4
Ix in naancot yuj masanil tas man̈ vachꞌoc tzuji dꞌa yolyibꞌan̈qꞌuinal tic. Ix vilani to ay ebꞌ tzꞌixtaji, tzꞌocꞌ ebꞌ, palta malaj mach scolan ebꞌ, yujto a ebꞌ tzꞌixtan ebꞌ chiꞌ, aton ebꞌ ay yopisio. 2 Yuj chiꞌ ix in naꞌ to te vachꞌ yic ebꞌ chamnacxo dꞌa yichan̈ ebꞌ pitzanto. 3 Te vachꞌ yic ebꞌ manto alji dꞌa yichan̈ ebꞌ chamnac yedꞌ ebꞌ pitzan tic, yujto a ebꞌ manto alji chiꞌ, manto yil-laj chucal tzuji dꞌa yolyibꞌan̈qꞌuinal tic ebꞌ.4 Ix vilanpaxi to ay bꞌaj squixtej co bꞌa co munlaji yic sco nibꞌan nivan tzꞌaj quelcꞌoch yedꞌ tastac ay dꞌayon̈ dꞌa yichan̈ juntzan̈xo ebꞌ. Malaj yelcꞌoch bꞌaj squicꞌchaan̈ co bꞌa chiꞌ, yujto lajan val icha bꞌaj sco nibꞌej sco yam icꞌ, palta max yamchajlaj cuuj.
5 Ay bꞌaj tzꞌalji to malaj co pensar tato malaj tas sco cꞌulej, scacꞌcham co bꞌa yuj vejel. 6 Palta a in tic svalaꞌ to yelxo te vachꞌ vachꞌchom jabꞌn̈ej tas ay dꞌayon̈ tato tzalajcꞌolal caji, dꞌa yichan̈ pax munlajeln̈ej caji sco sayan co bꞌeyumal. Tato icha chiꞌ, lajan val icha bꞌaj sco nibꞌej sco yam icꞌ, palta max yamchajlaj cuuj.
7 Ix vilan junxo tas tzuji dꞌa yolyibꞌan̈qꞌuinal tic to malaj yelcꞌochi. 8 Ay mach schꞌocojn̈ej, malaj junoc yuninal, malaj yucꞌtac, palta malaj bꞌaj syicꞌ yip, max och vaan sayanecꞌ sbꞌeyumal, malaj bꞌaj syeccot snaꞌ icha tic: ¿Mach yuj tzin te munlaji? ¿Tas yuj svixtej in bꞌa? man̈ xchioc. A ebꞌ icha chiꞌ scꞌulej nabꞌan̈ej syixtej sbꞌa ebꞌ.
Tato junn̈ej scutej co bꞌa ay quip
9 Vachꞌ tato yaman smunlaj chavan̈oc anima dꞌa yichan̈ junoc mach to schꞌocoj smunlaji, yujto nivan tas syicꞌ ebꞌ dꞌa smunlajel chiꞌ. 10 Tato stelvi junoc, axo junxo chiꞌ squetzanxi qꞌue vaan. Palta tato a junoc anima schꞌocojn̈ej stelvi, malaj mach squetzan qꞌue vaan. 11 An̈ejtonaꞌ tato ay chavan̈oc anima junn̈ej svayi, sqꞌuixinalej sbꞌa ebꞌ, palta tato schꞌocoj junoc anima svayi, ¿tas tzꞌaj sqꞌuixnaji? 12 A junoc mach schꞌocoj, elan̈chamel tzꞌacꞌji ganar yuj junoc ajcꞌool, palta tato chavan̈ sbꞌey ebꞌ jun, syal stecꞌbꞌan sbꞌa ebꞌ. Ocxom junoc lasu oxeꞌ yaj spachꞌuchꞌaji, man̈ comonoc sdꞌin̈chaji.
13 Yelxo te vachꞌ yic junoc vin̈ quelem mebꞌaꞌ ay spensar, dꞌa yichan̈ pax junoc vin̈ rey icham vinacxo to malaj spensar, maxtzac schalaj yabꞌ razón. 14-15 Vachꞌchom mebꞌaꞌ vin̈ quelem chiꞌ ayic tzꞌelta vin̈ dꞌa preso, palta syal yoch vin̈ reyal. Ix vilanpaxi to masanil anima tzꞌalani to vachꞌ a vin̈ quelem chiꞌ tzꞌochcan reyal sqꞌuexuloc vin̈ icham vinac chiꞌ. 16 Vachꞌchom man̈ jantacoc sbꞌisul anima tzꞌacꞌanoch vin̈ quelem chiꞌ reyal, palta axo yic tzꞌecꞌ tiempo, jantac ebꞌ maxtzac tzalajlaj yedꞌ vin̈. A scacꞌan quip co sayan tas tzꞌaj stzalaj masanil ebꞌ anima quedꞌoc malaj yalani, lajan val icha bꞌaj sco nibꞌej sco yam icꞌ, palta max yamchajlaj cuuj.