Yoxil macan̈ slolonel vin̈aj Eliú
35
Ix yalanxi vin̈aj Eliú chiꞌ icha tic:2 Mamin Job, ¿tom tza naꞌ to vachꞌ tas ix alaꞌ? A Dios ol alanoc to malaj in mul, xa chi.
3 Vachꞌchom tzal val icha tic dꞌa Dios: ¿Tas alan icoꞌ vachꞌchom tzꞌoch in mul? ¿Tas in ganar tato max och in mul chiꞌ? xa chi.
4 Ol in tacꞌvoc dꞌayach yedꞌ dꞌa ebꞌ vin̈ amigo tic:
5 Qꞌuean̈ qꞌuelan dꞌa satchaan̈, ol ilani to a asun te chaan̈ yajqꞌue dꞌa ibꞌan̈.
6 Vachꞌchom ste och a mul, malaj tas ol icꞌan Dios uuj.
7 Taxon̈ej te vachꞌ pax tas tza cꞌulej jun, malaj pax tas syiqꞌuelta dꞌa a patic, malaj jabꞌoc vachꞌilal syacꞌ dꞌay.
8 A ebꞌ quetanimail, aton ebꞌ tzꞌixtaj yuj a mul, a ebꞌ chiꞌ, vachꞌ pax tzꞌelcꞌoch ebꞌ yuj svachꞌil tas tza cꞌulej.
9 Ayic tzꞌixtaj val ebꞌ anima, tzꞌel val yav ebꞌ yic sayan mach scolan ebꞌ dꞌa yol scabꞌ ebꞌ tzꞌixtan chiꞌ,
10 palta max sayecꞌlaj Dios ebꞌ yic scolvaj yedꞌ ebꞌ, aton Dios bꞌojinac ebꞌ, jun tzꞌacꞌan co tzalajcꞌolal dꞌa scal yaelal.
11 Max saypaxecꞌlaj Dios chiꞌ ebꞌ, aton jun ecꞌal tzon̈ cꞌaybꞌan dꞌa yichan̈ nocꞌ nocꞌ, jun tzꞌacꞌan co jelanil dꞌa yichan̈ nocꞌ much.
12 Tzꞌel yav ebꞌ, palta max tacꞌvilaj Dios dꞌa ebꞌ, yujto te chuc ebꞌ, syicꞌ val chaan̈ sbꞌa ebꞌ.
13 Yujto a Dios Syal Yuj Smasanil, max scha yabꞌ comon lolonel syal ebꞌ.
14 Vachꞌchom tzalaꞌ to max ilochlaj Dios chiꞌ, palta a tas ayoch dꞌa ibꞌan̈ ayecꞌ dꞌa yichan̈, yuj chiꞌ tan̈vej tas ol aj sbꞌoan Dios chiꞌ dꞌayach.
15 Tzalaꞌ to max cot yoval, malaj yaelal syacꞌ dꞌa ebꞌ scꞌulan chucal.
16 Palta mamin Job, a juntzan̈ a lolonel tzal chiꞌ malaj jabꞌoc yelcꞌochi. Jantac tas tzalaꞌ, palta malaj a pensar ayic tzach loloni, xchi vin̈aj Eliú chiꞌ.