29
A ebꞌ pit syutej sbꞌa ayic tzꞌacꞌji scachnabꞌil ebꞌ, elan̈chamel satel ebꞌ, maxtzacxo yal-laj scolan sbꞌa ebꞌ.2 Ayic tzꞌoch ebꞌ vachꞌ spensar dꞌa yopisio, ste tzalaj ebꞌ anima. Axo tato a ebꞌ chuc tzꞌoch yajalil jun, ste cus chaan̈ ebꞌ anima yuj ebꞌ.
3 A ebꞌ uninabꞌil aj pensar, syacꞌ tzalajbꞌoc scꞌool smam snun ebꞌ. Axo pax ebꞌ tzꞌecꞌ dꞌa spatic ebꞌ ix ajmul ix jun, slajviel sbꞌeyumal ebꞌ smasanil.
4 A ebꞌ rey schꞌolbꞌitan junoc tas dꞌa stojolal, te vachꞌ yaj schon̈abꞌ ebꞌ. Axo pax ebꞌ rey an̈ej tumin scꞌanel jun, satel schon̈abꞌ ebꞌ chiꞌ yuuj.
5 A ebꞌ stzꞌac yal vachꞌ lolonel dꞌa ebꞌ yamigo, van yacꞌanem syaalil ebꞌ yamigo ebꞌ chiꞌ.
6 A ebꞌ chuc scꞌulej, icha yaj chꞌan̈ yaal yajoch schucal ebꞌ chiꞌ dꞌay, palta a ebꞌ vachꞌ spensar, ay tzalajcꞌolal yedꞌ juncꞌolal dꞌa ebꞌ.
7 A ebꞌ tojol spensar, a tas snibꞌej ebꞌ to vachꞌ tzꞌaj sbꞌo yaj yoval ebꞌ mebꞌaꞌ, palta a ebꞌ chuc jun, bꞌalaj malaj yelcꞌoch ebꞌ mebꞌaꞌ chiꞌ dꞌa ebꞌ.
8 A ebꞌ bꞌuchumtac, ton̈ej sqꞌue somnaj ebꞌ anima yuj ebꞌ. Axo pax ebꞌ ay spensar jun, yojtac ebꞌ syacꞌ lajvoc oval.
9 Tato a ebꞌ ay spensar stelaj sbꞌa yedꞌ junoc malaj spensar dꞌa yichan̈ ebꞌ yajal, a ebꞌ malaj spensar chiꞌ, scot yoval ebꞌ, mato ton̈ej sbꞌuchvaj ebꞌ, malaj jabꞌoc tas sbꞌo yuj ebꞌ.
10 A ebꞌ milumcham anima, chuc yilan ebꞌ vachꞌ sbꞌeybꞌal ebꞌ. Snibꞌej ebꞌ smilcham ebꞌ anima vachꞌ spensar munil ayeqꞌui.
11 A ebꞌ malaj spensar, max scꞌubꞌejel-laj yoval ebꞌ, palta a ebꞌ ay spensar, syamoch vaan yoval ebꞌ.
12 A ebꞌ yajal schaan yabꞌ es, masanil ebꞌ ayoch yedꞌ ebꞌ dꞌa yopisio, tzꞌoch ebꞌ esalvumal.
13 A ebꞌ mebꞌaꞌ yedꞌ ebꞌ ixtum anima, lajann̈ej ebꞌ. A Jehová ix acꞌan yol sat ebꞌ.
14 A ebꞌ rey vachꞌ syutej sbꞌoan yaj dꞌa yibꞌan̈ ebꞌ mebꞌaꞌ, te vachꞌn̈ej tzꞌajoch ebꞌ dꞌa yopisio chiꞌ dꞌa masanil tiempo.
15 A ebꞌ tzꞌabꞌan syail yuj scachji, scꞌaybꞌaj ebꞌ yuuj, palta a ebꞌ uninabꞌil max cachchaj jun, syacꞌ qꞌuixvelal smam snun ebꞌ.
16 Ayic stzijtumax ebꞌ chuc, ste qꞌue vaan chucal, palta a ebꞌ vachꞌ spensar, ol yil ebꞌ scot yaelal dꞌa yibꞌan̈ ebꞌ chuc chiꞌ.
17 Co cachec ebꞌ cuninal yic juncꞌolal ol on̈ ecꞌoc, yic tzalajcꞌolal pax ol on̈ ajoc.
18 A bꞌajtil max abꞌchaj slolon ebꞌ schecabꞌ Dios, scꞌulajn̈ej masanil chucal, palta te vachꞌ yic ebꞌ scꞌanabꞌajan sley Dios.
19 Tato ton̈ej sco cach ebꞌ co checabꞌ yedꞌ co tiꞌ, max sqꞌuexlaj smodo ebꞌ, vachꞌchom snachajel yuj ebꞌ, palta max scꞌanabꞌajejlaj ebꞌ.
20 A ebꞌ malaj spensar, vachꞌ tzꞌelcꞌoch ebꞌ dꞌa yichan̈ ebꞌ comonn̈ej sloloni.
21 A ebꞌ max cachan ebꞌ schecabꞌ yunetacto, a dꞌa slajvubꞌal syabꞌ val syail ebꞌ yuj ebꞌ.
22 A ebꞌ ov, syicꞌn̈ejchaan̈ oval ebꞌ. A ebꞌ cꞌun scot yoval, ay juntzan̈ tastac man̈ vachꞌoc scꞌulej ebꞌ yuj yoval chiꞌ.
23 A ebꞌ syicꞌchaan̈ sbꞌa, tzꞌicꞌjiemta ebꞌ, palta a ebꞌ emnaquil jun, tzꞌicꞌjichaan̈ ebꞌ.
24 A ebꞌ syacꞌoch sbꞌa yedꞌ ebꞌ elcꞌum, munil syicꞌcot ebꞌ dꞌa yibꞌan̈. Syacꞌ stiꞌ ebꞌ yalan tas yojtac dꞌa stojolal, palta max yal-laj ebꞌ icha syutej yacꞌan stiꞌ chiꞌ.
25 A xivcꞌolal dꞌa ebꞌ quetanimail, lajan icha junoc yaal, palta tan̈vabꞌil on̈ yuj Jehová tato scacꞌoch co pensar dꞌay.
26 Man̈ jantacoc mach sayanecꞌ tas tzꞌaj smontaj ebꞌ yajal, palta an̈ej Jehová sbꞌoan yaj tastac dꞌa stojolal.
27 A ebꞌ vachꞌ spensar, malaj sgana ebꞌ syil ebꞌ chuc, icha pax chiꞌ ebꞌ chuc chiꞌ, malaj sgana ebꞌ syil ebꞌ vachꞌ spensar chiꞌ.