30
A ebꞌ quelemtac te tzacꞌanto dꞌayin, tzin stzetzej ebꞌ ticnaic, ocxo dꞌa yalan̈taxo, a ebꞌ smam ebꞌ man̈ smojoc yecꞌ ebꞌ yedꞌ nocꞌ in tzꞌiꞌ stan̈van nocꞌ in calnel.2 Toxonton malaj yip ebꞌ, malaj tzꞌoch ebꞌ vuuj.
3 Yuj vejel yedꞌ mebꞌail, tzꞌecꞌ ebꞌ dꞌa taquin̈ luum dꞌacꞌvalil schꞌocoj, axo schꞌan̈al yibꞌtac te teꞌ sjoyqꞌueta ebꞌ scꞌuxuꞌ.
4 Slaj stocꞌqꞌueta an̈ comon an̈cꞌultac ebꞌ dꞌa caltac teꞌ schiꞌa, schiꞌan pax schꞌan̈al yibꞌ teꞌ meslabꞌ ebꞌ.
5 Aton juntzan̈ anima chiꞌ pechbꞌilel yuj ebꞌ yetanimail. Ayic spechjibꞌat ebꞌ chiꞌ, tzꞌel yav ebꞌ spechanbꞌat ebꞌ chiꞌ, icha tzꞌaj spechji ebꞌ elcꞌum.
6 A dꞌa yoltac qꞌuen n̈aqꞌueen, dꞌa sattac cꞌacap yedꞌ dꞌa sattac qꞌuen tenam, ataꞌ ix laj aj ebꞌ.
7 Slaj avaj ebꞌ dꞌa caltac vayumtac icha yel yav nocꞌ nocꞌ, axo dꞌa yichtac yoc teꞌ qꞌuiix slaj smolbꞌej sbꞌa ebꞌ.
8 Malaj jabꞌoc tas syal yuj ebꞌ, malaj yelcꞌoch ebꞌ, pechbꞌilel ebꞌ dꞌa scal ebꞌ anima.
9 Axo ticnaic tzin sbꞌuch ebꞌ yuninal ebꞌ, syicꞌanel in qꞌuixvelal ebꞌ.
10 Tzin syajan ebꞌ, tzꞌel ebꞌ dꞌa in tzꞌey, stzubꞌanoch ebꞌ dꞌa in sat.
11 Palta a ticnaic, a Dios ix icꞌanel vip, maxtzac yal in colan in bꞌa, yuj chiꞌ syacꞌ val sgana ebꞌ in yixtani.
12 A ebꞌ anima schichon scꞌol dꞌayin, toxon̈ej sja n̈ilan ebꞌ yic tzin spechanel ebꞌ snaani, snibꞌej ebꞌ tzin sateli.
13 Smacan yol in bꞌe ebꞌ yic tzin satanel ebꞌ snaani, man̈xa mach scachan ebꞌ.
14 Sjavi n̈ilnaj ebꞌ dꞌayin, ichato ay junoc olan bꞌaj tzꞌochta n̈ilnaj ebꞌ, ma icha co yamchaj yuj junoc icꞌ n̈abꞌ.
15 Icha val chiꞌ tzꞌaj sjavi xivcꞌolal dꞌayin. A in bꞌinajnaquil ix sateli, ichato ix icꞌjibꞌat yuj icꞌ. Masanil tas ay dꞌayin ix satcanel icha asun.
16 A ticnaic van in chami, maxtzac och vaan in yaelal tic.
17 A in yaelal tic scꞌoch val dꞌa yoltac in bꞌaquil. Max och vaan vabꞌan syail tzꞌecꞌ acꞌval.
18 Yedꞌ val yip Dios ichato ix schꞌumoch sudꞌan in pichul dꞌa in jaj, ix och bꞌiran dꞌa in nivanil.
19 Ix in sjulem dꞌa cal socꞌom. Icha lum pococ, ma qꞌuen ticꞌaqꞌuil taan̈ in ajcan dꞌa yol sat.
20 Ach in Diosal, tzin cꞌan a colval, palta max ach tacꞌvi dꞌayin. Tzin tevi dꞌayach palta maxtzac a cha abꞌi.
21 Chuc tzutej a bꞌa dꞌayin, tzin a pechan yedꞌ yoval a cꞌool.
22 Ichato tzin icꞌjiqꞌue vaan yuj icꞌ, axo icꞌ n̈abꞌ tzin tzicubꞌtan̈ani.
23 Vojtacxo to vanxo in icꞌanbꞌat dꞌa chamel, aton bꞌaj ol cꞌochn̈ej masanil anima.
24 Palta ¿tocval max qꞌue chꞌican scꞌabꞌ junoc mach ayecꞌ dꞌa scal syaelal yic scꞌanan colval?
25 In ocꞌ yuj ebꞌ ayoch dꞌa syaelal, in cus yuj ebꞌ malaj tas ay dꞌay.
26 Palta axo ticnaic ayic tzin tan̈van tzalajcꞌolal, axo cuscꞌolal sjavi dꞌayin. Tzin tan̈vej saquilqꞌuinal, axo qꞌuicꞌalqꞌuinal sjavi.
27 Toxon̈ej stin̈tin̈an in pixan yuj xivelal, maxtzac yal vicꞌan jabꞌoc vip, axon̈ej yaelal ste ja dꞌa vibꞌan̈.
28 Ix ja val cuscꞌolal dꞌayin, maxtzac vil-laj saquilqꞌuinal. Val dꞌa yichan̈ anima tzin qꞌue vaan in cꞌanan colval.
29 Cuseltacxon̈ej yel vav icha nocꞌ oques, ma icha nocꞌ cujubꞌ.
30 A in tzꞌumal ix te qꞌuicꞌbꞌieli, schivajpax in nivanil yuj cꞌacꞌ.
31 A dꞌa yalan̈taxo, tzin bꞌitan val yedꞌ yamcꞌabꞌ yic bꞌit dꞌa tzalajcꞌolal, axo ticnaic, an̈ej oqꞌuel svacꞌaꞌ.