19
24
Man̈ e nibꞌejoch tastac ay dꞌa ebꞌ tzꞌoch bꞌeyumal yuj chucal, man̈ e nibꞌej jun tzex aj yedꞌ ebꞌ,2 yujto an̈ej elcꞌal bꞌaj ayoch spensar ebꞌ, axon̈ej chucal syalubꞌtan̈ej ebꞌ.
20
3 Tze na sicꞌlabꞌil tas tzeyutej e bꞌoan junoc e pat yedꞌ jelanil yedꞌ aj pensaril tzeyaqꞌuem cimientoal yich,
4 yic vachꞌ icha chiꞌ ol bꞌudꞌjoquel yol e pat yedꞌ juntzan̈ tas vachꞌ yilji yedꞌ tastac ay stojol.
21
5 A ebꞌ aj pensar te tecꞌan ebꞌ. Yuj tas yojtac ebꞌ, ste tecꞌcꞌaj ebꞌ.
6 Ayic tzex bꞌat dꞌa oval, tze cꞌanbꞌej eyabꞌ junoc razón. Tato tzijtum ebꞌ tzꞌacꞌan e razón, ol yal eyuuj.
22
7 A ebꞌ malaj spensar, max nachajlaj tas syutej ebꞌ scolan sbꞌa dꞌa yichan̈ ebꞌ juez, ton̈ej tzꞌoch qꞌuelan ebꞌ yujto malaj sjelanil ebꞌ.
23
8 A ebꞌ an̈ej chucal snaꞌa, bꞌinajnac ebꞌ yuj schuc pensaril chiꞌ.
9 A tas sna ebꞌ malaj spensar, aton chucal. Max tzalajlaj ebꞌ anima yedꞌ ebꞌ bꞌuchumtac.
24
10 Tato schabꞌaxqꞌue co cꞌool, ayic ayon̈ och dꞌa ilcꞌolal, malaj co tecꞌanil syal chiꞌ.
25
11 Co coleccanel ebꞌ van yicꞌjibꞌat dꞌa chamel. Co yamecoch vaan ebꞌ ichato squetconecꞌ dꞌa stiꞌ yolanil bꞌaj smucchaj ebꞌ chamnac.
12 Vachꞌchom scalaꞌ to man̈ cojtacoc tas van yicꞌan ebꞌ, axo Dios yojtac tas ay dꞌa co pensar, yojtac tas yuj icha chiꞌ sco cꞌulej. A Dios tzon̈ tan̈vani, yojtac tas caji, aꞌ ol pactzitan dꞌayon̈ junjun on̈ icha tas sco cꞌulej.
26
13 Ex vuninal, leqꞌuec schabꞌil nocꞌ acan̈ man̈ jantacoc schiꞌal, abꞌec tonabꞌ jabꞌoc schiꞌal ayoch dꞌa nocꞌ.
14 Icha schiꞌal schabꞌil nocꞌ acan̈ chiꞌ, icha chiꞌ ol aj eyabꞌan schiꞌal jelanil yedꞌ aj pensaril. Tato ol ilchaj eyuuj, vachꞌ ol ex ajelcꞌochoc, axo tas ayoch yipoc e cꞌool, malaj bꞌaqꞌuin̈ ol lajvoquecꞌ dꞌayex.
27
15 Man̈ e na chucal pensar dꞌa spatic ebꞌ vachꞌ spensar. Man̈ eyelqꞌuej tas ay dꞌa yol spat ebꞌ,
16 yujto vachꞌchom ijan stelvi uqueloc ebꞌ, an̈ejaꞌ uquel tzꞌicꞌjipax qꞌue vaan ebꞌ, axo pax ebꞌ chuc jun, scotxon̈ejcan dꞌa yibꞌan̈ ebꞌ dꞌa juneln̈ej.
