31
In nanac sicꞌlabꞌil to malaj bꞌaqꞌuin̈ sviloch in cꞌol dꞌa ebꞌ ix cobꞌestac.2 Qꞌuinaloc sviloch in cꞌol dꞌa ebꞌ ix, ¿tocval man̈ ol yacꞌ spac Dios Syal Yuj Smasanil dꞌayin?
3 ¿Tom man̈oc dꞌa ebꞌ chuc yedꞌ dꞌa ebꞌ bꞌaj malaj yelcꞌoch Dios sjavi yaelal?
4 ¿Tocval max yil Dios tas tzin cꞌulej yedꞌ bꞌajtac tzin eqꞌui?
5 Svacꞌ val in tiꞌ to malaj mach bꞌaj chuc svutej in bꞌa, malaj bꞌaj ecꞌnac dꞌa in cꞌol in musan sat anima.
6 Comonoc tzin schꞌolbꞌitej Dios dꞌa stojolal icha yechtaj yalil junoc tas, yic syilani to tzꞌacan in vachꞌil.
7 Qꞌuinaloc in el dꞌa bꞌeybꞌal yic tojolal, mato in nibꞌejnac in cꞌulej tas svilochi, mato ay tas man̈ vicoc in macnac vicoc,
8 tato icha chiꞌ, chꞌococabꞌ mach slajancanel sat vavbꞌen, sjoyocabꞌqꞌueta ebꞌ tas avabꞌil chiꞌ vuuj.
9 Qꞌuinaloc ay junoc ix ix, ix cuchbꞌanbꞌat in pensar, mato in maclej yelta junoc ix yetbꞌeyum junocxo vinac dꞌa stiꞌ spat,
10 tato icha chiꞌ, acꞌjocabꞌ servil junoc chꞌoc vinaquil yuj ix vetbꞌeyum, vayocabꞌ junoc chꞌoc vinaquil yedꞌ ix.
11 Qꞌuinaloc in cꞌulej juntzan̈ chiꞌ, smoj val vabꞌan syaelal tzꞌacꞌjioch dꞌa vibꞌan̈ yuj ebꞌ juez.
12 Tato icha chiꞌ, jaocabꞌ in yaelal. Icha junoc nivan cꞌacꞌ satanel tastac, ichaocabꞌ taꞌ tzꞌaj satanel tastac ay dꞌayin.
13 Ayic stecꞌbꞌan sbꞌa ebꞌ in checabꞌ yalan dꞌayin yuj tas svutej, svabꞌ tas syal ebꞌ chiꞌ.
14 Tato man̈ ichaocta ix in cꞌulej, ¿tas ol vutej voch dꞌa yichan̈ Dios? ¿Tas ol vutej valani ayic ol scꞌanbꞌan dꞌayin yuj tas ix in cꞌulej?
15 Junn̈ej Dios on̈ acꞌan pitzvoc dꞌa co nun yedꞌ ebꞌ in checabꞌ chiꞌ, an̈ejtonaꞌ tzꞌacꞌan co qꞌuinal.
16 Man̈ ton̈ejoc sviloch ebꞌ mebꞌaꞌ ay stzapan majanil, man̈ ton̈ejoc svilpaxi to malaj tas sva ebꞌ ix ix chamnac yetbꞌeyum.
17 Ayic in vaꞌi laj vacꞌ yic ebꞌ mebꞌaꞌ unin vedꞌoc.
18 Icha val vuninal svutej ebꞌ mebꞌaꞌ unin chiꞌ. In colvajn̈ej dꞌa ebꞌ ix chamnac yetbꞌeyum.
19 Ayic svilani to ay ebꞌ anima te mebꞌaꞌ malaj spichul ayochi,
20 axo xil nocꞌ in calnel svacꞌ bꞌojoc, svacꞌanoch sqꞌuixinaloc ebꞌ. Yuj chiꞌ syacꞌ yuj diosal ebꞌ dꞌayin.
21 Tato ay bꞌaj ix vixtej junoc mebꞌaꞌ unin yujto vojtac to chabꞌil vic yuj ebꞌ yajal,
22 macꞌjocabꞌel in cꞌabꞌ tic, elocabꞌ vecnaj in jen̈jabꞌ tic.
