28
A ebꞌ scꞌulan chucal, sbꞌat ebꞌ elelal, vachꞌchom malaj mach spechan ebꞌ, palta a ebꞌ vachꞌ spensar jun, tecꞌtecꞌ syutej sbꞌa ebꞌ icha junoc nocꞌ choj.2 Tato pit syutej sbꞌa junoc chon̈abꞌ, toxon̈ej bꞌeleli yecꞌ ebꞌ tzꞌacꞌan yajalil dꞌay, palta tato aj pensar jun yajal junoc chon̈abꞌ, syal yicꞌan bꞌey dꞌa vachꞌil.
3 A ebꞌ mebꞌaꞌ tzꞌoch yajalil, tato syixtej ebꞌ yetmebꞌail ebꞌ, lajan ebꞌ icha junoc oval yax n̈abꞌ tzꞌixtaxbꞌat avbꞌen yuuj.
4 A ebꞌ syicꞌcanel sbꞌa dꞌa ley, ste tzalaj ebꞌ yedꞌ ebꞌ scꞌulan chucal. Axo pax ebꞌ scꞌanabꞌajan ley jun, tzꞌoch ebꞌ ajcꞌolal dꞌa ebꞌ.
5 A ebꞌ chuc spensar, max nachajel-laj tojolal yuj ebꞌ. Axo pax ebꞌ syal sbꞌa dꞌa Jehová jun, snachajel yuj ebꞌ.
6 Vachꞌchom mebꞌaꞌ on̈, palta tato vachꞌ co pensar, yelxo val vachꞌ dꞌa yichan̈ pax to bꞌeyum on̈, tato an̈ej chucal sco naꞌa.
7 A ebꞌ uninabꞌil ay spensar, scꞌanabꞌajej masanil sley Dios ebꞌ. Axo pax ebꞌ junn̈ej tzꞌecꞌ yedꞌ ebꞌ te pecꞌ qꞌuin̈ jun, a sqꞌuixvelal smam ebꞌ syacꞌaꞌ.
8 A bꞌeyumal syicꞌ junoc anima yuj scꞌanan yuneꞌ stumin syacꞌ majanil, a dꞌa yol scꞌabꞌ junoc mach tzꞌocꞌ scꞌol dꞌa ebꞌ mebꞌaꞌ tzꞌacꞌjican sbꞌeyumal chiꞌ yuj Dios.
9 A ebꞌ max cꞌanabꞌajan scꞌaybꞌubꞌal Dios, max chajipaxlaj slesal ebꞌ yuj Dios chiꞌ.
10 A ebꞌ tzꞌacꞌan musansatil ebꞌ vachꞌ sbꞌeybꞌal, yic stelvi ebꞌ dꞌa chucal, scan ebꞌ dꞌa yol syaalil syaqꞌuem chiꞌ. A ebꞌ anima vachꞌ sbꞌeybꞌal, a vachꞌilal scha ebꞌ.
11 A ebꞌ bꞌeyum, te jelan spensar ebꞌ snaani. Axo pax ebꞌ mebꞌaꞌ aj pensar, syiloch spensar ebꞌ bꞌeyum chiꞌ ebꞌ.
12 Ayic tzꞌoch ebꞌ vachꞌ sbꞌeybꞌal dꞌa yopisio, ichato scha sqꞌuinal ebꞌ anima, palta tato a ebꞌ chuc spensar tzꞌoch dꞌa yopisio chiꞌ, scꞌubꞌejel sbꞌa ebꞌ anima dꞌa ebꞌ.
13 A ebꞌ scꞌubꞌejel smul, man̈ vachꞌoc tzꞌelcꞌoch ebꞌ. Axo ebꞌ syalqꞌueta smul jun, syactanpaxcan ebꞌ, tzꞌacꞌji nivancꞌolal ebꞌ.
14 Te tzalajcꞌolal yic ebꞌ anima ayn̈ej yelcꞌoch Dios dꞌa sat, palta a ebꞌ pit syutej spensar, scotcan yaelal dꞌa yibꞌan̈ ebꞌ.
