26
Man̈ smojoc tato tzꞌem qꞌuen sacbꞌacom ayic te cꞌachan, ma scot n̈abꞌ dꞌa stiempoal jachꞌoj, ichaton pax chiꞌ, man̈ smojoc tzꞌicꞌjichaan̈ ebꞌ malaj spensar.2 Tato malaj yuuj tzꞌalji junoc catabꞌ lolonel, malaj bꞌaqꞌuin̈ tzꞌelcꞌochi. Lajan icha junoc nocꞌ tzꞌunun ton̈ej tzꞌecꞌ jen̈en̈oc, ma icha nocꞌ san̈capech tzꞌecꞌ dꞌa satchaan̈, malaj bꞌaj tzꞌoch vaan.
3 Scacꞌoch sfreno nocꞌ chej, sco macꞌ nocꞌ bꞌuru dꞌa junoc tzꞌuum, axo teꞌ jixcꞌabꞌteꞌ, a teꞌ scacꞌlabꞌej co macꞌan ebꞌ malaj spensar.
4 Man̈ ex tacꞌvoc dꞌa junoc malaj spensar ayic syalan sman̈ pensaril chiꞌ dꞌayex, yic vachꞌ max e lajbꞌej e bꞌa yedꞌoc.
5 Tacꞌvan̈ec dꞌa junoc malaj spensar icha dꞌa smojal, yic vachꞌ ol nachajel yuuj to malaj spensar chiꞌ.
6 Tato sco checbꞌat ebꞌ malaj spensar dꞌa co checabꞌil, ichato van co xican coc, ton̈ej sco saycot yaelal dꞌa quibꞌan̈.
7 A junoc lolonel syacꞌ junoc malaj spensar, lajan icha yoc junoc coxo, malaj yopisio.
8 Ecꞌal sjelanil junoc mach spixanoch qꞌuen qꞌueen dꞌa yol chꞌan̈ mejmeech, dꞌa yichan̈ junoc mach tzꞌicꞌan chaan̈ ebꞌ malaj spensar.
9 A ebꞌ ucꞌum an̈, vachꞌchom aylaj jantacoc qꞌuiix aybꞌat dꞌa yol yoc ebꞌ, palta max yabꞌlaj ebꞌ. Icha pax chiꞌ ebꞌ malaj spensar, max nachaj el-laj juntzan̈ jelan lolonel yuj ebꞌ.
10 A ebꞌ patrón tzꞌacꞌanoch ebꞌ malaj spensar dꞌa smunlajel, ma ebꞌ scomon bꞌeyeqꞌui, lajan tzꞌaj ebꞌ icha ebꞌ julvajum ton̈ej scomon julvaj dꞌa scal anima.
11 Icha nocꞌ tzꞌiꞌ slecꞌanxiqꞌue xej, icha chiꞌ yaj ebꞌ malaj spensar, smeltzajxi ebꞌ dꞌa sman̈ pensaril chiꞌ.
12 A ebꞌ malaj spensar, tzato yal co cꞌaybꞌan ebꞌ dꞌa yichan̈ pax ebꞌ syaloch sbꞌa jelanil.
13 A ebꞌ jaragana syal ebꞌ to a dꞌa yol bꞌe ay jun nocꞌ choj lista yajeqꞌui yic schiꞌanbꞌat anima nocꞌ, yujto malaj sgana ebꞌ sbꞌat munlajel.
14 Icha tzꞌaj sbꞌeyecꞌ junoc puerta yuj svisagreal, icha chiꞌ ebꞌ jaragana, smeltzajqꞌueejmi ebꞌ dꞌa sat schꞌat.
15 A ebꞌ jaragana syaqꞌuem scꞌabꞌ ebꞌ dꞌa yol yucꞌabꞌ, palta te nivan munlajelalxo dꞌa ebꞌ ayic syicꞌanqꞌueta ebꞌ tas ayem dꞌa yol ucꞌabꞌ chiꞌ.
16 A ebꞌ jaragana, sna ebꞌ to te jelan ebꞌ dꞌa yichan̈ ucvan̈oc anima yojtac sya ilan junoc lolonel dꞌa vachꞌilal.
17 Tato scalbꞌat quic dꞌa scal oval bꞌaj malaj calan quicoꞌ, lajan icha co yaman schiquin junoc nocꞌ tzꞌiꞌ te ov.
18 Icha ebꞌ anima scomon julvaj yedꞌ sjul-labꞌ ayoch scꞌacꞌal,
19 icha chiꞌ yaj ebꞌ syixtej junoc yamigo, axo slajvi chiꞌ syalan ebꞌ to ton̈ej stajni ebꞌ.
20 Tato malaj teꞌ cꞌatzitz, stupel teꞌ cꞌacꞌ, icha pax chiꞌ tato malaj junoc naumqꞌue lolonel, slajviel oval.
21 A teꞌ acꞌal tzꞌoch tzacꞌaqꞌuil, axo teꞌ cꞌatzitz tzꞌacꞌan ovaj teꞌ cꞌacꞌ, icha chiꞌ tzꞌaj sqꞌue vaan oval yuj ebꞌ sayum oval tzꞌeqꞌui.
22 A tas syal ebꞌ alum pecal, lajan icha juntzan̈ tas vachꞌ sloji, scꞌoch val schiꞌal dꞌa scꞌol ebꞌ tzꞌabꞌan chiꞌ.
23 A juntzan̈ lolonel man jantacoc svachꞌil syal ebꞌ anima chuc tas nabꞌil yuuj, lajan icha junoc lum chen ucꞌnac dꞌa qꞌuen plata.
24 A ebꞌ chuc spensar, vachꞌn̈ej syutej ebꞌ sloloni, palta axo dꞌa spensar ebꞌ, ataꞌ ayecꞌ schucal pensaril ebꞌ chiꞌ,
25 vachꞌchom man̈ jantacoc svachꞌil slolon ebꞌ dꞌayex, man̈ e cha eyabꞌi, yujto a ebꞌ chiꞌ, an̈ej chucal sna ebꞌ scꞌulej dꞌayex.
26 Vachꞌchom max snibꞌej ebꞌ schꞌoxel schucal, palta yovalil ol checlajelta dꞌa yichan̈ anima smasanil.
27 A ebꞌ sjoyan junoc olan yic yaal, an̈ejaꞌ ebꞌ ol bꞌat dꞌa jun olan chiꞌ. A ebꞌ tzꞌecanbꞌat junoc qꞌuen qꞌueen dꞌa yibꞌan̈ junoc anima, an̈ejaꞌ qꞌueen ol cotpax dꞌa yibꞌan̈ ebꞌ.
28 A ebꞌ esalvum, schichon scꞌol ebꞌ dꞌa ebꞌ anima syixtej. A ebꞌ ton̈ej stzꞌac yal vachꞌil, sjuviel ebꞌ schaan yabꞌ dꞌa ebꞌ.