11
Elbꞌenocabꞌ tastac cuuj, yujto ay jun cꞌual ol co cha spac.2 A tastac ay dꞌayon̈, vachꞌ sco pucbꞌat dꞌa ebꞌ malaj yicoꞌ, yujto man̈ cojtacoc talaj ay junoc chucal sjavi dꞌa quibꞌan̈ dꞌa yolyibꞌan̈qꞌuinal tic.
3 Tato stelvi junoc te teꞌ, yalxon̈ej bꞌaj sbꞌat teꞌ, scann̈ej teꞌ bꞌaj tzꞌem juan chiꞌ. Tato qꞌuicꞌ yilji asun, van scot n̈abꞌ syal chiꞌ.
4 Tato scacꞌoch co chum chajtil yilji tiempo bꞌaj ayon̈eqꞌui, malaj bꞌaqꞌuin̈ tzon̈ avalvi, malaj pax bꞌaqꞌuin̈ sco mol sat cavbꞌen chiꞌ.
5 Man̈ cojtacoc bꞌaj scot icꞌ, man̈ cojtacocpaxi tas tzꞌaj sqꞌuibꞌ junoc neneꞌ unin dꞌa yol scꞌol snun, ichaton chiꞌ man̈ cojtacoc tastac scꞌulej Dios, aton ix bꞌoan masanil tas.
6 Cavejec co bꞌabꞌel avbꞌen, scavan pax tzacꞌanilto tzꞌochi, yujto man̈ cojtacoc mach junoc macan̈ vachꞌ tzꞌaji, tom a bꞌabꞌel chiꞌ, mato a tzacꞌan chiꞌ, mato syacꞌ scha macan̈il jun.
7 Te vachꞌ quilan saquilqꞌuinal, vachꞌ quilan pax yoc cꞌu. 8 Vachꞌchom tzijtum abꞌil squilaꞌ, palta scacꞌ quip cacꞌan tzalajbꞌoc co cꞌool. Scham val co naani to nivan tiempo tzon̈ can dꞌa campusante, man̈xa tas scacꞌ ganar taꞌ, man̈xalaj yelcꞌochi.
A razón dꞌa ebꞌ quelemtac
9 Ex quelemtac yedꞌ ex cobꞌestac, tzalajan̈ec yacbꞌan steton eyip. Aqꞌuec tzalajbꞌoc e cꞌool yedꞌ tas vachꞌ yacbꞌan syal eyuuj. Ixiquec bꞌaj tze nibꞌej tzex bꞌati, cꞌulejec tas tze nibꞌej tze cꞌulej, palta bꞌian scham val e naani to ol ex schꞌolbꞌitej Dios yuj tastac tze cꞌulej chiꞌ. 10 Iqꞌuequel juntzan̈ tas tze naubꞌtan̈ej dꞌa e pensar, man̈ ex och ilcꞌolal yuj junoc yaelal dꞌa e nivanil, yujto a jabꞌ stiempoal e quelemal e cobꞌesal, malaj yelcꞌochi, junn̈ej rato tzꞌecꞌbꞌati.