37
A svilan nivac icꞌn̈abꞌ chiꞌ, ste ibꞌxiqꞌue in pixan yuj xivelal, ichato sqꞌueta svabꞌi.2 Abꞌec val scꞌan̈ cꞌu, aton sjaj Dios, a dꞌa yol stiꞌ tzꞌelta jun scꞌan̈ chiꞌ.
3 A tzꞌacꞌanecꞌ copnaj lebꞌlon dꞌa masanil satchaan̈, scheclajcꞌoch bꞌaj slajvicꞌoch lum luum tic.
4 Slajvi chiꞌ tzꞌabꞌchaj scꞌan̈ yoch sjaj Dios te nivan yelcꞌochi. Yacbꞌan van scꞌan̈ chiꞌ axo lebꞌlon chiꞌ maxtzac och vaan yecꞌ copoljoc.
5 A yuj scꞌan̈ yol sjaj chiꞌ, ay tas satubꞌtac scꞌulej, max nachajel cuuj.
6 A tzꞌacꞌanem qꞌuen sacbꞌacom dꞌa sat luum tic, syacꞌanpaxem n̈abꞌ te ay smay.
7 Yuj chiꞌ a Dios tzꞌacꞌanoch ebꞌ anima dꞌa yol spat, yic vachꞌ snachajel yuj ebꞌ to a tzꞌacꞌancot juntzan̈ chiꞌ.
8 Axo nocꞌ nocꞌ sbꞌat nocꞌ dꞌa yoltac sn̈aqꞌueen, ataꞌ bꞌat scꞌubꞌejcan sbꞌa nocꞌ.
9 Scot chacxuxum icꞌ dꞌa stojolal sur, axo dꞌa stojolal norte scot siic yuj icꞌ.
10 A yuj yicꞌ Dios spitzviqꞌue qꞌuen cheev, sbꞌat quechan qꞌuen dꞌa yibꞌan̈ aꞌ nivac aꞌ.
11 A tzꞌacꞌanoch aꞌ dꞌa scal asun, axo dꞌa scal aꞌ spitzvielta lebꞌlon.
12 A asun tzꞌecꞌn̈ej bꞌaj sgana Dios. Icha chiꞌ tzꞌaj scꞌanabꞌajan asun chiꞌ tas syal dꞌa smasanil sat luum tic.
13 A yedꞌ juntzan̈ tic schꞌoxan Dios, syacꞌan yaelal ma syacꞌan svachꞌcꞌolal dꞌa ebꞌ anima.
14 Mamin Job, abꞌ val tas svalaꞌ, scham val ilan tas satubꞌtac scꞌulej Dios.
15 ¿Tzam nachajel uuj tas syutej Dios scꞌulan masanil juntzan̈ tic, tas tzꞌaj yecꞌ copnaj lebꞌlon dꞌa scal asun chiꞌ?
16 ¿Ojtac ama tas tzꞌaj scan vaan asun dꞌa satchaan̈? Aton jun chiꞌ schꞌoxanel sjelanil Dios satubꞌtac.
17 A ach tic, pural stechaj cꞌacꞌ uuj dꞌa yol a pichul. Yuj icꞌ te cꞌacꞌ scot dꞌa sur numanxon̈ej tzꞌaj sat lum tic.
18 ¿Tzam yal a colvaj yedꞌ Dios yic syacꞌanbꞌat jen̈an satchaan̈ tic, icha junoc quechan̈ qꞌuen qꞌueen tzatz tzꞌajcani?
19 Al dꞌayon̈ ticnaic tas vachꞌ scal dꞌa Dios, yujto icha dꞌa scal qꞌuicꞌalqꞌuinal ayon̈ eqꞌui, man̈xa tas vachꞌ calani.
20 A in tic max in tecꞌbꞌej in bꞌa valani to tzin lolon yedꞌ Dios. Tato tzin cꞌulej icha chiꞌ, ichato in gana svicꞌcot in chamel.
21 Ina ayic tzꞌecꞌ icꞌ syicꞌanel asun, scꞌachvi dꞌa chaan̈, maxtzac yal co qꞌue qꞌuelan dꞌa yoc cꞌu.
22 A dꞌa stojolal norte toxon̈ej copopi tzꞌaj icha qꞌuen oro, toxon̈ej sat co cꞌol quilan stziquiquial Dios.
23 Maxtzac nachajel cuuj tas yaj Dios Syal Yuj Smasanil, yujto ecꞌbꞌal spoder yedꞌ stojolal. Te tojol yuj chiꞌ malaj bꞌaj syixtej junoc anima.
24 Yuj chiꞌ xiv ebꞌ anima dꞌay. Malaj jabꞌoc yelcꞌoch ebꞌ syaloch sbꞌa jelanil dꞌa yichan̈, xchi vin̈aj Eliú chiꞌ.