6
Ay jun tas sjavi dꞌa yibꞌan̈ ebꞌ anima dꞌa yolyibꞌan̈qꞌuinal tic to man̈ smojoc scꞌulaj svilaꞌ: 2 A Dios tzꞌacꞌan sbꞌeyumal junoc mach yedꞌ snivanil yelcꞌochi, ayxon̈ej tastac snibꞌej, palta max chajilaj yacꞌ tzalajbꞌoc scꞌol dꞌa smasanil juntzan̈ chiꞌ, chꞌocxo mach syacꞌ tzalajbꞌoc scꞌol yedꞌoc. A jun tic, ixtojbꞌail, man̈ smojoc. 3 Vachꞌchom a junoc vin̈ vinac ay 100-oc yuninal, nivan tiempo syil vin̈, palta tato max yacꞌ tzalajbꞌoc scꞌol vin̈ yedꞌ tas vachꞌ, tato chuclaj tzꞌaj smucchaj vin̈, a tzin naani to te vachꞌ yic junoc eqꞌueltiꞌ unin dꞌa yichan̈ jun vinac chiꞌ. 4 Vachꞌchom a junoc unin chiꞌ, ton̈ej tzꞌecꞌ dꞌa ichn̈ejtaꞌ, malaj bꞌaj sbꞌinaj jabꞌoc, 5 maj yil jabꞌoc saquilqꞌuinal, malaj jabꞌoc tas syojtaquejeli, vachꞌ yicoꞌ yujto syicꞌ yip, malaj tas snaꞌa. 6 A pax jun vinac chiꞌ jun, vachꞌchom ix ecꞌ chabꞌoc mil abꞌil, tato maj yacꞌ tzalajbꞌoc scꞌol yedꞌ tastac ay dꞌay, malaj yelcꞌochi, a dꞌa slajvubꞌ junn̈ej bꞌaj ol can ebꞌ dꞌa chamubꞌ.7 Masanil co munlajel sco bꞌoꞌo, an̈ej yoch yopisio dꞌa co nivanil, palta malaj bꞌaqꞌuin̈ tzon̈ och vaan co nibꞌan tas sco nibꞌej. 8 Man̈ vachꞌoc yic junoc anima jelan dꞌa yichan̈ junoc to malaj spensar tato an̈ejaꞌ mebꞌaꞌ jun anima jelan chiꞌ, vachꞌchom yojtac yicꞌan bꞌey sbꞌa yedꞌ yetanimail dꞌa svachꞌilal.
9 Yelxo vachꞌ tato jabꞌn̈ej tas ay dꞌayon̈, dꞌa yichan̈ pax ton̈ej sco te naubꞌtan̈ej coch bꞌeyumal. A tas sco naubꞌtan̈ej chiꞌ malaj yelcꞌochi, lajan val icha bꞌaj sco nibꞌej sco yam icꞌ, palta max yamchajlaj cuuj. 10 A tas ayecꞌ ticnaic, toxonton tzꞌalchaj dꞌa pecaꞌ. A on̈ anima on̈ tic ojtacabꞌil tas caji, nabꞌa anima on̈. Max yal-laj co telan co bꞌa yedꞌ Dios, yujto te ecꞌto yip dꞌayon̈. 11 Ay jun lolonel syal icha tic: Tato nivan lolonel scalaꞌ ayic sco telan co bꞌa, ay lolonel man̈xalaj yalan scalaꞌ. Malaj jabꞌoc tas vachꞌ squicꞌaꞌ ayic sco telan co bꞌa chiꞌ. 12 Malaj mach ojtannac tas junoc vachꞌ dꞌayon̈ anima on̈ tic yic tzon̈ ecꞌ jayeꞌ cꞌual dꞌa yolyibꞌan̈qꞌuinal tic, yujto a co qꞌuinal elan̈chamel tzꞌecꞌbꞌat icha en̈ul. Malaj junoc mach syal yalani tas ol ujoc dꞌa yolyibꞌan̈qꞌuinal tic ayic toxo ix on̈ chami.