Snacot vin̈aj Job tas yaj vin̈ dꞌa pecaꞌ
29
Ix syamanxioch vin̈aj Job yalan icha tic:2 Comonoc val syal in cꞌochxi icha vajtaxon dꞌa yalan̈taxo ayic te tan̈vabꞌil in yuj Dios.
3 Ayic syacꞌan saquilqꞌuinal Dios dꞌayin, vachꞌ in ecꞌ dꞌa cal qꞌuicꞌalqꞌuinal,
4 tecꞌan anima in, chequel val scolvaj Dios yedꞌ tastac ay dꞌayin.
5 Ayn̈ejecꞌ Dios Syal Yuj Smasanil chiꞌ vedꞌoc, axo ebꞌ vuninal, oyanoch ebꞌ dꞌa in patic.
6 A dꞌa jun tiempoal chiꞌ, man̈xo jantacoc yal yim nocꞌ in vacax yedꞌ nocꞌ in chiva tzꞌelta. A teꞌ olivo avabꞌil dꞌa caltac qꞌueen, man̈ jantacoc aceite svicꞌ dꞌa teꞌ.
7 Ayic tzin cꞌoch bꞌaj smolbꞌej sbꞌa ebꞌ yajalil chon̈abꞌ, tzin em cꞌojan dꞌa in xila dꞌa scal ebꞌ.
8 Ayic tzin yilan ebꞌ quelemtac, sbꞌes sbꞌa ebꞌ, axo ebꞌ ichamtac vinac sqꞌue lin̈an ebꞌ ayic tzin cꞌochi.
9 A ebꞌ yajal chon̈abꞌ, numan tzꞌaj ebꞌ, syacꞌ yechel ebꞌ yic numan tzꞌaj juntzan̈xo ebꞌ.
10 A ebꞌ yajalil chon̈abꞌ, cꞌunxon̈ej slolon ebꞌ, man̈xa tas syal ebꞌ.
11 Ayic tzin yilan ebꞌ, syabꞌan ebꞌ tas svalaꞌ, syalan vachꞌ lolonel ebꞌ dꞌa in patic,
12 yujto tzin colvaj dꞌa ebꞌ man̈xa smam yedꞌ dꞌa ebꞌ mebꞌaꞌ, aton ebꞌ malaj junocxo mach scolan dꞌa scal yaelal.
13 A ebꞌ van scham yuj mebꞌail, syacꞌ yuj diosal ebꞌ dꞌayin, axo ebꞌ ix chamnac yetbꞌeyum, stzalaj ebꞌ ix yuj in colval.
14 A tojolal yedꞌ vachꞌcꞌolal ayn̈ejoch dꞌayin, ichato in pichul yajochi.
15 In och yedꞌ ebꞌ max uji yilani yedꞌ ebꞌ max uji sbꞌeyi.
16 Icha mamabꞌil vaj dꞌa ebꞌ ay stzapan smajanil. Tzin colan pax ebꞌ max yal scolan sbꞌa dꞌa yichan̈ ebꞌ yajal, vachꞌchom man̈ vojtacoc ebꞌ palta tzin coln̈ej ebꞌ.
17 Sviqꞌuel yopisio ebꞌ ixtum anima, tzin colancanel ebꞌ ayoch dꞌa yol scꞌabꞌ ebꞌ.
18 A in naani to te nivan tiempo ol vilaꞌ, icham animail ol icꞌan in cham dꞌa in chꞌat.
19 A dꞌa jun tiempoal chiꞌ lajan in icha junoc te teꞌ avabꞌil dꞌa stiꞌ junoc a aꞌ, a scꞌabꞌtac teꞌ schaan yal acꞌval tzꞌemi.
20 Vachꞌ syutej ebꞌ anima in yacꞌan bꞌinajoc, ichato junjun cꞌu tzꞌochn̈ej vip in colan in bꞌa.
21 Masanil anima smaclan yabꞌ tas svalaꞌ, numan tzꞌaj ebꞌ yabꞌan in razón.
22 Ayic slajvi in lolon chiꞌ, schan̈ej scꞌol ebꞌ smasanil. Vachꞌn̈ej syabꞌ ebꞌ.
23 Snibꞌej val ebꞌ syabꞌ in lolonel chiꞌ, icha val snibꞌan n̈abꞌ ebꞌ munlajvum dꞌa varesma.
24 Ayic tzin tzevaj yedꞌ ebꞌ, tzꞌoch qꞌuelan ebꞌ, ijan val max schalaj ebꞌ, max stzuntzejcotlaj voval ebꞌ.
25 Svacꞌoch vopisio dꞌa scal ebꞌ, svalani tas yovalil scꞌulej ebꞌ, icha junoc rey tzꞌacꞌan mandar dꞌa scal ebꞌ soldado. Ayic ay scuscꞌolal ebꞌ, svacꞌ snivanil scꞌool ebꞌ.