A tas smoj sco cꞌulej
9
Ayic ix vacꞌanoch dꞌa in cꞌol in chꞌolbꞌitan jun tic, ix nachajel vuuj to a tas scꞌulej ebꞌ vachꞌ yedꞌ ebꞌ jelan spensar, ayecꞌ dꞌa yol scꞌabꞌ Dios. Malaj junoc on̈ cojtac tas ay dꞌa quichan̈, tom ol on̈ xajanajoc, mato ol on̈ chacjoqueloc. 2 Axo tzꞌaji, vachꞌchom tojol co bꞌeybꞌal, mato man̈ tojoloc, vachꞌchom vachꞌ on̈, ma chuc on̈, vachꞌchom sco cꞌanabꞌajej, ma pit on̈, vachꞌchom scacꞌ co silabꞌ, mato max cacꞌaꞌ, vachꞌchom ay co mul, mato malaj co smul, vachꞌchom scacꞌ co tiꞌ dꞌa Dios, mato max cacꞌ co tiꞌ chiꞌ, palta lajann̈ej tas sjavi dꞌa quibꞌan̈.3 Ay jun tas chuclaj dꞌa scal masanil tas tzuji dꞌa yolyibꞌan̈qꞌuinal tic, aton bꞌaj junn̈ej tzon̈ sateli. A tas ayecꞌ dꞌa co pensar co masanil, an̈ej chucal yedꞌ man̈ pensaril, axo yic sjavi chamel dꞌa quibꞌan̈, tzon̈ sateli.
4 Yuj chiꞌ an̈ej yic pitzan on̈, ayto tas ayoch yipoc co cꞌool. Te nivan yelcꞌoch junoc nocꞌ tzꞌiꞌ pitzan dꞌa yichan̈ junoc nocꞌ chamnac choj. 5 Tato pitzan on̈, cojtac to ol on̈ chamoc, axo pax ebꞌ chamnacxo, man̈xalaj tas yojtac ebꞌ, man̈xalaj tas syal yacꞌchaj dꞌa ebꞌ, maxtzac nachajcot ebꞌ yuj ebꞌ anima. 6 A bꞌaj tzon̈ mucchaji, ataꞌ slajvican co xajanan co bꞌa, co chichoncꞌolal yedꞌ masanil chucal. Man̈xa bꞌaqꞌuin̈ ay calan quic dꞌa tas tzuji dꞌa yolyibꞌan̈qꞌuinal tic.
7 Yuj chiꞌ caqꞌuec tzalajbꞌoc co cꞌol co vaꞌi, cuqꞌuec aꞌ, yujto vachꞌ jun tic dꞌa yichan̈ Dios. 8 Sacocabꞌ co pichul scacꞌochi, vachꞌocabꞌ scutej co jixbꞌan co jolom. 9 Yujto tzapan jabꞌ co qꞌuinal syacꞌ Dios, yuj chiꞌ caqꞌuec tzalajbꞌoc co cꞌool junjun on̈ yedꞌ ebꞌ ix quetbꞌeyum xajanabꞌil cuuj. Aton chiꞌ tzꞌacꞌji spacoc dꞌayon̈ yuj Dios bꞌaj scabꞌ syail co munlaj dꞌa sat luum tic. 10 Masanil tas syal co cꞌulani, co cꞌulejec dꞌa smasanil co cꞌool, yujto a dꞌa campusante bꞌaj tzon̈ cꞌochcani, man̈xa munlajel, man̈xa tas syal co naani, man̈xa tas syal cojtacaneli, man̈xa pax jelanil.
A tas man̈ tojoloc scꞌulaji
11 Ay junxo tas svil dꞌa yolyibꞌan̈qꞌuinal tic: A ebꞌ toxon jelan sbꞌeyi, man̈ masaniloc ebꞌ tzꞌacꞌan ganar carela. Man̈ masaniloc ebꞌ jelan yacꞌan oval tzꞌacꞌan ganar oval. Man̈ masaniloc ebꞌ jelan spensar vachꞌ svaꞌi. Man̈ masaniloc ebꞌ te ay tas ojtannac tzꞌoch bꞌeyumal. Man̈ masaniloc ebꞌ cꞌaybꞌabꞌil tzꞌoch yopisio. Palta masanil mach tzꞌilchaj vachꞌil yedꞌ chucal yuuj. 12 An̈ejtonaꞌ a on̈ anima on̈ tic, man̈ cojtacoc janicꞌ tzon̈ chami. Icha tzꞌaj scan nocꞌ chay dꞌa yol chimpa, ma icha yic scan nocꞌ much dꞌa yol teꞌ yaal, icha chiꞌ caji, malaj tas naan cuuj sjavi jucnaj junoc tas dꞌa quibꞌan̈.
13 An̈ejtonaꞌ, ay jun tas ix vilaꞌ, nivan yelcꞌoch jun cꞌaybꞌubꞌal ix vicꞌcan dꞌay: 14 Ix vil jun yuneꞌ chon̈abꞌ quenn̈ej anima cajan dꞌay, axo ix aji ay jun vin̈ rey te nivan sbꞌisul soldado, ix oymaj vin̈ yedꞌ ebꞌ soldado chiꞌ dꞌa spatictac jun yuneꞌ chon̈abꞌ chiꞌ yic syacꞌan oval ebꞌ yedꞌoc. 15 Palta a dꞌa jun yuneꞌ chon̈abꞌ chiꞌ, ay jun vin̈ mebꞌaꞌ cajan taꞌ, te jelan spensar vin̈. Ix yal scolan jun chon̈abꞌ chiꞌ vin̈ yuj sjelanil chiꞌ, palta malaj mach ix naancot vin̈.
16 Yuj chiꞌ vachꞌchom malaj yelcꞌoch sjelanil spensar jun vin̈ mebꞌaꞌ chiꞌ dꞌa ebꞌ anima, maj scha yabꞌ ebꞌ tas syal vin̈, palta a in tic svalaꞌ to ay yelcꞌoch junoc mach n̈ican spensar dꞌa yichan̈ junoc mach te vinac syutej sbꞌa.
17 Te vachꞌ cabꞌan slolonel junoc mach ay pensar to cꞌununi sloloni, dꞌa yichan̈ pax cabꞌan yel yav junoc sreyal ebꞌ malaj spensar.
18 Te nivan yelcꞌoch jelanil dꞌa yichan̈ yamcꞌabꞌ yic oval. Yujn̈ej jabꞌoc tas chuclaj sco cꞌulej, te nivan tas tzꞌixtaxeli.