Eclesiastés sbꞌi jun libro tic, syalelcꞌochi jun alumel abꞌix. Sco na jabꞌoc to a vin̈aj Salomón yuninal vin̈aj David tzꞌibꞌannaccani. A vin̈ tzꞌibꞌannac, syalcot vin̈ yuj tas sna junoc mach, tas pax yelcꞌoch ebꞌ anima. Syalancoti to man̈ nivanoc tiempo tzꞌecꞌ ebꞌ anima dꞌa yolyibꞌan̈qꞌuinal tic. Tzijtum el squilaꞌ to a tas sco nibꞌej max elcꞌochlaj icha val tzꞌaj co naani.

A vin̈ tzꞌalani to tzꞌeln̈ejcꞌoch tas sco nibꞌej, aton tzalajcꞌolal, bꞌeyumal yedꞌ aj pensaril, palta yilnaquelta vin̈ to man̈ smojoc ay yelcꞌoch juntzan̈ tic dꞌa co sat. Maj nachajel-laj yuj vin̈ tas val yuj bꞌobꞌil on̈ yuj Dios. An̈ej tas syal vin̈ to yovalil tzon̈ munlaji, scacꞌan tzalajbꞌoc co cꞌool yedꞌ tas syacꞌ Dios dꞌayon̈.

Te ayto tas syal yuj juntzan̈ tas sjavi dꞌa quibꞌan̈. Syalancoti tas scutej cacꞌanoch Dios dꞌa co cꞌool tato ay co chabꞌcꞌolal. A schꞌoxani tas ayecꞌ dꞌa co pensar, tas pax snibꞌej Dios sco cꞌulej. Syalanpaxi to ayocabꞌ yelcꞌoch co qꞌuinal dꞌayon̈. Yuj chiꞌ ay ebꞌ tzꞌalani to a jun libro tic lajan icha junoc qꞌuen nen bꞌaj squil co sat. Tzꞌibꞌabꞌilcan jun libro tic dꞌa yol chꞌan̈ Biblia yic vachꞌ squilaꞌ tas quilji yedꞌ co bꞌeybꞌal, yujto syil Dios masanil tas sco cꞌulej.