalan icha tic:2 ¿Tas aji, yuj chiꞌ yedꞌ a lolonel malaj yelcꞌoch tzalaꞌ? Scheclaji to max a chalaj tato tzꞌacan in jelanil.
3 Tecꞌbꞌej a bꞌa a pacan juntzan̈ tas ol in cꞌanbꞌej tic:
4 ¿Bꞌajtil ayach eqꞌui ayic ix vacꞌanem yich lum luum tic? Al dꞌayin tato yel te ay tas ojtac.
5 ¿Ojtac ama mach ix naani jantac ix aj yem yechel yich lum chiꞌ? ¿Mach ix naani jantac tzꞌaj luum?
6 ¿Ojtac ama bꞌajtil bꞌachancan yich lum chiꞌ? ¿Mach ix bꞌabꞌlaj acꞌanem qꞌuen qꞌueen ayem yichoc luum?
7 Ayic vanxo sqꞌuin̈ibꞌi dꞌa jun cꞌu chiꞌ, ix bꞌitan qꞌuen cꞌanal. Masanil ebꞌ ángel, ix el yav ebꞌ yuj tzalajcꞌolal.
8 Ayic ix elul chulnaj aꞌ mar dꞌa sat lum tic, ¿mach ix macan sat aꞌ yic scann̈ej aꞌ bꞌaj aycani?
9 A in ix vacꞌcan asun scꞌuoc aꞌ, an̈ejaꞌ asun chiꞌ ix vacꞌcanoch sbꞌaloc aꞌ.
10 A in ix vacꞌcan bꞌaj sjavi cꞌaman aꞌ mar chiꞌ, ichato ix vacꞌcanoch sllaveal stiꞌ aꞌ.
11 Ix valan dꞌa aꞌ icha tic: An̈ej dꞌa tic tzach javican cꞌaman, maxtzac yal ecꞌ dꞌa tic, an̈ej dꞌa tic ol ach ja pon̈najoc, xin chi dꞌa aꞌ.
12 ¿Ayxom bꞌaj ix alaꞌ to scot saquil yichchaan̈ yic sacbꞌi dꞌa junoc cꞌu?
13 ¿Ix am a puc saquilqꞌuinal dꞌa smasanil sat lum luum yuj a lolonel chiꞌ, yic bꞌat scꞌubꞌejel sbꞌa ebꞌ chuc?
14 Scheclaj val schꞌolquiltaquil sat lum luum ayic tzꞌoch yoc cꞌu dꞌa luum dꞌa qꞌuin̈ibꞌalil, icha scheclaj schucquiltaquil junoc cꞌapac, ma icha tzꞌaj scheclajcanem otzꞌan junoc sello dꞌa lum bꞌaqꞌuech luum.
15 A saquilqꞌuinal chiꞌ syaman vanaj ebꞌ chuc, yuj chiꞌ maxtzac yal-laj scꞌulan chucal ebꞌ.
16 ¿Ayxom bꞌaj ix ach xidꞌecꞌ il juntzan̈ xabꞌ olan cꞌubꞌeltac bꞌaj sqꞌueul aꞌ mar?
17 ¿Toxom ix ilaꞌ bꞌajtil ay spuertail chamubꞌ?
18 ¿Ojtac ama jantac yechel sat lum luum tic? Al dꞌayin, tato yel ojtac smasanil.
19 ¿Ojtac ama bꞌajtil scot saquilqꞌuinal yedꞌ qꞌuicꞌalqꞌuinal?
20 ¿Tzam yal alan dꞌa saquilqꞌuinal bꞌaj scꞌochcani? ¿Tzam yal icꞌanxi meltzaj bꞌaj cajan?
21 Tecan ojtac val sicꞌlabꞌil, ina ayachxo ayic ix in bꞌoan masanil tas, te ayxo a qꞌuinal.
22 ¿Ayxom bꞌaj ix ach xidꞌecꞌ bꞌaj molan qꞌuen cheev yedꞌ qꞌuen sacbꞌat vuuj?
23 A juntzan̈ chiꞌ, sicꞌan vuuj, yic svacꞌlabꞌan dꞌa junoc yaelal, ma dꞌa junoc oval.
24 ¿Ojtac ama bꞌajtil sjavi cꞌu? ¿Ojtac ama bꞌaj scot icꞌ dꞌa stojolal bꞌaj sjavi cꞌu chiꞌ?
25 ¿Mach sjacan bꞌaj scot secnaj yaxn̈abꞌ, schꞌoxan bꞌaj sbꞌat oval icꞌ n̈abꞌ,
26 ayic syacꞌan n̈abꞌ dꞌa lum tzꞌinan luum, bꞌaj malaj anima cajan,
27 yic schꞌayxi lum luum malaj tas sqꞌuibꞌ dꞌay, slajvi chiꞌ sqꞌuibꞌ an̈ an̈cꞌultac?
28 ¿Mach mamabꞌil yaj dꞌa yaxn̈abꞌ yedꞌ dꞌa yal acꞌval?
29 ¿Mach nunabꞌil yaj dꞌa qꞌuen cheev?
30 ¿Mach tzꞌacꞌan tzatzbꞌoc a aꞌ icha qꞌuen qꞌueen, stzatzbꞌiel sat aꞌ mar yuj siic?
31 ¿Tzam yal a molbꞌan qꞌuen cꞌanal scuchan Mootz, ma tza saclembꞌat qꞌuen cꞌanal scuchan Orión?
32 ¿Tom a ach tzacꞌ qꞌueul qꞌuen nitcꞌanal ayic van sqꞌuin̈ibꞌi? ¿Tom a ach tziqꞌuelta juntzan̈ qꞌuen cꞌanal scuch nivan Osa yedꞌ qꞌuen yuneꞌ Osa?
33 ¿Tom ojtac juntzan̈ sleyal tastac tzꞌaj sbꞌeyecꞌ tastac ay dꞌa satchaan̈? ¿Tom a ach tzacꞌ elcꞌoch juntzan̈ ley chiꞌ dꞌa sat lum tic?
34 ¿Tom syal alan dꞌa asun to syacꞌcot sn̈abꞌil?
35 Tato tza checbꞌat lebꞌlon yic sbꞌat dꞌa junoc lugar, ¿tzam tacꞌvi dꞌayach icha tic: Ina in tic, chec in, xchama?
36 ¿Tom a ach ix acꞌ sjelanil nocꞌ much yedꞌ nocꞌ ajtzoꞌ yic syojtacanel nocꞌ to ol yacꞌ n̈abꞌ?
37 ¿Ay am mach te jelan yojtac jantac asun ay dꞌa smasanil? ¿Tom syal a secanel a aꞌ ayoch dꞌa scal asun chiꞌ yic syacꞌan n̈abꞌ,
38 yic a lum pococ tzꞌoch lum socꞌomal, telquiltac tzꞌaj luum?
39 ¿Tom a ach tza say schibꞌej nocꞌ nun choj yic syicꞌanbꞌat nocꞌ dꞌa nocꞌ yunetac yic sbꞌudꞌji nocꞌ yunetac chiꞌ,
40 ayic syil-lan sbꞌa nocꞌ bꞌaj ay, mato yic tzꞌem lachan nocꞌ dꞌa caltac an̈cꞌultac?
41 ¿Mach tzꞌacꞌan svael nocꞌ joj ayic tzꞌecꞌ nocꞌ say svael nocꞌ yuneꞌ, yujto tzꞌel yav nocꞌ scꞌanan svael dꞌayin?