A schabꞌil macan̈ slolonel vin̈aj Salomón
25
Aton juntzan̈ tic slolonel vin̈aj Salomón, axo ebꞌ stzꞌibꞌum vin̈aj Ezequías sreyal Judá, ix tzꞌibꞌancani:2 Te nivan yelcꞌoch Dios yuj juntzan̈ tas cꞌubꞌeltac yaj yuuj, axo pax ebꞌ rey jun, scal ebꞌ vachꞌil yujto scham val schꞌolbꞌitan junoc tas ebꞌ.
3 Icha snajatil ay satchaan̈ yedꞌ sjulal yich lum luum, icha chiꞌ yaj spensar ebꞌ rey, malaj mach snachajel yuuj tas yaj spensar ebꞌ.
4 Tato tzꞌicꞌchajel smical qꞌuen plata, syal sbꞌo junoc tas vachꞌ dꞌa qꞌueen.
5 An̈ejtonaꞌ tato tzꞌicꞌchajel ebꞌ chuc dꞌa yopisio yuj ebꞌ rey, syicꞌ yip yopisio ebꞌ dꞌa stojolal.
6 Mocabꞌ eyicꞌchaan̈ e bꞌa dꞌa yichan̈ ebꞌ rey, man̈ ex empax cꞌojan bꞌaj tzꞌem cꞌojan ebꞌ nivac vinac.
7 Yelxo vachꞌ tato tzex avtajbꞌat dꞌa slacꞌanil ebꞌ rey, dꞌa yichan̈ pax to tzex icꞌchajelta dꞌa yichan̈ ebꞌ nivac vinac chiꞌ.
8 A tas tzeyilaꞌ, man̈ eyicꞌbꞌat dꞌa yichan̈ ebꞌ juez dꞌa elan̈chamel, talaj ay junocxo ol cꞌochoc ol yalan tas yaji, axo ol ajoc, toxon̈ej ol ex te qꞌuixvoc.
9 Tato ay chaclajbꞌail dꞌa e cal yedꞌ ebꞌ cajan dꞌa e lacꞌanil, aqꞌuec eyip e bꞌoan yaj yedꞌ ebꞌ, man̈ e puc specal dꞌa ebꞌ eyetanimail.
10 Tato maay, axo talaj tzꞌaji, a ebꞌ tzꞌabꞌan specal jun chiꞌ, syamoch ebꞌ ex yalubꞌtan̈ani, axo e pecal te chuc tzꞌaj yalubꞌtan̈aji.
11 A junoc bꞌelan̈ lolonel vachꞌ tzꞌalchaj dꞌa stzolal, lajan icha junoc mansan nabꞌa oro, aypaxoch qꞌuen plata yelvanubꞌoc.
12 Icha qꞌuen colcꞌabꞌ yedꞌ qꞌuen uchiquin nabꞌa oro, yelxo te vachꞌ, icha chiꞌ yaj scachnabꞌil ebꞌ jelan dꞌa ebꞌ scha yabꞌ dꞌa tzalajcꞌolal.
13 A ebꞌ checabꞌ cꞌanabꞌajum, lajan ebꞌ dꞌa yol sat ebꞌ schecan chiꞌ icha aꞌ siquilaꞌ scuqꞌuej ayic te ay co taquin̈tial, sicbꞌi scꞌol ebꞌ spatrón ebꞌ chiꞌ yuj scꞌanabꞌajumal chiꞌ.
14 Icha taquin̈ asun yedꞌ taquin̈ icꞌ malaj jabꞌoc sn̈abꞌil, icha chiꞌ yaj ebꞌ syicꞌchaan̈ sbꞌa dꞌa tas syacꞌ yalani, palta malaj bꞌaqꞌuin̈ syacꞌ ebꞌ.
15 Tato nivan scutej co cꞌool dꞌa yichan̈ ebꞌ yajal, syal smontaj ebꞌ cuuj. A lolonel vachꞌ tzꞌalchaji, tzꞌem numnaj ebꞌ te pit syutej sbꞌa yuuj.
16 Ayic tzꞌilchaj nocꞌ yal chabꞌ eyuuj, mocabꞌ ecꞌ yibꞌan̈ e te ucꞌanbꞌat nocꞌ, tato maay, ex xejtalaj yuj nocꞌ.
17 Mocabꞌ xicanoc tzex bꞌat paxyal dꞌa ebꞌ eyamigo, tato maay, axo talaj tzꞌaji, sqꞌue chinaj scꞌol ebꞌ eyedꞌoc, yujto nachaji tzex cꞌochi.
18 A ebꞌ syacꞌoch sbꞌa testigoal dꞌa es dꞌa junoc yetanimail, lajan ebꞌ icha junoc te teꞌ, ma junoc qꞌuen espada, ma junoc jul-labꞌ te jay stiꞌ.
19 Ayic ayon̈ och dꞌa co yaelal, tato a junoc anima max elcꞌoch tas syal scacꞌoch yipoc co cꞌool, lajan ichato qꞌuichajnac co xubꞌ tzon̈ bꞌeyeqꞌui, ma icha co va yedꞌ junoc qꞌuen que ya ayxo yolanil.
20 Ayic ayon̈ och dꞌa syaelal, sbꞌitaj junoc bꞌit cabꞌi, lajan syail icha yic tzꞌacꞌjioch vinagre dꞌa junoc echen, ma icha yic tzꞌicꞌchajel co pichul ayic te ay siic.
21 Tato ay svejel ebꞌ ayoch ajcꞌolal dꞌayex, aqꞌuec va ebꞌ, ta ay staquin̈tial ebꞌ, aqꞌuec aꞌ yuqꞌuej ebꞌ.
22 Tato icha chiꞌ tzeyutej e bꞌa dꞌa ebꞌ, ol chacbꞌoc sat ebꞌ yuj qꞌuixvelal dꞌa eyichan̈, axo Jehová ol pactzitan dꞌayex bꞌaj tzex colvaj chiꞌ dꞌa ebꞌ.
23 A icꞌ scot dꞌa stojolal norte syicꞌcot n̈abꞌ, icha chiꞌ juntzan̈ chucal lolonel, a tzꞌacꞌan ovaj co sat.
24 Yelxo te vachꞌ tzon̈ aj dꞌa junoc yuneꞌ pat co chꞌocoj, dꞌa yichan̈ pax tzon̈ aj dꞌa junoc nivan pat te vachꞌ yedꞌ junoc ix ix to ayn̈ejcot yoval.
25 Icha a siquil aꞌ scuqꞌuej ayic van stacji co tiꞌ, icha chiꞌ tzꞌaj sjavi junoc abꞌix vachꞌ scot dꞌa najat.
26 A ebꞌ vachꞌ sbꞌeybꞌal scuchbꞌajbꞌat yuj ebꞌ chuc sbꞌeybꞌal, lajan tzꞌaj ebꞌ icha sjaj a aꞌ te tat yuj lum socꞌom.
27 Man̈ vachꞌoc tato nivan nocꞌ yal chabꞌ scuqꞌuej. Man̈ vachꞌoc paxi tato an̈ej yic nivan tzꞌaj co bꞌinaj yuj ebꞌ quetanimail sco sayeqꞌui.
28 A ebꞌ max syamoch vaan sbꞌeybꞌal, lajan ebꞌ icha junoc chon̈abꞌ lan̈chajnac smuroal max yal-laj scolan sbꞌa.