28
17 Man̈ ex tzalajoc ayic scot dꞌa yibꞌan̈ ebꞌ ayoch ajcꞌolal dꞌayex.
18 Tato tzex qꞌuechaan̈ jun, man̈xo ol yacꞌlaj yoval scꞌol Jehová dꞌa yibꞌan̈ ebꞌ, yujto man̈ vachꞌoc e tzalajcꞌolal chiꞌ dꞌa yol sat.
29
19 Man̈ chucoc tzeyabꞌi ayic sqꞌuibꞌ sbꞌeyumal ebꞌ chuc, man̈ eyiloch e cꞌool dꞌa tastac ay dꞌa ebꞌ,
20 yujto a ebꞌ chuc chiꞌ, man̈ vachꞌoc yic ebꞌ, ol lajvoquel ebꞌ icha tzꞌaj stup junoc candil.
30
21 Ex vuninal, ayocabꞌ yelcꞌoch Jehová yedꞌ ebꞌ rey dꞌa e sat. Man̈ junoc tzeyutej e pensar yedꞌ ebꞌ ayoch ajcꞌolal dꞌa ebꞌ rey chiꞌ,
22 yujto elan̈chamel scham ebꞌ, axo satel ebꞌ chiꞌ. Malaj mach ojtannac tas yaelal scotcan dꞌa yibꞌan̈ ebꞌ yuj Dios yedꞌ pax yuj ebꞌ rey chiꞌ.
A juntzan̈xo lolonel yalnaccan ebꞌ ay sjelanil
23 An̈ejton pax aꞌ juntzan̈xo tic ix yalcan ebꞌ jelan spensar: Yelxo man̈ vachꞌoc tato man̈ lajanoc syutej ebꞌ juez sbꞌoan yaj ebꞌ anima.
24 A ebꞌ juez ton̈ej syaqꞌuel ebꞌ anima ay smul dꞌa libre, chuc syal ebꞌ anima dꞌa spatic ebꞌ, spaticajcanel ebꞌ yuj masanil anima.
25 Axo ebꞌ juez tzꞌacꞌan scastigo ebꞌ ay smul chiꞌ, vachꞌ ton tzꞌelcꞌoch ebꞌ, axo ebꞌ anima, vachꞌ syal ebꞌ dꞌa spatic ebꞌ.
26 A ebꞌ vachꞌ syutej spacan junoc lolonel, lajan ebꞌ icha junoc ebꞌ stzꞌubꞌan stiꞌ junoc anima.
27 Man̈ e bꞌolaj e pat, tato mantalaj tas tze vaꞌa yedꞌ tas ol aj yecꞌ tiempo eyuuj.
28 Man̈ comonoc tzeyacꞌoch lolonel dꞌa spatic ebꞌ eyetanimail, max yal eyalan lolonel man̈ yeloc dꞌa spatic ebꞌ.
29 Man̈ e na eyaqꞌuecꞌ e pac dꞌa ebꞌ, icha val tzex yutej ebꞌ.
30 Ix in ecꞌ dꞌa scal smunlajel ebꞌ jaragana yedꞌ dꞌa scal teꞌ uva avabꞌil yuj ebꞌ malaj spensar.
31 A tas ix vil dꞌa sat sluum ebꞌ chiꞌ, an̈ej teꞌ qꞌuiix sqꞌuibꞌqꞌuei. Axo qꞌuen tzꞌalqꞌueen ayoch smactealoc, toxo ix lan̈chaj qꞌueen.
32 Ayic ix vilan juntzan̈ chiꞌ ix in sicꞌancan dꞌa in pensar, ix vicꞌancan in cꞌaybꞌubꞌal dꞌay.
33 Yuj chiꞌ sval dꞌayex: Yacbꞌan tzex vay jabꞌoc, snecnecan pax e jolom e vayi yedꞌ jeljumbꞌa tzꞌaj e cꞌabꞌ ayic tzeyicꞌan eyip,
34 axo mebꞌail ol ja dꞌa eyibꞌan̈, icha junoc elcꞌum edꞌjinac junoc arma.