3 Ix in nibꞌej val ix vojtaquejeli tas val junoc nivan yelcꞌoch sco bꞌo a on̈ anima on̈ tic, yacbꞌan pitzan on̈ jayeoc cꞌual dꞌa yolyibꞌan̈qꞌuinal tic. Ix vacꞌ val tzalajbꞌoc in cꞌol yedꞌ uqꞌuel an̈, ix vacꞌanoch in bꞌa dꞌa man̈ pensaril, palta naann̈ej vuuj to a in jelanil tzin cuchbꞌani.

4 Jantac nivac munlajel ix in bꞌoꞌo. Ix in bꞌo juntzan̈ pat, ix laj vavanpax teꞌ uva. 5 Ix laj in bꞌo bꞌajtac tzꞌavchaj teꞌ avbꞌen teꞌ yedꞌ bꞌajtac tzꞌavchaj te teꞌ syacꞌ xumaquil. Ix vavanpax masanil macan̈il te teꞌ syacꞌ sat. 6 Ix laj in bꞌoanpax yedꞌtal a aꞌ bꞌaj smolchaji yic tzꞌoch yal teꞌ avbꞌen teꞌ chiꞌ. 7 Ay ebꞌ vin̈ in checabꞌ yedꞌ ebꞌ ix in checabꞌ ix in manaꞌ, ay pax ebꞌ ix alji dꞌa in pat. An̈ejtonaꞌ jantac pax ix aj nocꞌ in vacax yedꞌ nocꞌ in calnel dꞌa yichan̈ ebꞌ ecꞌnac cajan dꞌa Jerusalén dꞌa pecataxo. 8 Man̈xo jantacoc qꞌuen plata yedꞌ qꞌuen oro ix in molbꞌej, aton qꞌuen cotnac dꞌa ebꞌ sreyal juntzan̈xo nación. Ay pax ebꞌ vin̈ vinac yedꞌ ebꞌ ix ix sbꞌitan dꞌayin, aton masanil nibꞌabꞌil yuj ebꞌ quetanimail. Jantac pax ebꞌ ix ix, ix vicꞌaꞌ, tzolal sjavi ebꞌ ix dꞌayin.

9 Ix in bꞌinaj val dꞌa yichan̈ masanil ebꞌ ecꞌnac dꞌa Jerusalén tic. Vachꞌchom ay masanil juntzan̈ tic dꞌayin, palta maj satel-laj in jelanil. 10 Maj in tenecꞌlaj tas ix in nibꞌej. Ix vacꞌn̈ej in gana yedꞌ tas ix in naꞌa. Ix vacꞌ tzalajbꞌoc in cꞌool yedꞌ masanil in munlajel, aton jun tzalajcꞌolal chiꞌ ix acꞌji spacoc dꞌayin.

11 Ix lajvi chiꞌ, ix vilanoch masanil in munlajel ix in bꞌo chiꞌ, aton juntzan̈ munlajel chiꞌ pural ix bꞌo vuuj. Icha chiꞌ ix aj snachajel vuuj to a masanil juntzan̈ chiꞌ, malaj yelcꞌochi. Lajan val icha bꞌaj sco nibꞌej sco yam icꞌ, palta max yamchajlaj cuuj. Icha chiꞌ caji, malaj jabꞌoc tas vachꞌ squicꞌ dꞌa yolyibꞌan̈qꞌuinal tic.

12 Ix lajvi chiꞌ, ix in naanpaxi tas val yaj jelanil, man̈ pensaril yedꞌ quistalil. ¿Tasto val ol scꞌulej junocxo mach ol ochcan reyal in qꞌuexuloc? ¿Tocval ay junocxo tas chꞌoc ol yal snaanelta sbꞌoani mato scꞌulani? 13 Icha chiꞌ ix aj snachajel vuuj to a jelanil yelxo te vachꞌ dꞌa yichan̈ man̈ pensaril, icha yaj saquilqꞌuinal te vachꞌ dꞌa yichan̈ qꞌuicꞌalqꞌuinal.

