Masanil tas ayn̈ej stiempoal
3
Masanil tas tzuji dꞌa yolyibꞌan̈qꞌuinal tic ayn̈ej stiempoal, ayn̈ej pax yorail.2 Ay bꞌaj tzꞌalji anima, ay pax bꞌaj scham ebꞌ. Ay bꞌaj ay avnubꞌ, ay pax bꞌaj stocꞌji qꞌue vaan tas avabꞌil.
3 Ay bꞌaj smiljicham anima, ay pax bꞌaj tzꞌan̈taj ebꞌ. Ay bꞌaj sjuchajem junoc tas, ay pax bꞌaj sbꞌochajqꞌuei.
4 Ay bꞌaj tzꞌoch oqꞌuel, ay pax bꞌaj tzꞌoch tzeej. Ay bꞌaj ay cuscꞌolal, ay pax bꞌaj ay tzalajcꞌolal.
5 Ay bꞌaj sjulchaj saclem qꞌuen qꞌueen, ay pax bꞌaj smolbꞌaj qꞌueen. Ay bꞌaj sco lacꞌlaj co bꞌa, ay pax bꞌaj maay.
6 Ay bꞌaj sco sayecꞌ junoc tas, ay pax bꞌaj sco yumeli. Ay bꞌaj sicꞌchajbꞌat junoc tas, ay pax bꞌaj syumchajeli.
7 Ay bꞌaj sn̈icꞌchajbꞌat junoc tas, ay pax bꞌaj stzꞌischaji. Ay bꞌaj numan tzon̈ aji, ay pax bꞌaj tzon̈ loloni.
8 Ay bꞌaj sco xajanej co bꞌa, ay pax bꞌaj sco chaclaj co bꞌa. Ay bꞌaj tzꞌoch oval, ay pax bꞌaj tzꞌoch juncꞌolal.
9 ¿Tas val scacꞌ yal a on̈ anima on̈ tic dꞌa jantac munlajel sco bꞌoꞌo? 10 Vojtac val jantac munlajel te ajaltac ix yacꞌ Dios co cꞌulej. 11 Te vachꞌ ix yutej Dios sbꞌoan masanil tastac, tato sbꞌo dꞌa scꞌual smoj sbꞌoi. Ix yacꞌ Dios co nibꞌej cojtacanel tastac ol ujoc dꞌa bꞌaqꞌuin̈, palta max yacꞌlaj nachajel cuuj sicꞌlabꞌil tastac van scꞌulani.
12 Ix vojtaquejeli to malaj junocxo tas te vachꞌ syal co cꞌulani, an̈ej to scacꞌ tzalajbꞌoc co cꞌool, scacꞌan co gana yedꞌ tastac syacꞌ Dios dꞌayon̈ yacbꞌan pitzan on̈. 13 An̈ej tzon̈ vaꞌi, scucꞌan aꞌ, scacꞌan tzalajbꞌoc co cꞌol dꞌa masanil tastac squicꞌ dꞌa co munlajel, yujto a Dios tzꞌacꞌan dꞌayon̈. 14 Vojtacpaxi to a masanil tastac ix sbꞌo Dios, ayn̈ejecꞌ dꞌa juneln̈ej. Malaj junoc tas syal yacꞌanoch xicul, ma syal yicꞌaneli. Icha chiꞌ ix yutejcan Dios yic vachꞌ tzon̈ och ejmelal dꞌay. 15 Masanil tastac ay ticnaic, aytaxon ecꞌ dꞌa pecaꞌ. Axo pax tas toto ol javoc, toxonton ay dꞌa pecaꞌ. An̈ejaꞌ juntzan̈ chiꞌ tzujixi, yujto a Dios tzꞌutan icha chiꞌ.
A tas man̈ smojoc sbꞌeybꞌalaji
16 Ix vilanpax tas tzꞌaj schꞌolbꞌitaj ebꞌ anima dꞌa yolyibꞌan̈qꞌuinal tic, smoj val to ay vachꞌil yedꞌ tojolal, palta an̈ej chucal ay. 17 Yuj chiꞌ tzin naꞌ icha tic: A Dios ol on̈ chꞌolbꞌitan a on̈ anima on̈ tic, vachꞌchom vachꞌ on̈, ma chuc on̈, yujto masanil tastac tzuji, ay scꞌual ol chꞌolbꞌitajoc.
18 Svalanpax yuj co bꞌeybꞌal a on̈ anima on̈ tic, to a Dios tzon̈ acꞌan proval, yic snachajel cuuj to lajan on̈ icha nocꞌ nocꞌ. 19 Val yel a on̈ anima on̈ tic yedꞌ nocꞌ nocꞌ chiꞌ, lajann̈ej tzꞌaj co chami, scham nocꞌ, tzon̈ champaxi. Lajann̈ej tzꞌaj quicꞌan quicꞌ yedꞌ nocꞌ, man̈ ecꞌbꞌaloclaj quelcꞌoch dꞌa yichan̈ nocꞌ, yujto malaj yelcꞌoch masanil. 20 Junn̈ej bꞌaj scꞌochcan co nivanil yedꞌ nocꞌ nocꞌ chiꞌ, yujto a dꞌa lum luum cotnac on̈, an̈ejtonaꞌ luumal ol ochcan co nivanil tic. 21 ¿Tom ay junoc mach man̈ ojtannacoc to a co pixan a on̈ anima on̈ tic sqꞌuecan dꞌa satchaan̈, axo sqꞌuinal nocꞌ nocꞌ a dꞌa sat lum tic satcanemi? 22 Ix nachajel vuuj to malaj junocxo tas vachꞌ co cꞌulani, an̈ejto scacꞌ tzalajbꞌoc co cꞌool yedꞌ tas squicꞌ dꞌa co munlajel, yujto icha chiꞌ yajcan dꞌa quibꞌan̈. ¿Tocval ayto mach tzꞌalan cabꞌi tas tzuji ayic chamnac on̈xo?