A tas squicꞌ dꞌa jelanil
2
Ach vuninal, acꞌoch juntzan̈ in lolonel tic dꞌa a cꞌool, sicꞌcan juntzan̈ in checnabꞌil tic dꞌa a pensar.2 Maclej abꞌ jelanil svalaꞌ, acꞌ ip a naaneli.
3 Dꞌa smasanil a cꞌool tza cꞌan a jelanil yic ol ach jelanbꞌoc.
4 Acꞌ ip a sayaneqꞌui, icha tzꞌaj saychaj qꞌuen plata, ma junoc bꞌeyumal to cꞌubꞌaneli.
5 Icha chiꞌ ol aj snachajel uuj, tas ol aj a cꞌanabꞌajan Jehová yic tzojtaquejel dꞌa val yel.
6 A Jehová tzꞌacꞌan jelanil. Yuj slolonel scojtaquejel smasanil, syacꞌan jelanbꞌoc co pensar.
7 A Jehová tzꞌacꞌan sjelanil ebꞌ tojol sbꞌeybꞌal, aton ebꞌ max esanlaj.
8 A Jehová stan̈van ebꞌ vachꞌ syutej sbꞌa, aton ebꞌ scꞌanabꞌajani.
9 Yuj chiꞌ tato tza maclej abꞌ in checnabꞌil, ol ojtaquejel tojolal yedꞌ tas smoj tza cꞌulej, yic vachꞌ ol aj a bꞌeybꞌal.
10 Icha chiꞌ ol aj sjelanbꞌi a pensar, ol ach tzalaj yedꞌ tas ojtac chiꞌ.
11 A jelanil yedꞌ vachꞌ pensaril, aton juntzan̈ chiꞌ ol ach colanoc.
12 A yuj juntzan̈ chiꞌ ol iqꞌuel a bꞌa dꞌa juntzan̈ chuc bꞌeybꞌal yedꞌ dꞌa yol scꞌabꞌ ebꞌ anima chuc spensar.
13 A ebꞌ anima an̈ej chucal scꞌulej chiꞌ, syactejcan vachꞌ bꞌeybꞌal ebꞌ.
14 Stzalaj val ebꞌ yedꞌ schuc bꞌeybꞌal chiꞌ, ste qꞌuechaan̈ ebꞌ yedꞌ sbꞌeybꞌal malaj svachꞌil chiꞌ.
15 Dꞌa sbꞌeybꞌal ebꞌ chuc chiꞌ syacꞌoch spensar, syactancan jun bꞌeybꞌal ebꞌ vachꞌ.
16 A jelanil yedꞌ vachꞌ pensaril, ol ach scolel dꞌa yol scꞌabꞌ ebꞌ ix ix ayxo yetbꞌeyum, aton ebꞌ ix ajmul ix vachꞌ smontan yedꞌ slolonel te vachꞌ,
17 to yactejnaccan yetbꞌeyum yicꞌnac dꞌa scobꞌesal, sbꞌatcan satcꞌolal stiꞌ yacꞌnaccan dꞌa yichan̈ Dios.
18 Tato tzach bꞌat dꞌa sbꞌeal spat ebꞌ ix chiꞌ, van a bꞌatcan dꞌa sbꞌeal chamel.
19 A mach tzꞌochcan dꞌa yol spat ebꞌ ix, man̈xa bꞌaqꞌuin̈ tzꞌelxita ebꞌ, maxtzac yal-laj scajnajxi dꞌa vachꞌ dꞌa yolyibꞌan̈qꞌuinal tic.
20 Tato tza cha abꞌ jelanil chiꞌ, ol a bꞌeybꞌalej sbꞌeybꞌal ebꞌ tojol spensar.
21 A ebꞌ tojol syutej sbꞌa, ebꞌ malaj jabꞌoc spaltail, najtil ol ecꞌ ebꞌ dꞌa yolyibꞌan̈qꞌuinal tic.
22 Axo ebꞌ chuc sbꞌeybꞌal yedꞌ ebꞌ ixtum anima, ol icꞌjoquel ebꞌ dꞌa yolyibꞌan̈qꞌuinal tic icha co tocꞌanqꞌueta junoc an̈ an̈cꞌultac.