A slolonel vin̈aj rey Lemuel
31
A slolonel vin̈aj rey Lemuel, aton bꞌaj ix cꞌaybꞌaj vin̈ yuj ix snun. Ix yalan vin̈ icha tic: A ix in nun alannac dꞌayin icha tic:2 Ach vuneꞌ, a Dios ix ach acꞌan dꞌayin yuj spacoc tas ix in cꞌan dꞌay, ¿tas val junocxo vachꞌ ol val dꞌayach?
3 Man̈ a juel a bꞌa yuj ebꞌ ix ix, yujto yuj ebꞌ ix ix chiꞌ, man̈ jantacoc ebꞌ rey sjuvieli.
4 Ach Lemuel, man̈ vachꞌoc tato syucꞌ an̈ an̈ ebꞌ yajal,
5 yujto yuj an̈ an̈ chiꞌ sbꞌat satcꞌolal ley yuj ebꞌ, axo yixtan ebꞌ anima emnaquil ebꞌ.
6 Yucꞌocabꞌ an̈ ebꞌ ayoch dꞌa syaelal. Yucꞌocabꞌ an̈ an̈ te ov, ebꞌ te ayoch dꞌa ilcꞌolal.
7 Yucꞌocabꞌ an̈ ebꞌ yic vachꞌ maxtzac snacot smebꞌail ebꞌ yedꞌ syaelal chiꞌ.
8 Al yuj ebꞌ max ujilaj yalan sbꞌa dꞌa ebꞌ yajal. Col ebꞌ malaj junoc mach scolani.
9 Acꞌ ip a bꞌoan yaj ebꞌ dꞌa stojolal, col ebꞌ te ilbꞌajcꞌool yedꞌ ebꞌ emnaquil, xchi ix in nun chiꞌ dꞌayin, xchi vin̈aj Lemuel chiꞌ.
A ix ix te ay spensar
10 A junoc ix ix te ay spensar, man̈ comonoc tzꞌilchaj ix, yujto ecꞌto yelcꞌoch ix dꞌa yichan̈ qꞌuen qꞌueen caro stojol.
11 A ix ayoch yipoc scꞌool vin̈ yetbꞌeyum, malaj junoc tas syacꞌ palta dꞌa vin̈.
12 Tzalajcꞌolal yaj vin̈ yetbꞌeyum ix chiꞌ yuuj dꞌa masanil tiempo.
13 Sbꞌat ix manoj lana yedꞌ lino, yedꞌ smasanil scꞌool ix smunlaj yedꞌ juntzan̈ chiꞌ.
14 Icha junoc teꞌ barco sbꞌat dꞌa najat yicꞌcot tastac, icha chiꞌ yaj ix, sbꞌat ix yicꞌcot tastac tzꞌoch yuuj.
15 Ayto scꞌanaꞌ sqꞌue vaan ix, tzꞌoch ijan ix yacꞌan va vin̈ yetbꞌeyum yedꞌ ebꞌ yuneꞌ yedꞌ pax ebꞌ ix smajan.
16 Sbꞌat ix yil junoc luum yic smanan ix, axo qꞌuen tumin syacꞌ ganar ix, a qꞌuen syacꞌlabꞌej ix yavan teꞌ uva dꞌa sat jun luum chiꞌ.
17 Smunlaj val ix dꞌa smasanil scꞌool.
18 Scham val yilan ix tas tzꞌaj sbꞌey schon̈. Cꞌual dꞌacꞌval smunlaj ix.
19 Yedꞌ scꞌabꞌ ix sbꞌo schꞌal yic schꞌalvi.
20 Naann̈ej ebꞌ mebꞌaꞌ yedꞌ ebꞌ ayoch dꞌa ilcꞌolal yuj ix.
21 Max yacꞌlaj pensar ix yuj masanil ebꞌ ay dꞌa yol spat ayic te ay siic, yujto masanil ebꞌ, te vachꞌ spichul ebꞌ ayochi.
22 A ix sbꞌoan scꞌuꞌ vachꞌ. A cꞌapac cꞌapac vachꞌ syacꞌoch ix spichuloc.
23 A vin̈ yetbꞌeyum ix chiꞌ, ojtacabꞌil vin̈ dꞌa scal ebꞌ vin̈ nivac vinac dꞌa yol schon̈abꞌ, ayoch vin̈ stzꞌacubꞌoc ebꞌ nivac vinac yaj dꞌa yol schon̈abꞌ chiꞌ.
24 Sbꞌo pichul ix, sbꞌo pax tzecꞌul ix, schon̈an ix dꞌa ebꞌ chon̈um cꞌapac.
25 Te tecꞌan spensar ix, te ay yelcꞌoch ix dꞌa yol sat ebꞌ yetanimail. Max yacꞌlaj pensar ix yuj tas tzꞌoch yuj qꞌuicꞌan.
26 Dꞌa val jelanil slolon ix, yedꞌ smasanil scꞌol ix syacꞌ cꞌaybꞌubꞌal.
27 Ayn̈ejoch ix yilani tas tzꞌaj sbꞌey masanil tastac ay dꞌa spat, man̈ ton̈ejoc sbꞌalecꞌ tiempo ix.
28 A ebꞌ yuneꞌ ix yedꞌ vin̈ yetbꞌeyum, syal vachꞌ lolonel ebꞌ dꞌa ix, syalan ebꞌ icha tic:
29 Man̈ jantacoc ebꞌ ix ix vachꞌ sbꞌeybꞌal, palta a achn̈ej te vachꞌ a bꞌeybꞌal dꞌa yichan̈ ebꞌ ix smasanil, xchi ebꞌ dꞌa ix.
30 A svachꞌil yilji snivanil junoc ix ix, ay bꞌaj ton̈ej tzon̈ smontej. Man̈ jantacoc svachꞌil yilji sat ix, palta junn̈ej rato sqꞌuexmaj yilji, axo ix ix ay yelcꞌoch Jehová dꞌa yol sat, smojton val nivan yelcꞌoch ix.
31 Alec vachꞌ lolonel yuj ix dꞌa yichan̈ masanil chon̈abꞌ. Aljocabꞌ ix vachꞌil yuj masanil tastac scꞌulej.