Aloj vachꞌ lolonel dꞌa jelanil
28
A qꞌuen plata ay sminasil qꞌuen bꞌaj sqꞌueta, axo qꞌuen oro ay yedꞌtal qꞌuen bꞌaj sbꞌoi.2 A qꞌuen hierro tzꞌicꞌchajqꞌueta qꞌuen dꞌa yol luum, axo qꞌuen qꞌueen, ayic stzꞌa qꞌuen dꞌa cal cꞌacꞌ, tzꞌelta qꞌuen cobre dꞌa qꞌueen.
3 A ebꞌ anima, maxtzac xivlaj ebꞌ bꞌaj te qꞌuicꞌqꞌuinal. Tzꞌemn̈ej ebꞌ dꞌa yoltac qꞌuen nivac xabꞌ te jul yich. A dꞌa scal qꞌuicꞌalqꞌuinal chiꞌ, ataꞌ say qꞌuen qꞌueen chiꞌ ebꞌ.
4 Sjoyqꞌueta juntzan̈ minas ebꞌ bꞌaj maxtzac ecꞌ anima, najat yajbꞌat bꞌaj ay chon̈abꞌ. A yedꞌ chꞌan̈ lasu tzꞌecꞌ dꞌun̈un̈oc ebꞌ.
5 A dꞌa sat luum tic, sqꞌuibꞌchaan̈ tas svaji, axo dꞌa yalan̈ luum syacꞌoch cꞌacꞌ ebꞌ anima yic spoj qꞌuen qꞌueen.
6 Axo dꞌa scal scꞌajil qꞌueen chiꞌ, tzꞌilchaj qꞌuen zafiro yedꞌ qꞌuen oro.
7 A dꞌa yoltac minas chiꞌ, malaj junoc nocꞌ icꞌumbꞌat much tzꞌecꞌ taꞌ. Malaj pax nocꞌ chꞌacbꞌa tzꞌilan yool chiꞌ.
8 A nocꞌ chium nocꞌ, maxtzac ecꞌlaj nocꞌ taꞌ. Maxtzac ecꞌpaxlaj nocꞌ choj taꞌ.
9 A ebꞌ vin̈ vinac, smacꞌ qꞌuen qꞌueen ebꞌ vin̈ te tzatz, syamanoch ebꞌ vin̈ sjoyan yichtac lum nivac vitz.
10 Sjoyanoch nivac olan ebꞌ vin̈ dꞌa sattac qꞌuen tenam, yic sayan qꞌuen qꞌueen ebꞌ vin̈ caro stojol.
11 Sjacanqꞌueta a aꞌ ebꞌ vin̈ taꞌ. Syicꞌanqꞌueta ebꞌ vin̈ dꞌa saquilqꞌuinal tastac cꞌubꞌeltac yaji.
12 Palta a jelanil ¿bꞌajtil tzꞌilchaji? ¿bꞌajtil ay aj pensaril?
13 A jelanil chiꞌ malaj junoc anima ojtannac tastac yedꞌnac, max chaxlaj dꞌa scal ebꞌ anima dꞌa yolyibꞌan̈qꞌuinal tic.
14 Vachꞌchom sco sayecꞌ dꞌa sjulal yich aꞌ mar, max chaxlaj cuj taꞌ.
15 Max yal yacꞌchaj qꞌuen oro, ma qꞌuen plata sqꞌuexuloc.
16 Max yal smanchaj yedꞌ qꞌuen oro te vachꞌ, ma yedꞌ qꞌuen cornalina, ma yedꞌ qꞌuen zafiro.
17 Max yal co lajbꞌan yedꞌ qꞌuen oro, ma yedꞌ qꞌuen qꞌueen caro stojol. Max yal sqꞌuexchaj yedꞌ yelvanubꞌ scꞌan ebꞌ ix ix nabꞌa oro.
18 A jelanil chiꞌ te nibꞌabꞌil dꞌa yichan̈ qꞌuen coral. Ecꞌbꞌal te vachꞌ dꞌa yichan̈ qꞌuen cuarzo, ma qꞌuen perla.
19 Max yal slajbꞌan sbꞌa jelanil chiꞌ yedꞌ qꞌuen crisólito scot dꞌa Etiopía, max yal stupchaj yedꞌ qꞌuen oro te vachꞌ.
20 Palta ¿bꞌajtil scot jelanil chiꞌ? ¿bꞌajtil ay aj pensaril?
21 Cꞌubꞌabꞌilel dꞌa masanil anima pitzan. Cꞌubꞌabꞌilpaxel dꞌa nocꞌ much sjen̈vi.
22 A bꞌaj ayecꞌ ebꞌ chamnac yedꞌ jun chamel, syal ebꞌ icha tic: Ton̈ej ix cabꞌ sbꞌinajnaquil jelanil chiꞌ, xchi ebꞌ.
23 Palta a Dios yojtac sbꞌeal jelanil chiꞌ, yojtac bꞌaj ay.
24 Yujto syil masanil bꞌaj slajvicꞌoch yolyibꞌan̈qꞌuinal tic yedꞌ masanil tas ay dꞌa yalan̈ satchaan̈.
25 Ayic ix yacꞌancanoch Dios yipal icꞌ, ayic ix yacꞌanem yechel bꞌaj sjavi cꞌaman a aꞌ,
26 ayic ix sbꞌoancan tiempoal n̈abꞌilqꞌuinal, ayic ix sbꞌoancan bꞌaj tzꞌecꞌ lebꞌlon yic smacꞌvaj cꞌu,
27 ataꞌ ix yilaꞌ to te nivan yelcꞌoch jelanil, ix schꞌolbꞌitani, ix yilani to vachꞌ tzꞌaj icha chiꞌ.
28 Ix yalan Dios dꞌa ebꞌ anima icha tic: Tato nivan velcꞌoch dꞌa yol e sat, aton jelanil chiꞌ, tato tzeyiqꞌuel e bꞌa dꞌa scal chucal, aton aj pensaril chiꞌ, xchi Dios chiꞌ.