23 Yujto tzin xiv yacꞌan in yaelal Dios, yuj chiꞌ max yal in tecꞌbꞌan in bꞌa dꞌa yichan̈, yujto te nivan yelcꞌochi.
24 Malaj bꞌaj an̈ej dꞌa nivac bꞌeyumal svacꞌoch in pensar, maj vacꞌoch qꞌuen oro yipoc in cꞌool.
25 Malaj bꞌaj vicꞌnacchaan̈ in bꞌa yuj in bꞌeyumal, ma yuj jantac tas ay dꞌayin.
26 Svil scopopial yoc cꞌu yedꞌ pax yic cꞌojan qꞌuen uj te vachꞌ yilji,
27 palta malaj bꞌaj elcꞌaltac tzin tzꞌubꞌelta in cꞌabꞌ yic tzin chꞌoxan yechel to tzin tzꞌubꞌelta stiꞌ cꞌu yedꞌ qꞌuen uj chiꞌ yic svacꞌanem in bꞌa dꞌay.
28 Qꞌuinaloc icha chiꞌ svutej in bꞌa, smoj am val tzꞌacꞌjioch in yaelal, yujto chabꞌsat am svutej in bꞌa dꞌa Dios ay dꞌa satchaan̈.
29 Malaj bꞌaj in tzalaj yuj yaelal sjavi dꞌa yibꞌan̈ ebꞌ vajcꞌool, ma yic sjavi chucal dꞌa yibꞌan̈ ebꞌ.
30 Malaj bꞌaj ochnac in mul in cꞌanancot catabꞌ dꞌa yibꞌan̈ ebꞌ, yic scham ebꞌ.
31 Masanil ebꞌ ayecꞌ vedꞌoc, yojtac val ebꞌ to ayic sjavi ebꞌ chꞌoc chon̈abꞌil dꞌayin, malaj junoc ebꞌ maj acꞌji tas svaꞌa.
32 A ebꞌ anima sbꞌeyeqꞌui, maj yal in cꞌol scan ebꞌ dꞌa yoltac calle dꞌacꞌvalil, jacann̈ej in pat dꞌa ebꞌ.
33 Malaj in mul syal in cꞌubꞌaneli, icha syutej sbꞌa juntzan̈xo ebꞌ. Malaj in mul elcꞌaltac yaji,
34 yujto tzin xiv dꞌa ebꞌ anima, talaj chuc tas syal ebꞌ dꞌayin. Maj in macoch in bꞌa dꞌa yol in pat yujto in xiv yuj tas syal ebꞌ in cꞌabꞌ voc.
35 Comonoc ay mach tzꞌabꞌan tas sval tic. A juntzan̈ sval tic yeln̈ej smasanil. Axo ticnaic tzin tan̈vej tas spac ol acꞌjoc dꞌayin yuj Dios Syal Yuj Smasanil chiꞌ. A tas tzꞌacꞌjioch dꞌa vibꞌan̈ chiꞌ, comonoc vachꞌ yaj stzꞌibꞌchaj yuj vin̈ tzꞌacꞌanoch dꞌa vibꞌan̈ chiꞌ.
36 Tato icha chiꞌ, tzam vacꞌqꞌue bꞌaj tzꞌibꞌabꞌiloch chiꞌ dꞌa sjolom in jen̈jabꞌ, ma dꞌa in jolom icha junoc corona yic svicꞌanchaan̈ in bꞌa.
37 Tzam val dꞌa Dios yuj masanil tas ix in cꞌulej, max am in qꞌuixvi in cꞌoch dꞌa yichan̈.
38 Qꞌuinaloc ton̈ej in tocꞌnaquecꞌ lum luum dꞌa ebꞌ ay yicoꞌ, aton lum bꞌaj tzin munlaji,
39 qꞌuinaloc ton̈ej ix in vabꞌat sat tas bꞌaj ix munlaj ebꞌ in munlajvum, maj in tuppaxlaj ebꞌ, a na van scham ebꞌ yuj vejel.
40 Tato icha chiꞌ, qꞌuibꞌocabꞌ te qꞌuiix dꞌa sat in lum chiꞌ sqꞌuexuloc ixim trigo, axo an̈ comon an̈cꞌultac sqꞌuibꞌ sqꞌuexuloc ixim cebada, xchi vin̈aj Job chiꞌ.
Aton slajvubꞌ slolonel vin̈aj Job tic.