8
Te vachꞌ yic junoc mach jelan spensar, yujto syojtaquejel tas yaj yolyibꞌan̈qꞌuinal tic. A sjelanil chiꞌ a tzꞌacꞌan checlaj dꞌa sat, vachꞌchom to ovtaxon yilji, axo yuj sjelanil chiꞌ scheclaj svachꞌil scꞌol dꞌa sat chiꞌ.A tas tzꞌaj scꞌanabꞌajaj vin̈ rey
2 Co cꞌanabꞌajejec tas syal vin̈ rey, yujto icha chiꞌ ix cutej cacꞌan co tiꞌ dꞌa Dios. 3 Man̈ elan̈chameloc tzon̈ el dꞌa yichan̈ vin̈ rey chiꞌ, mocabꞌ co tecꞌbꞌejec co bꞌa calan quic dꞌa tas man̈ vachꞌoc dꞌa sat vin̈, yujto syaln̈ej scꞌulan vin̈ tas snibꞌej. 4 An̈ej vin̈ rey chiꞌ syal yalan slajvubꞌ junoc lolonel, malaj mach syal scꞌanbꞌan yabꞌi tas scꞌulej vin̈.
5 Tato sco cꞌanabꞌajej junoc checnabꞌil, malaj tas scot dꞌa quibꞌan̈. Tato ay co pensar, snachajel cuuj tas tiempoal ayon̈ eqꞌui, tas pax scutej co cꞌanabꞌajani. 6-7 Ay val stzolal yedꞌ scꞌual tas tzꞌaj co cꞌanabꞌajan juntzan̈ chiꞌ, palta ay val jun tas tzon̈ ixtaneli, yujto man̈ cojtacoc tas tzuji, malaj junoc mach syal yalan dꞌayon̈.
8 Malaj mach syal snitzan sqꞌuinal, malaj pax mach syal syamanoch vaan schamel. A ebꞌ soldado syal scꞌananel sbꞌa ebꞌ dꞌa scal oval, palta a dꞌa chamel chiꞌ, malaj mach syal yeli. A junoc mach chuc, max yal-laj scoljiel dꞌa yol scꞌabꞌ chamel yuj schucal.
Ay juntzan̈ malaj jabꞌoc yelcꞌochi
9 Ayic ix vacꞌanoch dꞌa in cꞌol vojtacaneli tastac tzuji dꞌa yolyibꞌan̈qꞌuinal tic, masanil juntzan̈ tic ix vilaꞌ. Ay bꞌaj ay ebꞌ ayoch yajalil dꞌa scal ebꞌ yetanimail, axo tzꞌaji a ebꞌ tzꞌixtanpax ebꞌ anima chiꞌ.
10 Ay bꞌaj ix vilpaxi to ayic smucchaj junoc vinac chuc spensar, vachꞌchom chuc ix yutej sbꞌa vin̈ dꞌa schon̈abꞌ, palta tzꞌicꞌjichaan̈ vin̈ yuj ebꞌ yetchon̈abꞌ chiꞌ. Axo pax ebꞌ anima scꞌanabꞌajan Dios, man̈xalaj mach snaancot ebꞌ dꞌa yol schon̈abꞌ bꞌaj tzijtum tas vachꞌ scꞌulejnaccani. A juntzan̈ tic, malaj sjolomal yaji. 11 Yujto man̈ elan̈chameloc tzꞌacꞌjioch syaelal ebꞌ scꞌulan chucal, yuj chiꞌ an̈ej chucal scꞌulej ebꞌ anima. 12 Vachꞌchom syalcan jun lolonel icha tic: A ebꞌ scꞌulan vachꞌil ay yelcꞌoch Dios dꞌa ebꞌ, vachꞌn̈ej tzꞌelcꞌoch ebꞌ. 13 Axo pax ebꞌ chuc malaj yelcꞌoch Dios dꞌay, chuc tzꞌelcꞌoch ebꞌ, quenn̈ej tiempo syil ebꞌ, xchi jun lolonel chiꞌ. Palta ix vilaꞌ to ay ebꞌ ste cꞌulan chucal, nivan tiempo syil ebꞌ. 14 A tas man̈ vachꞌoc svil dꞌa yolyibꞌan̈qꞌuinal tic, ay ebꞌ anima vachꞌ syutej sbꞌa, axo tzꞌaji, syabꞌ val syail ebꞌ, ichato te chuc ebꞌ. Axo pax ebꞌ te chuc jun, tzꞌicꞌjichaan̈ ebꞌ, ichato vachꞌ ebꞌ. A jun tic malaj sjolomal yedꞌnac.
15 Yuj chiꞌ svalaꞌ yacbꞌan ayon̈ecꞌ dꞌa yolyibꞌan̈qꞌuinal tic, smoj val tzon̈ vaꞌi, scucꞌan aꞌ, scacꞌan tzalajbꞌoc co cꞌool. Icha chiꞌ juncꞌolal tzon̈ eqꞌui vachꞌchom ya tzꞌaj co sayan va co bꞌa dꞌa co qꞌuinal syacꞌ Dios.
16 Yacbꞌan svacꞌ val och dꞌa in cꞌol vojtacaneli yedꞌ vilan pax tastac tzuji dꞌa yolyibꞌan̈qꞌuinal tic, ay bꞌaj max och in vayan̈ dꞌacꞌvalil in naan yuuj. 17 Axo ix nachajel vuuj jun to a masanil tas scꞌulej Dios yedꞌ tastac tzuji, max nachajel cuuj. Vachꞌchom scacꞌ quip cojtacaneli, palta malaj bꞌaqꞌuin̈ snachajel cuuj. Vachꞌchom a junoc mach jelan tzꞌalani to snachajel yuuj, palta val yel, malaj tas snachaji.