A slolonel vin̈aj Agur
30
A slolonel vin̈aj Agur, yuninal vin̈aj Jaqué, nivan yelcꞌoch tas syalaꞌ. A vin̈aj Agur chiꞌ, ix lolon vin̈ dꞌa vin̈aj Itiel yedꞌ dꞌa vin̈aj Ucal, ix yalan vin̈ icha tic:2 A in tic, yelxo malaj in pensar dꞌa yichan̈ masanil ebꞌ vetanimail, man̈ lajanoc in pensar icha spensar ebꞌ.
3 Malaj jabꞌoc in jelanil, man̈ vojtacoclaj jabꞌoc tas yaj Dios Axon̈ejochi.
4 ¿Mach val junoc ix xidꞌqꞌue dꞌa satchaan̈ ix emixta? ¿Mach junoc syal syamanoch vaan icꞌ dꞌa yol scꞌabꞌ? ¿Mach junoc syal spichanoch aꞌ mar dꞌa yol xotil? ¿Mach ix acꞌanem stzꞌacan̈il lum luum? Alec sbꞌi dꞌayin, tato eyojtac yedꞌ tas sbꞌi yuninal.
5 A Dios stan̈van ebꞌ syacꞌoch scꞌool dꞌay, masanil stiꞌ yacꞌnaccani, smojton cacꞌanoch yipoc co cꞌool.
6 Man̈ eyacꞌoch xicul tastac yalnaccani, ta maay, ol ex tumaj yuuj, axo scheclaji to tzeyesej.
7 Chabꞌn̈ej tas tzin cꞌan dꞌayach Mamin Jehová: A tas tzin cꞌan tic, acꞌ dꞌayin yacbꞌan mantzac in chami.
8 Man̈ a cha vesej, man̈ a cha vacꞌ chucal dꞌa anima. Man̈ in acꞌoch dꞌa bꞌeyumal, maval dꞌa mebꞌail. An̈ej tastac yovalil tzꞌoch vuuj dꞌa junjun cꞌu, aꞌ tzacꞌ dꞌayin.
9 Tato man̈xo jantacoc tas tzꞌaj dꞌayin, ach bꞌat talaj satcꞌolal vuuj, axo ol valanqꞌuei to man̈ ach vojtacoc. Tato malaj pax tas tzꞌaj dꞌayin, in bꞌat talaj elcꞌal. Vuuj talaj tzꞌalchaj chucal dꞌayach.
10 Man̈ eyal chucal lolonel dꞌa junoc checabꞌ dꞌa yichan̈ spatrón, ta maay, ex scatabꞌej talaj jun checabꞌ chiꞌ, axo ol ajoc, ol eyabꞌ syail yuuj.
11 Ay mach syal chucal lolonel dꞌa smam, an̈ejtonaꞌ max yalpax jabꞌoc vachꞌ lolonel dꞌa snun.
12 Ay mach snaani to malaj jabꞌoc smul, vachꞌchom manto sbꞌoxilaj sbꞌa dꞌa yichan̈ Dios yuj schucal.
13 Ay ebꞌ te nivan yelcꞌoch snaani, syicꞌanchaan̈ sbꞌa ebꞌ dꞌa yichan̈ juntzan̈xo.
14 Ay ebꞌ malaj jabꞌoc yoqꞌuelcꞌolal dꞌa ebꞌ mebꞌaꞌ, syixtej val ebꞌ mebꞌaꞌ chiꞌ ebꞌ, syicꞌanpaxecꞌ ebꞌ tastac ay dꞌa ebꞌ.
15 Ay chavan̈ yuneꞌ nocꞌ ucꞌumel chicꞌ, an̈ej ucꞌoj chicꞌ syacꞌ nocꞌ. A nocꞌ chiꞌ lajan nocꞌ yedꞌ chan̈eꞌ tastac max och vaan snibꞌani:
16 Aton chamel, ix ix max unevilaj, lum luum malaj yal sat yedꞌ pax teꞌ cꞌacꞌ max och vaan sn̈usantzꞌa teꞌ cꞌatzitz.
17 A ebꞌ spatiquejcanel smam yedꞌ ebꞌ max cꞌanabꞌajan snun, smojton val yicꞌchajqꞌueta yol sat ebꞌ yuj nocꞌ joj, axo nocꞌ ostoc schianbꞌat ebꞌ.
