A tas ix yal vin̈aj Eliú
32
Ayic ix yilan ebꞌ vin̈ oxvan̈ chiꞌ to stecꞌbꞌej sbꞌa vin̈aj Job yalani to malaj smul vin̈, ix yactan ebꞌ vin̈ stelan sbꞌa yedꞌ vin̈. 2 Palta a dꞌa scal ebꞌ vin̈ ay jun vin̈ vinac aj chon̈abꞌ Buz, Eliú sbꞌi vin̈, yuninal vin̈ vin̈aj Baraquel yin̈tilal vin̈aj Ram. Majxo techaj yuj vin̈ scot yoval dꞌa vin̈aj Job chiꞌ, yujto stecꞌbꞌej sbꞌa vin̈ yalani to malaj smul vin̈, syacꞌancanbꞌat vin̈ dꞌa yibꞌan̈ Dios. 3 Ix cot pax yoval vin̈aj Eliú chiꞌ dꞌa oxvan̈ ebꞌ vin̈ yamigo vin̈aj Job chiꞌ, yujto maj nachajel yuj ebꞌ vin̈ tas ix aj spacan slolonel vin̈ ebꞌ vin̈, vachꞌchom ix yacꞌcan ebꞌ vin̈ dꞌa yibꞌan̈ vin̈. 4 A vin̈aj Eliú chiꞌ quelemto vin̈ dꞌa scal ebꞌ vin̈ chiꞌ, yuj chiꞌ ix stan̈vej vin̈ slolon juntzan̈xo ebꞌ vin̈ chiꞌ yedꞌ vin̈aj Job chiꞌ. 5 Ayic ix yilan vin̈ to maxtzac yal spacan ebꞌ vin̈ dꞌa vin̈aj Job chiꞌ, majxo techaj yuj vin̈ syamanoch vaan sbꞌa, 6 ix syamanoch vin̈ yalan yic dꞌa scal ebꞌ vin̈ icha tic:Sbꞌabꞌel lolonel vin̈aj Eliú
A in tic quelem unin into, a exxo tic ichamtac vinac exxo, yuj chiꞌ maj yal in cꞌol ix valbꞌat tas tzin naꞌ dꞌa scal eyicoꞌ.
7 Ix in naan icha tic: Lolonocabꞌ ebꞌ vin̈ ichamtac vinac tic, yujto te ay tas yojtac ebꞌ vin̈. Schꞌoxocabꞌel sjelanil ebꞌ vin̈ chiꞌ, xin chi.
8 Palta jun, masanil anima ayn̈ej spensar, yujto a Dios Syal Yuj Smasanil, aꞌ ix acꞌanoch Yespíritu dꞌa ebꞌ.
9 Man̈ yujoc to nivanxo abꞌil syil junoc mach, yuj chiꞌ jelan, man̈ yujoc yicham vinaquil junoc mach, yuj chiꞌ vachꞌ snachajel yuuj.
10 Yuj chiꞌ sval icha tic: Comonoc tze maclej pax eyabꞌ tastac vic ol valaꞌ, ay pax jabꞌoc tas tzin nibꞌej svalaꞌ.
11 A in tic ix in maclej vabꞌ tas ix eyalaꞌ yacbꞌan a ex tic van e naan tas tzeyutej e pacan dꞌa vin̈ dꞌa jelanil.
12 Ix vilanpaxi to malaj junoc ex ix yal e pacan dꞌa vin̈ icha val smojal.
13 Xeyaltaoch e bꞌa jelanil, yujto maj yal eyuuj. An̈ej Dios ol pacan slolonel vin̈ chiꞌ.
14 Man̈oc dꞌayin ix yal juntzan̈ lolonel vin̈, yuj chiꞌ man̈ ol in pac dꞌa vin̈ icha ix e cꞌulej a ex tic.
15 A ticnaic mamin Job, a ebꞌ vin̈ oxvan̈ tic, somchajnac ebꞌ vin̈, max yal-laj spacan ebꞌ vin̈ tas ix alaꞌ.
16 Palta a in tic man̈ ol in em numan, vachꞌchom a ebꞌ vin̈ tic man̈xa tas vachꞌ yalan ebꞌ vin̈, maxtzac nachaj yuj ebꞌ vin̈ tas tzꞌaj spacani.
17 Palta ol vacꞌoch in bꞌa dꞌa scal jun lolonel tic, ol valan tas nabꞌil vuuj.
18 Tzijtum tas tzin nibꞌej svalaꞌ, maxtzac yal in yamanoch vaan in bꞌa yuj tas nabꞌil tic vuuj.
19 Ijan val tzin dꞌin̈chaj yuj in lolonel chiꞌ svabꞌi, icha nocꞌ acꞌ tzꞌuum bꞌudꞌan yuj yal sat uva.
20 Yovalil ol valaꞌ, ichato chiꞌ ol bꞌo in cꞌool, yovalil ol in pac a lolonel tic.
21 A dꞌayin, man̈ chꞌocchꞌococlaj yilji anima, palta lajann̈ej ebꞌ smasanil.
22 Val yel, a in tic man̈ in bꞌeybꞌaloc to ay junoc mach svicꞌchaan̈. Qꞌuinaloc icha chiꞌ, tzam yacꞌoch in yaelal Dios, aton bꞌojinac in.