27
Man̈ eyicꞌchaan̈ e bꞌa yuj tas tze cꞌulej qꞌuicꞌan eyalani, yujto man̈ eyojtacoc tas tzuji qꞌuicꞌan chiꞌ.2 Chꞌococabꞌ ebꞌ tzex alan vachꞌil, yujto man̈ vachꞌoc tato a ex tic tzeyaloch e bꞌa vachꞌilal.
3 A qꞌuen yax qꞌueen yedꞌ qꞌuen arena te al qꞌueen, pural sqꞌue qꞌuen cuuj, icha pax chiꞌ yaj yoval ebꞌ chuc spensar, yelxo val max techajlaj cuuj.
4 A cꞌacꞌalcꞌolal te chuc, nivan tas tzꞌixtaxbꞌat yuuj, palta axo chichoncꞌolal, malaj mach syal stecꞌbꞌan sbꞌa dꞌa yichan̈.
5 A ebꞌ tzon̈ xajanani, tzon̈ scach ebꞌ dꞌa juntzan̈ chucal sco cꞌulej.
6 A ebꞌ vachꞌ eyacꞌan yedꞌoc, say ebꞌ tas vachꞌ tzꞌoch e vachꞌiloc vachꞌchom ya tzeyabꞌi. Axo ebꞌ tzꞌoch lacꞌnaj dꞌayex jun, tzeyil e bꞌa dꞌa ebꞌ, yujto a ebꞌ chiꞌ, ajcꞌool yajoch ebꞌ dꞌayex.
7 A ebꞌ bꞌudꞌanxo scꞌool, vachꞌchom a nocꞌ yal chabꞌ syucꞌ ebꞌ, palta chuclaj yucꞌji nocꞌ syabꞌ ebꞌ. Axo pax ebꞌ ay svejel jun, vachꞌchom cꞌaꞌ junoc tasi, palta te chiꞌ syabꞌ ebꞌ.
8 A ebꞌ syactejcan yal yuninal, lajan ebꞌ icha junoc nocꞌ much syactejcan soꞌ yedꞌ yuneꞌ.
9 A yuj perfume yedꞌ tas scaqꞌuecꞌ dꞌa co jolom, yuj chiꞌ stzalajbꞌi co cꞌool, icha chiꞌ tzꞌaj co tzalaj yuj razón syacꞌ ebꞌ camigo dꞌayon̈ yuj on̈ xajanan ebꞌ.
10 Malaj bꞌaqꞌuin̈ tze chaquel ebꞌ eyamigo yedꞌ pax ebꞌ yamigo ebꞌ e mam. Man̈ ex bꞌat eyal e cuscꞌolal dꞌa junoc e cꞌabꞌ eyoc. Te vachꞌ tato tzeyal e cuscꞌolal chiꞌ dꞌa ebꞌ eyamigo cajan dꞌa e lacꞌanil, dꞌa yichan̈ ebꞌ e cꞌabꞌ eyoc cajan dꞌa najat.
11 Ex vuninal, jelan tzeyutej e bꞌa, yic vachꞌ tzeyacꞌ tzalajbꞌoc in cꞌool, yic vachꞌ ay tas syal in pactzitan dꞌa ebꞌ tzin paticaneli.
12 A ebꞌ ay spensar, syil ebꞌ tastac ay smay, scolan sbꞌa ebꞌ dꞌay, axo pax ebꞌ malaj spensar jun, sbꞌeyn̈ejbꞌat ebꞌ masanto sjavi yaelal dꞌa yibꞌan̈ ebꞌ.
13 A ebꞌ syacꞌoch sbꞌa fiadoral dꞌa ebꞌ anima man̈ yojtacoc, yacꞌocabꞌcan junoc mojan̈ spichul ebꞌ yuj qꞌuen tumin chiꞌ.
14 Tato ayic vanto sacbꞌi, tzon̈ avaj dꞌa ebꞌ camigo yic sco cꞌanbꞌan scꞌol ebꞌ, a tzꞌaj yabꞌan ebꞌ, ichato chuc van calan dꞌa ebꞌ.
15 A ebꞌ ix ix ovaln̈ej yaji, lajan ebꞌ ix icha junoc tzꞌuj sdꞌujdꞌujan dꞌa stiempoal n̈abꞌil qꞌuinal.
16 Tato sco nibꞌej tzꞌoch vaan ebꞌ ix dꞌa yoval scꞌool chiꞌ, lajan icha to sco nibꞌej sco yamoch vaan icꞌ, icha pax to sco nibꞌej sco yam aceite dꞌa yol co cꞌabꞌ.
17 A qꞌuen qꞌueen, sn̈icchajqꞌue ye qꞌueen yedꞌ junocxo yetqꞌuenal, icha pax chiꞌ ebꞌ anima syicꞌ sjelanil ebꞌ yuj slolon yedꞌ junocxo yetanimail.
18 A ebꞌ stan̈van teꞌ higo avabꞌil yuuj, slo sat teꞌ ebꞌ, icha pax chiꞌ ebꞌ ayoch spensar dꞌa spatrón, tzꞌicꞌjichaan̈ ebꞌ yuj ebꞌ spatrón chiꞌ.
19 Icha val scutej quilanem co sat dꞌa yol a aꞌ, icha pax chiꞌ scutej quilani tas yaj co bꞌeybꞌal ayic squilanoch co pensar.
20 A chamel yedꞌ bꞌaj smucchaj ebꞌ chamnac, malaj bꞌaqꞌuin̈ sbꞌudꞌji, icha chiꞌ ebꞌ anima, malaj bꞌaqꞌuin̈ stzactzaj ebꞌ snibꞌanoch tastac.
21 A qꞌuen oro yedꞌ qꞌuen plata, tzꞌacꞌchaj proval qꞌuen dꞌa scal cꞌacꞌ, icha pax chiꞌ ebꞌ anima, tzꞌacꞌchaj proval ebꞌ yuj tas bꞌaj syal vachꞌ lolonel.
22 Vachꞌchom sco ten chojoc ebꞌ malaj spensar dꞌa yibꞌan̈ junoc tenlabꞌ, palta max el-laj sman̈ pensaril ebꞌ chiꞌ dꞌay.
23 Ayexn̈ejocabꞌ och ijan eyilan nocꞌ e calnel, scham val eyilanpax tas tzeyutej e tan̈van nocꞌ,
24 yujto a e bꞌeyumal yedꞌ eyopisio man̈ masaniloc tiempo ayecꞌ eyedꞌoc.
25 Ayic sjochchaj qꞌue vaan an̈ an̈cꞌultac yedꞌ an̈ ac dꞌa jolomtac vitz, smolchaj qꞌue vaan an̈, svolanxi an̈ junelxo.
26 A xil nocꞌ e calnel tzꞌoch e pichuloc, ay pax e tumin yuj nocꞌ e chiva yic syal e manan e luum,
27 a pax nocꞌ e chiva chiꞌ, man̈ jantacoc lech syacꞌ nocꞌ yic tzeyuqꞌuej yedꞌ ebꞌ ix eyetbꞌeyum, ebꞌ eyuninal yedꞌ pax ebꞌ smunlaj dꞌayex.