14 A mach n̈ican spensar, te vachꞌ yilan bꞌaj tzꞌeqꞌui. Axo mach malaj spensar jun, ichato dꞌa scal qꞌuicꞌalqꞌuinal sbꞌeyeqꞌui. Vachꞌchom icha chiꞌ, palta lajann̈ej tzꞌaj co chami. 15 Ix valan icha tic: A tas ol icꞌan ebꞌ malaj spensar, an̈ejaꞌ ol in icꞌan paxoc, yuj chiꞌ jun, malaj jabꞌoc tas squicꞌ dꞌa jelanil chiꞌ. An̈ejaꞌ malaj yelcꞌoch juntzan̈ chiꞌ. 16 Yuj chiꞌ vachꞌchom jelan on̈, vachꞌchom malaj co pensar, ol on̈ cham co masanil, man̈xo ol on̈ nachajcot yuj anima.

17 Yuj chiꞌ ix in na icha tic, malaj yelcꞌoch co qꞌuinal tic, yujto masanil tas sco cꞌulej dꞌa yolyibꞌan̈qꞌuinal tic, ton̈ej squixtej co bꞌa yuuj. Lajan val icha bꞌaj sco nibꞌej sco yam icꞌ, palta max yamchajlaj cuuj, icha chiꞌ caji. 18 An̈ejtonaꞌ malaj yelcꞌoch masanil juntzan̈ in munlajel ix in bꞌo dꞌa yolyibꞌan̈qꞌuinal tic, yujto masanil juntzan̈ chiꞌ an̈ej am dꞌa junocxo mach bꞌaj ol canoc. 19 Taxon̈ej jelan, ma malaj spensar jun bꞌaj ol can masanil in munlajel ix vabꞌ syail in bꞌoan chiꞌ yedꞌ jelanil, malaj jabꞌoc yelcꞌochi.

20 Ayic svilanoch masanil in munlajel ix in bꞌo chiꞌ, snaan sbꞌa in cꞌool to nabꞌan̈ej ix vixtej in bꞌa in te munlaji. 21 Ay bꞌaj jelan co bꞌoan co munlajel chiꞌ, te vachꞌ scutej yuj tastac cojtac, palta axo tzꞌaji a dꞌa junoc max munlaj jabꞌoc, ataꞌ scani. A jun chiꞌ nabꞌan̈ej, man̈ smojoc icha chiꞌ.

22 Yuj chiꞌ, ¿tas val scacꞌ yalaꞌ ayic te nivan munlajel sco bꞌo yedꞌ jantac tas sco naꞌ yuuj? 23 Masanil tiempo sco te naubꞌtan̈ej, al yajoch dꞌa quibꞌan̈ icha val junoc icatz. Max yicꞌ jabꞌoc yip co pensar, yuj chiꞌ malaj yelcꞌoch jun chiꞌ.

24 A val tas smoj sco cꞌulej a on̈ anima on̈ tic to tzon̈ vaꞌi scucꞌan aꞌ, scacꞌan tzalajbꞌoc co cꞌool yedꞌ tastac squicꞌ dꞌa co munlajel chiꞌ. Icha chiꞌ ix aj snachajel vuuj to a jun chiꞌ a dꞌa Dios scoti. 25 ¿Tom syal co tzalaji, ma co vaꞌi tato man̈ yujoc Dios? 26 Tato stzalaj Dios quedꞌoc, syacꞌ co jelanil yedꞌ co pensar yedꞌ co tzalajcꞌolal. Palta axo ebꞌ chuc jun, a Dios chiꞌ tzꞌacꞌan yip ebꞌ yic smunlaj ebꞌ smolbꞌan tastac tzꞌaj dꞌa ebꞌ, axo tzꞌaji, a dꞌa ebꞌ stzalaj Dios yedꞌoc chiꞌ scani. Palta a jun tic nabꞌan̈ejpaxi, lajan val icha bꞌaj sco nibꞌej sco yam icꞌ, palta max yamchajlaj cuuj.