Sco na val sicꞌlabꞌil yuj tas sco tacꞌvej
5
Ayic tzon̈ cꞌoch dꞌa stemplo Dios, yelxo te vachꞌ to sco maclej val cabꞌ tas tzꞌalchaji, sco bꞌeybꞌalanpaxi, dꞌa yichan̈ pax to sco nitzoch co bꞌa sco comon tacꞌvan junoc tas, icha scꞌulej ebꞌ malaj spensar, max snalaj ebꞌ tato chuc scꞌulej.2 Dꞌa sbꞌabꞌelal scham val co naani, ichato chiꞌ bꞌian sco tacꞌvan cacꞌan junoc tas dꞌa Dios, yujto a Dios chiꞌ a dꞌa satchaan̈ ayeqꞌui, a on̈xo tic a dꞌa sat lum tic ayon̈ eqꞌui. Yuj chiꞌ man̈ comonoc scalaꞌ. 3 Yujto ayic man̈ jantacoc tas sco naꞌa, tzon̈ chac vayichan yuuj. Axo yuj bꞌaj tzon̈ te loloni, ay comon lolonel malaj yalan scalaꞌ.
4 Ayic sco tacꞌvan junoc tas dꞌa Dios, mocabꞌ quiqꞌuecꞌ tiempo cacꞌani, yujto max tzalaj Dios yedꞌ ebꞌ scomon tacꞌvan junoc tas, yuj chiꞌ caqꞌuec tas sco tacꞌvej chiꞌ. 5 Más vachꞌ max co comon tacꞌvej co tiꞌoc, dꞌa yichan̈ pax to sco tacꞌvej, palta max co cꞌanabꞌajejlaj.
6 Mocabꞌ cacꞌoch co mul co comon tacꞌvan junoc tas, axo ta tzꞌaji ayic schaji yuj junoc mach ayoch dꞌa yibꞌan̈ schaani, scalani to satcꞌolal caji ayic ix co tacꞌvan chiꞌ. Mocabꞌ co tzuntzejcot yoval scꞌol Dios yuj tas sco tacꞌvej chiꞌ, yujto ay smay satanel tastac sco cꞌulej. 7 Yelxo te vachꞌ to ay yelcꞌoch Dios dꞌa yol co sat dꞌa yichan̈ pax to nivan tas sco tacꞌvej dꞌay.
A ebꞌ an̈ej dꞌa qꞌuen tumin syacꞌoch spensar
8 Mocabꞌ sat co cꞌol quilan yuj tas tzꞌaj yixtaj ebꞌ mebꞌaꞌ dꞌa co chon̈abꞌ, bꞌaj max cꞌanabꞌajaj tojolal, yujto a ebꞌ ay yopisio scolji ebꞌ yuj juntzan̈xo ebꞌ nivac yopisio. Axo ebꞌ chiꞌ scolji ebꞌ yuj juntzan̈xo ebꞌ yelxo nivan yopisio dꞌa yibꞌan̈ ebꞌ. 9 Yujto an̈ej vin̈ rey nivan yelcꞌoch yedꞌ yopisio dꞌa yibꞌan̈ juntzan̈xo ebꞌ vin̈ yajal, yuj chiꞌ yelxo val nivan tas syicꞌcan vin̈ dꞌa tas tzꞌel dꞌa sat lum luum tic.
10 Tato sco nibꞌej val och qꞌuen tumin, malaj bꞌaqꞌuin̈ slajvi co nibꞌan qꞌueen. An̈ejtonaꞌ tato sco nibꞌej tzon̈ och bꞌeyumal, malaj bꞌaqꞌuin̈ scalaꞌ to cꞌocbꞌilxo tas ay dꞌayon̈. Palta a jun chiꞌ man̈ pensaril. 11 Yujto ayic nivanxo tas ay dꞌayon̈, nivan pax slajvieli. An̈ej co ganar, ton̈ej squil yecꞌ qꞌuen tumin chiꞌ dꞌa yol co cꞌabꞌ. 12 Tato tzon̈ munlaji, taxon̈ej nivan tas sco vaꞌa mato jabꞌn̈ej, palta juncꞌolal tzon̈ vayi. Axo ebꞌ bꞌeyum jun, max vaylaj ebꞌ snaan yuj tastac ay dꞌay.
13 Ix vilanpaxi to ay val jun tas te cuscꞌolal dꞌa yolyibꞌan̈qꞌuinal tic: A val ebꞌ tzꞌoch val ilcꞌolal sayanecꞌ sbꞌeyumal, palta axo tzꞌaji a sbꞌeyumal ebꞌ chiꞌ sjuaneli. 14 Yujto ay bꞌaj syacꞌoch schon̈ ebꞌ, axo tzꞌaji a tzꞌicꞌancot dꞌa yibꞌan̈ ebꞌ, slajviel tastac ay dꞌa ebꞌ, man̈xalaj jabꞌoc tas vachꞌ syacꞌcan ebꞌ dꞌa ebꞌ yuninal. 15 Icha tzꞌaj calji dꞌa yolyibꞌan̈qꞌuinal tic, bꞌeran on̈ eli on̈ javi, axo yic tzon̈ meltzajxi malaj jabꞌoc tas squicꞌbꞌat quedꞌoc. 16 Aton jun tic te cuscꞌolal, icha tzꞌaj calji, icha pax chiꞌ tzꞌaj co meltzajxi. Malaj jabꞌoc tas squicꞌ dꞌa co munlajel squicꞌbꞌat quedꞌoc. 17 Ay bꞌaj ayic pitzan on̈ dꞌa yolyibꞌan̈qꞌuinal tic, dꞌa scal xivcꞌolal tzon̈ eqꞌui, dꞌa scal yaelal yedꞌ dꞌa scal cuscꞌolal.
18 An̈ej val jun tas vachꞌ ix vil dꞌa yolyibꞌan̈qꞌuinal tic to tzon̈ vaꞌi, scucꞌan aꞌ, scacꞌan tzalajbꞌoc co cꞌol yedꞌ tas squicꞌ dꞌa jantac co munlajel, dꞌa jabꞌ co qꞌuinal syacꞌ Dios, aton jabꞌ chiꞌ syacꞌ co cꞌulej dꞌa yolyibꞌan̈qꞌuinal tic. 19 Yedꞌ junxo tic, tato a Dios tzꞌacꞌan jantac co bꞌeyumal, syacꞌanpax co tzalajcꞌolal co vaꞌan tas squicꞌ dꞌa co munlajel yuj svachꞌcꞌolal. 20 Yacbꞌan a Dios tzꞌacꞌan co tzalajcꞌolal chiꞌ, max yal-laj coch ilcꞌolal yuj tas ol aj yecꞌ tiempo cuuj.