10
Yujn̈ej junoc nocꞌ chamnac yax aꞌay tzꞌixtaxbꞌat sjabꞌ perfume te vachꞌ. Icha pax chiꞌ junoc mach bꞌinajnac yuj sjelanil, tato scꞌulej jabꞌoc chucal, satel sbꞌinajnaquil chiꞌ.2 A tas snibꞌej junoc mach n̈ican spensar to a tas vachꞌ bꞌaj syacꞌoch sbꞌa. Axo pax tas snibꞌej junoc malaj spensar jun, an̈ej dꞌa chucal bꞌaj syacꞌoch sbꞌa.
3 A ebꞌ malaj spensar, a tas scꞌulej ebꞌ schꞌoxaneli to malaj spensar ebꞌ. Elan̈chamel scheclaj ebꞌ yuuj.
4 Tato a junoc yajal scot yoval dꞌayon̈ yuj co paltail, mocabꞌ elan̈chameloc sco cꞌanel co bꞌa dꞌa copisio. Tato emnaquil scutej co bꞌa, tzon̈ acꞌji nivancꞌolal vachꞌchom nivan co paltail chiꞌ.
5 Ay val tas man̈ smojoc tzuji dꞌa yolyibꞌan̈qꞌuinal tic, aton tas tzꞌel scꞌulan ebꞌ yajal. 6 Yujto a dꞌa ebꞌ malaj spensar tzꞌacꞌji junoc opisio nivan yelcꞌochi, axo pax dꞌa ebꞌ smoj yoch yajalil jun, a junoc comon opisio tzꞌacꞌji. 7 Ix vilaꞌ to a ebꞌ checabꞌ yaji, yibꞌan̈ chejn̈ej tzꞌecꞌ ebꞌ. Axo pax ebꞌ nivac vinac jun, a dꞌa yoc ebꞌ sbꞌeyi, ichato checabꞌ yaj ebꞌ.
8 A ebꞌ sbꞌoan junoc nivan jul, ay smay sbꞌat ebꞌ dꞌa yool. A ebꞌ sjuanel junoc muro, ay smay schiji ebꞌ yuj nocꞌ chan.
9 A ebꞌ stzeyan qꞌuen qꞌueen, ay smay slajvi ebꞌ yuj qꞌueen. Axo ebꞌ spojvi cꞌatzitz, ay smay xican sbꞌa ebꞌ.
10 Ayic tzꞌem ye qꞌuen chꞌacabꞌ, axo yic sco cꞌanan qꞌueen yovalil scacꞌ val quip co dꞌabꞌanoch qꞌueen, yuj chiꞌ más vachꞌ sco n̈icxiqꞌue ye qꞌueen. Tato jelan on̈ jun, elan̈chamel sco naꞌ tas tzon̈ aji.
11 ¿Tasto yalan junoc mach ojtannac smontan nocꞌ chan, tato toxo ix chiji yuj nocꞌ?
12 Tato tzon̈ lolon yedꞌ jelanil, vachꞌ tzꞌalchaj dꞌayon̈. Tato tzon̈ lolon yedꞌ co man̈ pensaril jun, munil squicꞌcot dꞌa quibꞌan̈.
13 Ayic syamanoch slolon junoc malaj spensar, a comon lolonel syalaꞌ, axo yic slajvi slolon chiꞌ, ichato malaj jun tas syal chiꞌ, 14 max cꞌunbꞌi ste loloni.
Malaj mach syal yalan tas toto ol ujoc.
15 A ebꞌ malaj spensar, smacꞌ cꞌunbꞌoc sbꞌa ebꞌ smunlaji, maxtzac nachaj yuj ebꞌ bꞌaj ay sbꞌeal schon̈abꞌ.
16 Obꞌiltac junoc nación to a junoc mach tzapanto spensar ayoch sreyaloc, a na an̈ej iloj qꞌuin̈ syacꞌ ebꞌ yichamtac vinaquil.
17 Te vachꞌ yic junoc nación tato a junoc mach jelan spensar ayoch sreyaloc, a na ebꞌ yichamtac vinaquil sva ebꞌ dꞌa yorail yic tzꞌoch yip ebꞌ, man̈oclaj dꞌa uqꞌuel an̈ sbꞌatcan ebꞌ.
18 A ebꞌ chꞌaan scꞌool snipan yibꞌan̈ spat, tzꞌecꞌ tzꞌuj dꞌa ebꞌ, axo tzꞌaji, tzꞌem lan̈naj spat ebꞌ chiꞌ dꞌa yibꞌan̈.
19 A qꞌuin̈ stzalajbꞌi co cꞌool yuuj, tzon̈ tzalaj pax yuj tas scuqꞌuej, palta a juntzan̈ tic tumin snibꞌej.
20 Mocabꞌ calec specal vin̈ rey, mocabꞌ ecꞌ dꞌa co pensar calani. Mocabꞌ cal chucal dꞌa ebꞌ bꞌeyum, vachꞌchom co chꞌocoj ayon̈ecꞌ dꞌa co pat, yujto jabꞌjabꞌil tzꞌabꞌchaji, ichato a nocꞌ much tzꞌicꞌanbꞌati scꞌoch dꞌa vin̈ rey chiꞌ.