15 A ebꞌ chuc spensar ayoch yajalil dꞌa junoc chon̈abꞌ mebꞌaꞌ, lajan ebꞌ icha junoc nocꞌ choj tzꞌel yav, ma icha junoc nocꞌ oso ay svejel.
16 A ebꞌ yajal malaj spensar, syixtej ebꞌ yetanimail ebꞌ, palta a ebꞌ yajal max yil scꞌool dꞌa tas ay dꞌa ebꞌ yetanimail jun, snajatbꞌi sqꞌuinal ebꞌ.
17 A ebꞌ milumcham anima, yovalil schampax ebꞌ, man̈ smojoc to ay mach scolan ebꞌ.
18 A ebꞌ vachꞌ spensar scolchajel ebꞌ, palta a ebꞌ chuc spensar jun, elan̈chamel sjavi yaelal dꞌa yibꞌan̈ ebꞌ.
19 A ebꞌ smunlaj dꞌa sat sluum, syacꞌ sobre tas sva ebꞌ, palta a ebꞌ sbꞌat tzacꞌan scꞌulan junoc tas malaj yelcꞌochi, an̈ej mebꞌail tzꞌilchaj yuj ebꞌ.
20 A ebꞌ anima max acꞌan musansatil ebꞌ yetanimail, tzꞌicꞌjichaan̈ ebꞌ, palta a ebꞌ snibꞌejoch sbꞌa bꞌeyumal yuj yacꞌan musansatil ebꞌ yetanimail jun, yovalil syabꞌ syail ebꞌ.
21 Man̈ vachꞌoc tato chꞌocchꞌoc syutej ebꞌ juez sbꞌoan yaj ebꞌ anima, palta ay bꞌaj smontaj ebꞌ juez chiꞌ yuj jabꞌoc tas tzꞌacꞌji dꞌay.
22 A ebꞌ man̈ elbꞌenoc tas yuuj, syacꞌ yip ebꞌ yoch bꞌeyumal dꞌa elan̈chamel, palta man̈ yojtacoc ebꞌ tato sja mebꞌail dꞌa yibꞌan̈ ebꞌ yuuj.
23 A ebꞌ tzon̈ cachanoch vaan, a dꞌa slajvubꞌal yelxo val sco xajanej ebꞌ dꞌa yichan̈ ebꞌ tzꞌalan vachꞌ lolonel dꞌayon̈ dꞌa chabꞌsatil.
24 A ebꞌ tzꞌelcꞌan tastac dꞌa smam snun, syalan ebꞌ to malaj smul ebꞌ tzꞌochi, yamigo sbꞌa ebꞌ yedꞌ ebꞌ axon̈ej ixtoj anima scꞌulej.
25 A ebꞌ man̈xo jantacoc tas snibꞌej, syicꞌchaan̈ oval ebꞌ, palta axo ebꞌ tzꞌacꞌanoch Jehová yipoc scꞌool jun, vachꞌn̈ej tzꞌelcꞌoch ebꞌ.
26 A ebꞌ malaj spensar syal ebꞌ to masanil syal yuj ebꞌ, palta a ebꞌ scꞌanbꞌan junoc razón dꞌa ebꞌ jelan, te vachꞌ tzꞌelcꞌoch ebꞌ.
27 A ebꞌ scolvaj dꞌa ebꞌ mebꞌaꞌ, malaj tas syacꞌ palta dꞌa ebꞌ, palta a ebꞌ max colvajlaj dꞌa ebꞌ mebꞌaꞌ chiꞌ jun, tzijtum mach tzꞌalan chuc dꞌa spatic ebꞌ.
28 Ayic tzꞌoch ebꞌ chuc dꞌa yajalil, dꞌa scal xivelal sbꞌeyecꞌ ebꞌ anima. Ayic satel ebꞌ chuc chiꞌ, tzꞌicꞌjichaan̈ ebꞌ vachꞌ sbꞌeybꞌal.