18 Ay chan̈eꞌ tastac sat in cꞌool vilani, max nachajpaxel-laj vuuj:
19 A tas tzꞌaj yecꞌ jen̈en̈oc nocꞌ chꞌacbꞌa dꞌa satchaan̈, a tas tzꞌaj yecꞌ bꞌacꞌacꞌoc nocꞌ chan dꞌa sat qꞌuen tenam, a tas tzꞌaj sbꞌey teꞌ barco dꞌa yibꞌan̈ aꞌ mar yedꞌ pax tas tzꞌaj smontan sbꞌa vin̈ vinac yedꞌ ix ix.
20 Ste satbꞌatpax in cꞌool vilan tas syutej sbꞌa jun ix ix ayxo yetbꞌeyum, ayic tzꞌoch ix dꞌa ajmulal. Smulan ix, slajvi chiꞌ sbꞌicanel sbꞌa ix, syalan ix: Tocval ay chucal tzin cꞌulej, xchi ix.
21 Ay chan̈ macan̈ ebꞌ anima max techajlaj sbꞌeybꞌal cuuj, axon̈ej ebꞌ tzꞌalchaj dꞌa yol schon̈abꞌ bꞌaj cajan:
22 Junoc checabꞌ tzꞌoch reyal, junoc malaj spensar to man̈ jantacoc tas svaꞌa,
23 junoc ix ix chacbꞌilel tzꞌoch yetbꞌeyum yedꞌ pax junoc ix criada tzꞌochcan sqꞌuexuloc ix spatrona.
24 Ay chan̈ macan̈ nocꞌ cotac nocꞌ dꞌa sat lum tic, ecꞌalto spensar nocꞌ dꞌa yichan̈ ebꞌ jelan:
25 Aton nocꞌ sanich, malaj yip nocꞌ, palta smolbꞌejcan svael nocꞌ dꞌa stiempoal varesma.
26 Nocꞌ chich, malaj yip nocꞌ, palta cajan nocꞌ bꞌaj ay yolaniltac qꞌuen qꞌueen.
27 Nocꞌ cꞌulubꞌ, malaj yajalil nocꞌ tzꞌilani, palta dꞌa stzolal tzꞌaj sbꞌey nocꞌ,
28 yedꞌ pax nocꞌ patix, syal co yaman nocꞌ, palta tzꞌochcꞌoch nocꞌ bꞌaj ay ebꞌ rey.
29 Ay ox macan̈ nocꞌ nocꞌ te acꞌumtac syutej sbꞌeyi yedꞌ pax junxo nocꞌ syicꞌ val chaan̈ sbꞌa:
30 Aton nocꞌ choj, yelxo ay smay nocꞌ, malaj bꞌaj tzꞌel lemnaj nocꞌ dꞌa anima yedꞌ dꞌa junocxo tasi.
31 Nocꞌ ajtzoꞌ caxlan̈, acꞌumtac sbꞌey nocꞌ, nocꞌ mam chiva, te acꞌumtac pax syutej sbꞌa nocꞌ. An̈ejaꞌ pax junoc rey syicꞌchaan̈ sbꞌa, ayic tzꞌecꞌ dꞌa yichan̈ ebꞌ soldado.
32 Tato yuj man̈ pensaril tzeyicꞌchaan̈ e bꞌa, tze naan e cꞌulej tastac man̈ vachꞌoc, aqꞌuecoch e cꞌabꞌ dꞌa yalan̈ e tiꞌ tze naanel juntzan̈ ol val tic:
33 Tato sicꞌlabꞌil sjuytaj nocꞌ lech, tzꞌelta mantequilla, tato tze bꞌan e n̈iꞌ, scot schiqꞌuil, tato tze tzuntzejcot yoval junoc eyetanimail, ovalxo tzꞌaj slajvi, xchi vin̈aj Agur.