A Chꞌan̈ Libro
ECLESIASTÉS
Masanil tas malaj yelcꞌochi
1
1-2 A jun vin̈ yuninal vin̈aj David, rey dꞌa Jerusalén, a vin̈ ix alanel juntzan̈ lolonel tic.Masanil tas malaj yelcꞌochi, malaj tas yedꞌnac.
3 ¿Tas val syacꞌ yal ebꞌ anima dꞌa jantac munlajel sbꞌo dꞌa yolyibꞌan̈qꞌuinal tic?
4 Ay ebꞌ tzꞌalji, ay pax ebꞌ schami, axo pax lum luum tic, an̈ejaꞌ yaj luum.
5 Sjavi cꞌu, tzꞌemxicani. Icha tzꞌaj yemcan chiꞌ icha chiꞌ sqꞌueul junelxo.
6 Sbꞌat icꞌ dꞌa sur, smeltzajxi, sbꞌatxican dꞌa norte. Ton̈ej tzꞌecꞌ xumumoc icꞌ chiꞌ. Smeltzajxi dꞌa spatic.
7 A masanil a aꞌ sbꞌeyi, scꞌochcan aꞌ dꞌa aꞌ mar, palta malaj bꞌaqꞌuin̈ sbꞌudꞌji aꞌ mar chiꞌ. Sqꞌuexul aꞌ junelxo bꞌajtaxon sqꞌueul sjaj, sbꞌeyxi aꞌ bꞌaj sbꞌeytaxoni.
8 Masanil tas tzon̈ te tzactzaj val yedꞌoc, palta malaj bꞌaqꞌuin̈ tzon̈ tzactzaj co matzꞌani. Malaj pax bꞌaqꞌuin̈ tzon̈ tzactzaj cabꞌani.
9 Masanil tas ay ticnaic, aytaxon dꞌa pecaꞌ. Malaj junoc tas sco cꞌulej ticnaic to man̈ scꞌulejnacoc ebꞌ anima dꞌa pecaꞌ chiꞌ. Malaj junoc tas toto scheclaj cuj ticnaic.
10 Ay ebꞌ scomon alani: A jun tic, toto spitzvichaan̈ dꞌa co cal, xchi ebꞌ. Palta a jun chiꞌ aytaxoneqꞌui ayic manto on̈ aljilaj a on̈ tic.
11 A ebꞌ ecꞌnac dꞌa pecaꞌ, maxtzac co nacotlaj ebꞌ. Icha chiꞌ ol aj ebꞌ vanto sjavi dꞌa quichan̈, man̈xo ol nachajpaxcotlaj ebꞌ yuj ebꞌ toto ol ja dꞌa yichan̈ ebꞌ.
A tas yojtac vin̈ tzꞌalanel lolonel
12 A in svalel lolonel tic, ix in och sreyaloc ebꞌ vetisraelal dꞌa chon̈abꞌ Jerusalén. 13 Ix vacꞌ val och dꞌa in cꞌol in naan yedꞌ in jelanil yuj masanil tastac tzuji dꞌa yolyibꞌan̈qꞌuinal tic. Te al jun icatz aycanoch dꞌa quibꞌan̈ a on̈ anima on̈ tic yuj Dios. 14 Icha chiꞌ ix aj snachajel vuuj to a masanil tas sco cꞌulej dꞌa yolyibꞌan̈qꞌuinal tic, malaj yelcꞌochi. Lajan val icha bꞌaj sco nibꞌej sco yam icꞌ, palta max yamchajlaj cuuj, icha chiꞌ caji.
15 A tas toxonton coxo, maxtzac yal co tojolbꞌitani, max yal-laj co bꞌisan tas to malaj.
16-17 Yuj chiꞌ ix in naan icha tic: A in tic, te nivan velcꞌoch yedꞌ in jelanil dꞌa yichan̈ ebꞌ ecꞌnac reyal dꞌa Jerusalén tic. Jantac tas ix in cꞌaybꞌej yuj in jelanil, yuj chiꞌ ix in naan val tas syacꞌ jelanil chiꞌ dꞌayon̈ yedꞌ tas syacꞌ man̈ pensaril yedꞌ quistalil. Ix nachajel vuuj to a juntzan̈ chiꞌ lajan val icha bꞌaj sco nibꞌej sco yam icꞌ, palta max yamchajlaj cuuj. Max nachajel-laj vuuj. 18 Val yel ayic tzon̈ te jelanbꞌi, ste javipax ilcꞌolal dꞌa quibꞌan̈. Ayic sco te ojtacaneli, ste javipax cuscꞌolal dꞌa quibꞌan̈.