Ix bꞌuchvaj vin̈aj Job dꞌa vin̈aj Bildad
26
Ix yalanxi vin̈aj Job chiꞌ icha tic:2 Yipcꞌolal ix colvaj a lolonel ix al dꞌayin dꞌa in cuscꞌolal tic, yuj am to tzilaꞌ to man̈xalaj vip.
3 Vachꞌ jun, syal acꞌan in razón, tzin a cꞌaybꞌan a in malaj in pensar tic.
4 ¿Mach ix lolon dꞌa a pensar yuj chiꞌ tzalaꞌ? ¿Mach ix alan dꞌayach, yuj chiꞌ tzal icha chiꞌ?
5 A ebꞌ chamnac ayecꞌ dꞌa sjulal yich aꞌ mar, tzꞌibꞌxi ebꞌ yuj xivelal.
6 A bꞌaj ayecꞌ ebꞌ chamnac, chequel yaj dꞌa yichan̈ Dios, chequel yaj junjun ebꞌ dꞌa yichan̈.
7 A ix jen̈bꞌanbꞌat satchaan̈ dꞌa stojolal norte bꞌaj jacan, malaj tas dꞌay. Ix sbꞌoanoch lum luum bꞌaj malaj tasi.
8 A tzꞌacꞌanbꞌat a aꞌ dꞌa scal asun, palta max n̈icꞌchajlaj asun chiꞌ yuj yalil aꞌ.
9 A tzꞌacꞌan qꞌuicꞌbꞌoquel sat qꞌuen uj, vachꞌchom cꞌojan qꞌueen, palta aꞌ tzꞌacꞌanoch asun dꞌa sat qꞌueen.
10 A ix acꞌanem yechel dꞌa yibꞌan̈ aꞌ mar bꞌaj scꞌoch cꞌaman saquilqꞌuinal yedꞌ qꞌuicꞌalqꞌuinal.
11 A yipumal satchaan̈ tzꞌibꞌxi, xivpaxqꞌuei ayic stumvaj Dios chiꞌ.
12 A yuj spoder ix scachanoch vaan aꞌ mar, yuj sjelanil ix yacꞌan ganar nocꞌ nivan Rahab.*
13 Jun pusn̈ej syacꞌaꞌ scꞌachvi, a yedꞌ spoder stecancham nocꞌ chan mecan cuman sbꞌati.
14 A jantac tas satubꞌtac scꞌulej ix cabꞌ tic, jabꞌn̈ej. A tas ix cabꞌ tic ton̈ej ix co mac abꞌej. Ocxom val to tzꞌacan tzꞌaj cabꞌani, maxtzac am nachajel cuuj, xchi vin̈aj Job chiꞌ.