33
Yuj chiꞌ mamin Job, abꞌ tas ol valaꞌ, cham tza maclej abꞌ in lolonel tic:2 Yujto a spac a lolonel chiꞌ ayxoecꞌ dꞌa yol in tiꞌ yic svalani.
3 A tas nabꞌil vuuj, ol val dꞌayach dꞌa stojolal yedꞌ dꞌa smasanil in cꞌool.
4 A Dios Syal Yuj Smasanil, aꞌ ix in bꞌoani, a tzꞌacꞌan in qꞌuinal, yuj chiꞌ pitzan in.
5 Tacꞌvan̈ dꞌayin tato syal a pacani, na tas ol utej a colan a bꞌa.
6 Lajanon̈n̈ej co chavan̈il dꞌa yichan̈ Dios chiꞌ, an̈ejaꞌ dꞌa lum luum tic bꞌobꞌil on̈.
7 Yuj chiꞌ max yal a xiv vuuj, max yal emnaquil ol ach vutej.
8 Icha tic ix vabꞌ alani:
9 Vachꞌchom malaj in mul, malaj jabꞌoc in paltail, malaj chucal tzin cꞌulej,
10 palta a Dios sayan tas tzꞌaj yacꞌanoch dꞌa vibꞌan̈, icha junoc yajcꞌol tzin yutej.
11 Ichato ix yacꞌoch qꞌuen cadena dꞌa voc, qꞌuelann̈ejoch dꞌayin bꞌajtac tzin eqꞌui, xa chi.
12 Palta a tas ix al tic man̈ vachꞌoclaj, yuj chiꞌ ol vacꞌ spac dꞌayach: A Dios yelxo te ecꞌto yelcꞌoch dꞌa quichan̈ a on̈ anima on̈ tic.
13 ¿Tas yuj tzaloch dꞌa sat to max spac tas tzal dꞌay?
14 A Dios chiꞌ tzijtum macan̈il syutej lolon sbꞌa, palta max nachajel-laj cuuj.
15 Ay bꞌaj slolon dꞌacꞌvalil, ma dꞌa vayichal, ma dꞌa ilvalil ayic te vaynac on̈.
16 A Dios slolon dꞌa co pensar, yic tzon̈ cachjioch vaan dꞌa tas sco cꞌulej, icha chiꞌ tzꞌaj on̈ xibꞌtanpaxi.
17 Icha chiꞌ tzon̈ yutej Dios, yic vachꞌ squiqꞌuel co bꞌa dꞌa scal chucal, yic man̈ comonoc squicꞌchaan̈ co bꞌa.
18 Icha chiꞌ syutej Dios on̈ scolanel dꞌa chamel yic vachꞌ max on̈ sateli.
19 Ay pax bꞌaj jun, a yedꞌ yaelal syacꞌ co cachnabꞌil Dios chiꞌ, scabꞌan val syail dꞌa co nivanil.
20 Masanil vael te vachꞌ tzꞌacꞌji co vaꞌa, ton̈ej sco yajeli.
21 Stzꞌonbꞌi co nivanil, scheclajelta co bꞌaquil dꞌa co nivanil chiꞌ.
22 Ichato scꞌoch co nivanil bꞌaj smucchaj ebꞌ chamnac, ayxoecꞌ dꞌa yol scꞌabꞌ chamel.
23 Palta qꞌuinaloc dꞌa scal jantac ebꞌ schecabꞌ Dios, sicꞌjielta junoc te nivan yelcꞌochi, scoti yic tzul colvaj quedꞌoc, syalani tas smoj sco cꞌulej,
24 scꞌanan cuuj dꞌa Dios to tzꞌocꞌ scꞌol dꞌayon̈. Scꞌananpax dꞌa Dios chiꞌ to max yiqꞌuel co qꞌuinal, yujto chequelxo mach stupan yuj co chucal chiꞌ.
25 Icha chiꞌ tzꞌaj sbꞌoxi co cꞌool, axo co nivanil tic tzꞌuninbꞌixi, icha yic scotnac quelemal.
26 Ayic tzon̈ tevi dꞌa Dios, syacꞌan svachꞌcꞌolal dꞌayon̈. Val dꞌa tzalajcꞌolal tzon̈ och ejmelal dꞌa yichan̈ Dios, scalan svachꞌcꞌolal dꞌa scal ebꞌ quetanimail.
27 Scalan junjun on̈ dꞌa yichan̈ ebꞌ anima icha tic: Ix och in mul, ix in cꞌulej tas man̈ tojoloc, palta a Dios maj yal scꞌol ix yacꞌoch in yaelal dꞌa smojal.
28 A ix yutej to ix in scol dꞌa yol scꞌabꞌ chamel, yuj chiꞌ tzato vil saquilqꞌuinal, xco chama.
29 Icha chiꞌ tzon̈ yutej Dios, man̈ jun chaelocn̈ej scꞌulej icha chiꞌ,
30 yuj on̈ scolanelta dꞌa yol scꞌabꞌ chamel, yic scacꞌan tzalajbꞌoc jabꞌocxo co cꞌool.
31 Mamin Job abꞌ val tas ol valaꞌ. Numan tzach aji yacbꞌan tzin loloni.
32 Tato ay tas tza nibꞌej tzalaꞌ, syal alan dꞌayin. Tato ay tas snachaj uuj, alaꞌ, tzin nibꞌej malaj tas scan dꞌa ibꞌan̈.
33 Tato malaj tas tzal jun, maclej abꞌ tas ol valaꞌ, ol ach in cꞌaybꞌej dꞌa jelanil, xchi vin̈aj Eliú chiꞌ.