12
Yacbꞌan unin animaexto, naeccot Dios e bꞌoumal, yacbꞌan mantzac eyabꞌ syail yuj icham animail. Yujto ay jun tiempoal ol eyal icha tic: Man̈xa svachꞌil cajecꞌ scabꞌi, xe chama.* 2 Naeccot Dios chiꞌ ticnaic yacbꞌan tzato yal eyilan yoc cꞌu, yoc qꞌuen uj yedꞌ yoc qꞌuen cꞌanal, yic mantzac syamoch ste javi yaelal dꞌayex. 3 Yujto ay jun cꞌual a e cꞌabꞌ tzex colan ticnaic, toxon̈ej ol luclonoc, axo eyoc te tecꞌan, ol el yip. Man̈xapaxlaj qꞌuen eye bꞌaj ol yal e cachꞌan e vael, ol ixtaxpax yol e sat. 4 Ayic ol javoc jun tiempoal chiꞌ dꞌa eyibꞌan̈, man̈xo ol yal-laj eyabꞌan tastac scꞌan̈ dꞌa yoltac bꞌe, man̈xo ol eyabꞌpaxlaj scꞌan̈ qꞌuen chaꞌ. Pitzan ex xo ayic tzꞌocꞌ nocꞌ much ayic ayto scꞌanaꞌ, man̈xo ol eyabꞌ yoch bꞌit dꞌa e tzꞌey. 5 Ol ex xiv e qꞌue dꞌa junoc chaan̈, ayxo smay eyecꞌ dꞌa yoltac bꞌe.Ol syamoch sacbꞌi xil e jolom, tevelxon̈ej ol ex ecꞌ machaljoc, man̈xa pax tas ol e naꞌ dꞌa eyetbꞌeyum, yujto vanxo e bꞌatcan dꞌa e cajnubꞌ dꞌa campusante dꞌa juneln̈ej. A ebꞌ anima dꞌa yoltac bꞌe, ol laj ocꞌ ebꞌ yuj e chamel.
6 Co naeccot jun Dios on̈ bꞌoani, yujto ay jun cꞌual ol lajvoccꞌoch co qꞌuinal, icha junoc candil nabꞌa oro spoji ayic sdꞌin̈chaj scatenail nabꞌa plata bꞌaj chinanqꞌuei. Mato icha tzꞌaj spojbꞌat lum chꞌubꞌ dꞌa stiꞌ a aꞌ, ma icha tzꞌaj spoj qꞌuen tzꞌecꞌ surson bꞌaj stocꞌjiqꞌueta a aꞌ dꞌa yol jul. 7 Ayic slajvicꞌoch co nivanil tic, smeltzajxicanoch pococal dꞌa sat lum tic, ichataxon yaj dꞌa yalan̈taxo. Axo co pixan sqꞌuexcan dꞌa Dios, yujto aꞌ acꞌjinacoch dꞌayon̈.
8 A in alum in el lolonel tic svalanxi junelxo: Masanil juntzan̈ tic, malaj sjolomal yaji, malaj yelcꞌochi.
A juntzan̈ slajvubꞌ lolonel tzꞌaljicani
9 A val yuj in jelanil, man̈ jantacoc tas vachꞌ ix vacꞌ yojtaquejel ebꞌ vetanimail. An̈ejtonaꞌ jantac pax juntzan̈ lolonel ix in sicꞌcani, ix lajvi chiꞌ ix in chꞌolbꞌitaneli, ix vacꞌanoch dꞌa stzolal. 10 Ix in say val lolonel to vachꞌn̈ej schaan sbꞌa to yel, yic tzin tzꞌibꞌejcan icha val smojal.
11 A tastac syal ebꞌ jelan, lajan val icha junoc teclabꞌ jay sn̈iꞌ stecjioch dꞌa nocꞌ vacax, axo yic toxo ix molchaj juntzan̈ lolonel chiꞌ, lajan val icha teꞌ estaca tzatz yaj smacꞌchajemi. A juntzan̈ lolonel chiꞌ a Dios Quilumal, aꞌ ix acꞌan dꞌayon̈. 12 Ex unin anima, scham val eyilani, man̈ comonoc tzeyacꞌoch e bꞌa dꞌa junocxo comon lolonel, yujto a tzꞌibꞌoj uum malaj slajvubꞌ, an̈ejtonaꞌ tato te ay tas sco cꞌaybꞌej dꞌay, tzon̈ tzactzajqꞌue yuuj.
13 Icha tic tzꞌaj slajvican juntzan̈ lolonel tic. Ix alchajcan smasanil. Ayocabꞌ yelcꞌoch Dios dꞌayon̈, co cꞌanabꞌajejec masanil schecnabꞌil, yujto a jun chiꞌ yovalil sco cꞌulej. 14 Yujto a Dios ol chꞌolbꞌitan masanil tastac sco cꞌulej, tato vachꞌ, mato chuclaj, vachꞌchom elcꞌaltac ix laj co cꞌulej.