Man̈ lajanoc jelanil yedꞌ man̈ pensaril
7
Vachꞌ tato vachꞌ co bꞌinaji, dꞌa yichan̈ pax to sucꞌuqꞌui co jabꞌ yedꞌ perfume.Vachꞌ jun cꞌu ayic tzon̈ chami, dꞌa yichan̈ pax jun cꞌu ayic tzon̈ alji.
2 Vachꞌ ayic tzon̈ bꞌatcan iloj acꞌval bꞌaj tzꞌoch chamel, dꞌa yichan̈ pax tzon̈ bꞌatcan iloj qꞌuin̈, yujto a chamel chiꞌ, quicn̈ej yaj co masanil. Vachꞌ tato sco naꞌ ayic pitzan on̈to.
3 Vachꞌ tato tzon̈ oqꞌui, dꞌa yichan̈ pax tzon̈ tzevaji, yujto vachꞌchom cuseltac yilji co sat, palta sbꞌo co pensar yuuj.
4 A ebꞌ n̈ican spensar sna ebꞌ yuj schamel, axo ebꞌ malaj spensar jun, an̈ej dꞌa qꞌuin̈ aybꞌat spensar ebꞌ.
5 Vachꞌ tato sco cha cabꞌ co cachnabꞌil syacꞌ junoc mach jelan spensar, dꞌa yichan̈ pax to tzon̈ alji vachꞌil yuj junoc mach malaj spensar.
6 Ayic scabꞌan yel yav junoc mach malaj spensar stzevaji, malaj jabꞌoc yelcꞌochi. Lajan val icha cabꞌan stzꞌitiljubꞌ teꞌ qꞌuiix stzꞌabꞌat yuj teꞌ cꞌacꞌ.
7 A qꞌuen tumin tzꞌacꞌji dꞌa elcꞌaltac, a qꞌuen tzꞌicꞌan yixtaxel spensar ebꞌ jelan. Lajan tzꞌajcan ebꞌ icha ebꞌ malaj spensar.
8 Ayic sbꞌoelcꞌoch junoc tas, te ay tzalajcꞌolal dꞌa yichan̈ ayic tzꞌel yich sbꞌoi.
Tato emnaquil scutej co bꞌa, te vachꞌ quic dꞌa yichan̈ bꞌaj squicꞌchaan̈ co bꞌa.
9 Mocabꞌ cꞌunoc scot coval, yujto a chichoncꞌolal chiꞌ yic ebꞌ malaj spensar.
10 Malajocabꞌ bꞌaqꞌuin̈ scalaꞌ to a tas ecꞌnacxo más vachꞌ. A jun chiꞌ, man̈ pensaril.
11 Tato jelan on̈, vachꞌ quic dꞌa yichan̈ ebꞌ anima scha smacbꞌen dꞌa yolyibꞌan̈qꞌuinal tic. 12 A jelanil chiꞌ te nivan yelcꞌoch dꞌa yichan̈ qꞌuen tumin, yujto a tzon̈ icꞌan bꞌey dꞌa juncꞌolal.
13 Scham val quilan tastac bꞌobꞌil yuj Dios: A tas coxo yajcan yuuj, malaj mach syal stojolbꞌitani. 14 Tato vachꞌ cajecꞌ squilaꞌ, smoj cacꞌan tzalajbꞌoc co cꞌool, palta tato man̈ vachꞌoc cajecꞌ squil jun, scham val co naani to a Dios tzꞌutan scha macan̈il, yic vachꞌ a on̈ chamelbꞌa anima caj tic, man̈ cojtacoc tas sco cha co bꞌa yedꞌoc.
15 A yedꞌ jabꞌ in qꞌuinal malaj yelcꞌoch tic, ay juntzan̈ tas ix vilaꞌ: Ay bꞌaj a ebꞌ anima vachꞌ spensar spet chami. Ay pax bꞌaj jun, a ebꞌ chuc spensar najtil tzꞌeqꞌui.
16 Yuj chiꞌ max on̈ ecꞌ dꞌa yibꞌan̈ co cꞌulan vachꞌil, max on̈ ecꞌ pax dꞌa yibꞌan̈ cacꞌanoch co bꞌa jelanil yic max co juel co bꞌa.
17 Mocabꞌ on̈ ecꞌ dꞌa yibꞌan̈ co te cꞌulan chucal. Mocabꞌ cacꞌpaxoch co bꞌa man̈ pensaril, yic max pet on̈ chami.
18 Sco yaꞌilej co bꞌa dꞌa chabꞌ bꞌeybꞌal tic, tato ay yelcꞌoch Dios dꞌayon̈, vachꞌ ol on̈ elcꞌoch yedꞌ juntzan̈ tic.
19 A junoc mach jelan, ecꞌalto nivan yelcꞌoch yuj sjelanil chiꞌ dꞌa yichan̈ lajun̈van̈oc ebꞌ ayoch yajalil dꞌa junoc chon̈abꞌ.
20 Palta malaj junoc on̈ te vachꞌ on̈ dꞌa yolyibꞌan̈qꞌuinal tic. Malaj junoc mach on̈ to max och co mul.
21 Mocabꞌ co cha cabꞌ masanil tas tzꞌalji, yic vachꞌ tato chuc syal ebꞌ co checabꞌ dꞌayon̈, man̈ yaoc scabꞌi, 22 yujto cojtac to ay bꞌaj chuc pax scal dꞌa junocxo mach.
Schꞌolbꞌitaj junoc tas dꞌa jelanil
23 Masanil juntzan̈ tic ix in chꞌolbꞌitej yedꞌ in jelanil, yujto ay val och dꞌa in pensar to jelan tzin ajelcꞌochi, palta max nachajel-laj vuuj. 24 Masanil tas tzuji max nachajel-laj vuuj, yujto ajaltac yojtacajeli, malaj mach snachajel yuuj.
25 Ix vacꞌ val och dꞌa in cꞌol in sayanecꞌ jelanil yic svojtaquejeli tas yaj smasanil. Ix nachajel vuuj to malaj co pensar tato sco cꞌulej chucal, quistal on̈ tato sco pitej co bꞌa.
26 Ay jun tas te chuc ix ilchaj vuj dꞌa yichan̈ chamel. Aton ebꞌ ix ix te ay smon smusan sat ebꞌ vin̈ vinac, maxtzac actajel ebꞌ vin̈ yuj ix. A vin̈ ay yelcꞌoch Dios dꞌa sat, max acꞌjilaj ganar vin̈ yuj ix, palta axo ebꞌ vin̈ scꞌulan chucal, cꞌun yacꞌji ganar ebꞌ vin̈.
27-28 Ayic ix vacꞌan vip vojtacanel juntzan̈ tic, a in svalel lolonel tic, ayto pax tas maj vojtaquejeli, palta ay jun tas ix vojtaquejel dꞌa scal juntzan̈ tic, tecan am junn̈ej vin̈ vinac ay yelcꞌoch dꞌa scal junoc mil vinac. Axo dꞌa scal ebꞌ ix ix, malaj junoc ix ay yelcꞌoch ix ilchaj vuuj. 29 An̈ej tas ix chax vuuj to a on̈ anima on̈ tic, vachꞌ ix on̈ ajcan sbꞌoan Dios, palta axo ix aji, ix quixtejel co bꞌa.