Schan̈il macan̈ slolonel vin̈aj Eliú
36
Ix yalanxi vin̈aj Eliú chiꞌ icha tic:2 A ticnaic acꞌ nivancꞌolal, yujto ol ach in cꞌaybꞌej, ayto tas ol val yuj svachꞌiloc Dios.
3 Ol vacꞌlabꞌej jantac in jelanil yic tzin chꞌoxaneli to a Dios chiꞌ bꞌojinac on̈, tojol ton paxi.
4 Ojtaquejeli to a tas sval tic dꞌayach man̈ esoc. A in tzin lolon edꞌ tic, tzꞌacan in jelanil.
5 A Dios te ay spoder, te ay pax sjelanil, palta malaj junoc mach spatiquejeli.
6 A ebꞌ chuc scꞌulej, scham ebꞌ yuj Dios chiꞌ, axo ebꞌ tzꞌixtaji, sbꞌoji yaj ebꞌ yuuj.
7 A stan̈van ebꞌ anima vachꞌ sbꞌeybꞌal. A tzꞌacꞌanoch ebꞌ yajalil yic sbꞌinaj ebꞌ dꞌa masanil tiempo.
8 Axo ebꞌ scꞌulan chucal, tato stzecꞌchaj ebꞌ dꞌa qꞌuen cadena, syabꞌ val syail ebꞌ.
9 A Dios schꞌoxani bꞌajtac tzꞌoch smul ebꞌ chiꞌ yujto tzꞌecꞌ ebꞌ dꞌa yibꞌan̈.
10 Sloloni yic scachan ebꞌ, syalani to syactejcan schucal ebꞌ chiꞌ.
11 Tato scha yabꞌ ebꞌ, syacꞌanoch sbꞌa ebꞌ dꞌa yol scꞌabꞌ, tzalajcꞌolal tzꞌecꞌ ebꞌ, ato syal jantac sqꞌuinal ebꞌ syacꞌaꞌ.
12 Palta tato max scha yabꞌ ebꞌ jun, xicjicham ebꞌ, sbꞌatcan ebꞌ dꞌa scal ebꞌ chamnac yujto maj yacꞌoch ebꞌ dꞌa scꞌool tas syal Dios.
13 A ebꞌ malaj yelcꞌoch Dios dꞌay, ayn̈ejcot yoval ebꞌ. Vachꞌchom tzꞌacꞌjioch syaelal ebꞌ yuuj, palta max yal-laj sbꞌa ebꞌ dꞌay yic scꞌanan scolval ebꞌ dꞌa yibꞌan̈.
14 Spet cham ebꞌ, qꞌuixvelal tzꞌaj satel ebꞌ.
15 A dꞌa scal syaelal junoc mach, a Dios tzꞌacꞌan nachajel smul, yic scolchaj dꞌa scal syaelal chiꞌ.
16 Mamin Job, icha chiꞌ sgana Dios tzach yutej. Tzach yicꞌanelta dꞌa scal a yaelal, tzach yicꞌanbꞌat dꞌa jun lugar te vachꞌ bꞌaj man̈xa tas syacꞌ palta dꞌayach, yic tzacꞌ tzalajbꞌoc a cꞌool dꞌa vael jantac svachꞌil.
17 Palta axo ticnaic, a Dios tzach chꞌolbꞌitani, a yaelal smoj schaan ebꞌ chuc, a chiꞌ van a chaani.
18 Yuj chiꞌ yaꞌilej a bꞌa yic vachꞌ man̈ elan̈chameloc tzach satel yuj yoval scꞌol Dios. Man̈ ol yal a colchaj dꞌa yoval scꞌol chiꞌ yuj jantacoc tumin.
19 Malaj yelcꞌoch a bꞌeyumal dꞌa sat. Malaj pax yelcꞌoch jantac ipalil dꞌay.
20 Mocabꞌ a nibꞌejcot sqꞌuicꞌalqꞌuinalil chamel dꞌa ibꞌan̈, aton stiempoal satjiel nivac chon̈abꞌ dꞌa elan̈chamel.
21 Yaꞌilej a bꞌa yic max a nibꞌejbꞌat a bꞌa dꞌa chucal, yujto a yaelal tic ix javi dꞌa ibꞌan̈ yic max ach bꞌat dꞌa chucal chiꞌ.
22 Scham val ilan jantac spoder Dios. Malaj junoc cꞌaybꞌum syal slajbꞌan sbꞌa yedꞌoc.
23 Malaj junoc mach syal yalan tas scꞌulej, malaj mach syal yalanoch dꞌa sat to chuc ix scꞌulej.
24 Masanil anima tzꞌalan vachꞌ lolonel yuj tas vachꞌ ix sbꞌo Dios chiꞌ. Yaꞌilej pax a bꞌa yic max bꞌat satcꞌolal alan vachꞌ lolonel dꞌay.
25 Masanil anima tzꞌilan tastac bꞌobꞌil yuuj, vachꞌchom najatn̈ej syilbꞌat ebꞌ.
26 Maxtzac nachajel cuuj jantac snivanil yelcꞌochi, max yal co bꞌisan jantac yabꞌilal.
27 A tzꞌicꞌanqꞌue jantac a aꞌ dꞌa chaan̈, smeltzajoch aꞌ n̈abꞌil.
28 Smolan sbꞌa aꞌ dꞌa scal asun, slajvi chiꞌ yax n̈abꞌ tzꞌaj yem aꞌ dꞌa quibꞌan̈.
29 Malaj mach snachajel yuuj tas tzꞌaj spucaxbꞌat asun chiꞌ yuuj, ma tas yuj scꞌan̈ cꞌu dꞌa satchaan̈ bꞌaj ay scajnubꞌ.
30 A tzꞌacꞌanecꞌ copoljoc lebꞌlon dꞌa spatictac bꞌaj ayeqꞌui, palta a yich aꞌ mar, an̈ejaꞌ qꞌuicꞌqꞌuinal yilji.
31 Icha tic tzꞌaj schꞌolbꞌitan juntzan̈ chon̈abꞌ, syacꞌan jantac vael dꞌa ebꞌ anima.
32 A yamjinac lebꞌlon, syumanbꞌat bꞌaj syal scꞌool, dꞌin̈ann̈ej scꞌoch bꞌaj scꞌoch chiꞌ.
33 Ayic scꞌan̈ cꞌu chiꞌ a schꞌoxani to van scot nivac icꞌn̈abꞌ, inatax nocꞌ molbꞌetzal nocꞌ, yojtac nocꞌ to vanxo scot icꞌn̈abꞌ chiꞌ.