Schabꞌil macan̈ slolonel vin̈aj Eliú
34
Ix yalanxi vin̈aj Eliú chiꞌ icha tic:2 A ex jelan ex, ex e cꞌaybꞌejnac, abꞌec tas ol valaꞌ:
3 A yol co tiꞌ a tzꞌabꞌan svachꞌil tastac scabꞌlej. Icha pax chiꞌ co chiquin a tzꞌabꞌan tastac tzꞌalchaji.
4 Yuj chiꞌ sco bꞌeycꞌolej tas yaj juntzan̈ lolonel tic, yic snachajel cuuj tas yaji.
5 A vin̈aj Job ix alan icha tic: A in tic malaj in mul, palta a Dios max bꞌoanel-laj tas vaji.
6 Qꞌuinaloc tato svalaꞌ to ay in mul, van am vesan syal chiꞌ. Vachꞌchom malaj in mul chiꞌ, palta max yiqꞌuel-laj in yaelal tic, xchi vin̈.
7 Malaj junoc mach lajan yedꞌ vin̈aj Job tic, scomon bꞌuchvaj vin̈ dꞌa Dios icha co comon ucꞌan a aꞌ.
8 Scha val scꞌol vin̈ junn̈ej tzꞌaj yedꞌ ebꞌ chuc. Junn̈ej tzꞌecꞌ vin̈ yedꞌ ebꞌ anima chuc spensar.
9 Syalan vin̈ to malaj tas scacꞌ ganar ayic vachꞌ scutej co bꞌa dꞌa sat Dios.
10 Palta a ex ay e pensar tic, abꞌec tas ol valaꞌ. A Dios Syal Yuj Smasanil, malaj bꞌaj scꞌulej tas man̈ tojoloc.
11 A tzꞌacꞌan spac dꞌa junjun anima icha tastac scꞌulej. Junjun mach ol scha spac icha val dꞌa smojalil.
12 Val yel a Dios Syal Yuj Smasanil chiꞌ, malaj bꞌaj scꞌulej junoc chucal, ma junoc tas man̈ tojoloc.
13 Malaj junoc mach ix acꞌan yopisio yacꞌan yajalil dꞌa yolyibꞌan̈qꞌuinal tic.
14 Qꞌuinaloc syal scꞌol Dios syiqꞌuel quicꞌ yacꞌnacoch dꞌayon̈,
15 junlajann̈ej am tzꞌaj co cham co masanil, tzon̈ meltzajxicanoch pococal.
16 Mamin Job, tato ay a pensar, abꞌ tas ol valaꞌ. Tza maclej val abꞌ in lolonel tic.
17 Qꞌuinaloc tato man̈ tojoloc Dios ¿tom syal yacꞌan Yajalil? ¿Tom tza nibꞌej tzacꞌoch dꞌa yibꞌan̈ Dios, jun yelxo val ecꞌbꞌal te vachꞌ?
18 Tato chuc syutej sbꞌa ebꞌ rey yedꞌ ebꞌ yajal, max xivlaj Dios yalanoch dꞌa sat ebꞌ.
19 A Dios max yacꞌochlaj sbꞌa yedꞌ ebꞌ yajal, max yacꞌpaxochlaj sbꞌa yedꞌ ebꞌ bꞌeyum dꞌa yichan̈ ebꞌ mebꞌaꞌ. Lajann̈ej quelcꞌoch dꞌa sat, yujto a bꞌojinac on̈ co masanil.
20 Tato syal scꞌol Dios, elan̈chamel tzon̈ cham dꞌa junoc acꞌval. A ebꞌ te jelan yalani, munil ol cham ebꞌ, man̈ yovaliloc anima ol milan ebꞌ.
21 A Dios tzꞌilan tastac sco bꞌeybꞌalej, yojtacpaxi tastac tzꞌaj co bꞌeyeqꞌui.
22 Vachꞌchom te qꞌuicꞌqꞌuinal, palta max yal-laj scꞌubꞌanel sbꞌa ebꞌ scꞌulan chucal.
23 A Dios man̈ yovaliloc syavtej junoc anima dꞌa yichan̈ yic schꞌolbꞌitani.
24 Man̈ yovaliloc scꞌanbꞌejecꞌ yabꞌi tas yuj satel ebꞌ nivac yajal, chꞌocxo mach tzꞌochcan dꞌa yopisio ebꞌ chiꞌ.
25 A Dios yojtac tastac scꞌulej ebꞌ. Syaln̈ej scꞌoch dꞌacꞌvalil satancanel ebꞌ.
26 A val dꞌa quichan̈ tzꞌacꞌjioch syaelal ebꞌ, icha tzꞌutaj ebꞌ chuc,
27 yujto malaj sgana ebꞌ scꞌanabꞌajan tas syalaꞌ, malaj sgana ebꞌ sbꞌeybꞌalan schecnabꞌil.
28 Yuj schucal ebꞌ yajal chiꞌ, tzꞌel yav ebꞌ mebꞌaꞌ yedꞌ ebꞌ tzꞌixtaji. A Dios tzꞌabꞌan yel yav ebꞌ chiꞌ.
29 Qꞌuinaloc malaj tas syal Dios, malaj mach syal yacꞌanoch dꞌa yibꞌan̈. Qꞌuinaloc sbꞌat mican Dios dꞌa ebꞌ van yixtaji, malaj mach syal scolan ebꞌ. Vachꞌchom junoc nivan chon̈abꞌ, ma junoc anima, max yal scolan sbꞌa.
30 An̈ej Dios syal scolvaji yic max yacꞌ yajalil ebꞌ chuc spensar dꞌa juntzan̈ chon̈abꞌ chiꞌ, yic max ixtaj ebꞌ anima yuj ebꞌ.
31 Mamin Job, tocval ix al dꞌa Dios: Ix och in mul, palta man̈xo ol in cꞌulejlaj.
32 Chꞌox val in mul to maxtzac in nacoti. Tato ay bꞌaj chuc ix laj vutej in bꞌa, axo ticnaic, man̈xo ol in cꞌulejlaj, man̈ xa chioc.
33 Tato max a cha abꞌ tas syal Dios, ¿tom a a naani to ol spac Dios dꞌayach icha val tas tza nibꞌej? Yuj chiꞌ a ach tza naꞌ tas tzutej a bꞌa, man̈oc in ol val dꞌayach. Al val dꞌayon̈ tas tza naꞌ chiꞌ.
34 A ebꞌ anima jelan tzꞌabꞌan tas sval tic, ol yal ebꞌ icha tic:
35 Man̈ yojtacoc vin̈aj Job chiꞌ tas syalaꞌ, malaj yelcꞌoch slolonel vin̈ syal chiꞌ, xcham ebꞌ.
36 Chamocabꞌ val schꞌolbꞌitaj vin̈aj Job tic, yujto a tas syal vin̈, lajan icha tas syal ebꞌ malaj svachꞌil sbꞌeybꞌal.
37 A vin̈aj Job tic, man̈ ton̈ejoc ay smul vin̈, palta yelxo te pit vin̈. Val dꞌa quichan̈ sbꞌuchvaj vin̈ dꞌa Dios, stelan val sbꞌa vin̈ yedꞌoc, xchi vin̈aj Eliú chiꞌ.