27
Ix lolonn̈ej vin̈aj Job:2 Svacꞌ in tiꞌ dꞌa yichan̈ Dios Syal Yuj Smasanil, aton jun max yal scꞌol sbꞌoan yaj tas vaji, aton tzꞌacꞌan ixtaxel in pensar yuj in yaelal,
3-4 yacbꞌan pitzan into, yacbꞌan tzato yal vicꞌan vicꞌ yuuj, an̈ej tas yel ol valaꞌ, man̈ ol val tas man̈ yeloc.
5 Toxon malaj bꞌaqꞌuin̈ ol valaꞌ to yel tas tzeyal dꞌayin. Man̈ ol in chaoch dꞌa vibꞌan̈ to ay in mul.
6 Ol valn̈ej to vachꞌ in pensar, man̈ ol in qꞌuex tas svalaꞌ. Tzin bꞌeycꞌolej val in bꞌa to malaj in mul svabꞌi.
7 Masanil ebꞌ ayoch ajcꞌolal dꞌayin, jaocabꞌ yaelal dꞌa yibꞌan̈ ebꞌ, icha yaelal sjavi dꞌa yibꞌan̈ ebꞌ chuc.
8 ¿Tasto val ayoch yipoc scꞌol ebꞌ chuc, ayic tzꞌicꞌjiel sqꞌuinal ebꞌ yuj Dios?
9 Ayic ayoch ebꞌ dꞌa syaelal, ¿tom ol scha yabꞌ Dios ayic ol tevoc ebꞌ dꞌay?
10 ¿Tocval tzꞌilchaj stzalajcꞌolal ebꞌ dꞌa Dios Syal Yuj Smasanil tato malaj bꞌaj syal sbꞌa ebꞌ dꞌay?
11 A ticnaic ol in chꞌox val snivan poder Dios Syal Yuj Smasanil dꞌayex yedꞌ tas nabꞌil yuuj.
12 A ex tic eyilnacxo juntzan̈ chiꞌ, axo ticnaic jun, ¿tas yuj tzex lolon dꞌa man̈ pensaril?
13 A jun yaelal tic syacꞌ Dios Syal Yuj Smasanil spacoc dꞌa ebꞌ ixtum anima.
14 Vachꞌchom tzijtum yuninal ebꞌ, palta ol cham ebꞌ dꞌa oval, ma yuj vejel.
15 Axo ebꞌ olto can dꞌa scal ebꞌ, a ilya ol icꞌan scham ebꞌ. Axo ebꞌ ix yetbꞌeyum ebꞌ scani, man̈ ol ocꞌlaj ebꞌ ix yuj ebꞌ.
16 Vachꞌchom a ebꞌ chuc chiꞌ ste molbꞌej qꞌuen plata ebꞌ icha lum pococ, vachꞌchom man̈ jantacoc spichul ebꞌ ayeqꞌui,
17 axom junoc vin̈ vinac te vachꞌ spensar ol acꞌanoch juntzan̈ pichul chiꞌ, ol yacꞌan sgana vin̈ yedꞌ qꞌuen plata chiꞌ.
18 A spat ebꞌ chuc chiꞌ, cꞌuun, lajan icha juntzan̈ yedꞌtal nocꞌ tzocoy, ma icha junoc lechpat dꞌa cal munlajel.
19 A ebꞌ chuc chiꞌ svaycanem ebꞌ yedꞌ sbꞌeyumal, axo tzꞌel svayan̈ ebꞌ man̈xalaj tas dꞌa ebꞌ, mebꞌaxo ebꞌ.
20 A xivelal ol javoc dꞌa ebꞌ icha aꞌ elumaꞌ, ma icha tzꞌaj yicꞌjibꞌat junoc tas yuj icꞌn̈abꞌ dꞌacꞌvalil.
21 A chacxuxum icꞌ scot dꞌa stojolal bꞌaj sjavi cꞌu, a ol ecꞌ leman spat ebꞌ,
22 ol och xuman dꞌa ebꞌ, ol lajvoquel ebꞌ yuuj. Vachꞌchom olto snibꞌej el lemnaj sbꞌa ebꞌ, palta man̈xalaj nivancꞌolal dꞌa ebꞌ.
23 A jun oval icꞌ chiꞌ ol cꞌan̈ val, ol xururoc yoch dꞌa spatic ebꞌ.