6
23
Tato ay ebꞌ nivac vinac tzex avtan vael, scham val e naani mach vin̈ bꞌaj ayex ecꞌ dꞌa yichan̈.2 Vachꞌchom te ayoch e vejel, vachꞌ tato jabꞌn̈ej tze vaꞌa.
3 Man̈ yelcꞌolaloc tze va jun vael man̈xo jantacoc svachꞌil chiꞌ, talaj ay tas sna vin̈ dꞌa e patic.
7
4 Man̈ eyacꞌ eyip eyoch bꞌeyumal, man̈ ex och ilcꞌolal yuj juntzan̈ chiꞌ.
5 A qꞌuen tumin junn̈ej rato slajviel qꞌueen, icha sbꞌat jen̈en̈oc nocꞌ chꞌacbꞌa, icha chiꞌ tzꞌaj satxiel qꞌuen tumin chiꞌ.
8
6 Man̈ ex em cꞌojan dꞌa smexa ebꞌ ya yel yuuj, man̈ e nibꞌejoch svael ebꞌ te vachꞌ.
7 A ebꞌ aj vael chiꞌ, te nivan sna sbꞌa ebꞌ yuj stojol jun vael chiꞌ, vachꞌchom syal ebꞌ, vaan̈ec xchi ebꞌ, palta man̈ smasaniloc scꞌool ebꞌ syalaꞌ.
8 Ol e na e bꞌa yuj tas ix laj e vaem chiꞌ, malaj yopisio juntzan̈ e lolonel vachꞌ ix eyutej eyalan dꞌa ebꞌ.
9
9 Man̈ eyal vachꞌ pensaril dꞌa junoc chuc spensar, yujto ton̈ej ol bꞌuchvaj dꞌa e lolonel vachꞌ chiꞌ.
10
10 Man̈ e qꞌuex stzꞌacan̈il lum luum aytaxcanem dꞌa pecataxo, man̈ e tocꞌpaxecꞌ sluum ebꞌ chamnac smam snun,
11 yujto a Dios Smam ebꞌ, a ol colanel ebꞌ, a ol acꞌan oval eyedꞌoc.
11
12 Aqꞌuecoch e chiquin dꞌa e cꞌaybꞌubꞌal, aqꞌuecoch e pensar yic ol eyojtaquejeli.
12
13 Man̈ eyactej eyacꞌan tzalaj ebꞌ eyuninal, ¿tom val scham ebꞌ yuj jay pajoc tzeyacꞌ dꞌay?
14 Tato tzeyacꞌ tzalaj ebꞌ, van ton e colancanelta ebꞌ dꞌa chamel.
13
15-16 Ex vuninal, ayic ol eyicꞌan jelanil, ayic ol vabꞌan e lolon icha dꞌa smojal, ol in te tzalaj eyuuj.
14
17 Man̈ e nibꞌejoch tastac ay dꞌa ebꞌ tzꞌoch bꞌeyumal yuj chucal, an̈ejocabꞌ Jehová nivan yelcꞌoch dꞌa e sat.
18 Tato icha chiꞌ tzeyutej e bꞌa, vachꞌn̈ej ol ex elcꞌochoc, axo tas ayoch yipoc e cꞌool, malaj bꞌaqꞌuin̈ ol lajvoqueloc.
15
19 Ex vuninal, tan̈vejec eyabꞌi, tze cꞌaybꞌan vachꞌilal, tzeyacꞌan eyip e bꞌeybꞌalani.
20 Man̈ junoc tzex ecꞌ yedꞌ ebꞌ ucꞌum an̈ yedꞌ ebꞌ tzꞌecꞌ yibꞌan̈ svaꞌi.
21 Yujto a ebꞌ ucꞌum an̈ yedꞌ ebꞌ jelan sva chiꞌ, ol te cot mebꞌail dꞌa yibꞌan̈ ebꞌ. Axo pax ebꞌ jaragana toxon̈ej olchimtac spichul ebꞌ ayoch yuuj.
16
22 Cham eyabꞌan tas syal ebꞌ vin̈ e mam, aton ebꞌ vin̈ ix ex ilan pitzvoc. Man̈ e patiquejel ebꞌ ix e nun ayic schichimax ebꞌ ix.
23 Aqꞌuec eyip e sayan tastac yel, jelanil, cꞌaybꞌubꞌal yedꞌ aj pensaril, a juntzan̈ chiꞌ man̈ e patiquejcaneli.
24 A ebꞌ uninabꞌil te vachꞌ, ebꞌ te ay spensar, ste tzalaj smam ebꞌ yedꞌoc.
25 Yuj chiꞌ, aqꞌuec tzalajbꞌoc scꞌool ebꞌ e mam e nun, yic vachꞌ nivan ol aj yelcꞌoch ebꞌ eyuuj.
17
26 Ex vuninal, tan̈vejec eyabꞌ tas ol valaꞌ, scham val eyilan in bꞌeybꞌal,
27 yujto a ebꞌ ix ix smulan dꞌa yol scꞌabꞌ ebꞌ yetbꞌeyum, lajan ebꞌ ix icha junoc olan te jul yich, palta lodꞌan yool.
28 Smaclan ebꞌ vin̈ vinac ebꞌ ix dꞌa yol bꞌe, icha syutej sbꞌa ebꞌ elcꞌum, te tzijtum ebꞌ vin̈ vinac chiꞌ tzꞌoch smul yuj ebꞌ ix.
18
29-30 A ebꞌ max actancan yucꞌan an̈ an̈, ebꞌ an̈ejaꞌ yabꞌan svachꞌil yucꞌji an̈ an̈ chiꞌ, aton ebꞌ tzꞌabꞌan syail, ebꞌ tzꞌel yav, ebꞌ te ayoch oval dꞌa scal, ebꞌ slajvi vachꞌchom malaj junoc tas yuuj, ebꞌ chac jochinac yol sat.
31 Man̈ eyiloch e cꞌool dꞌa an̈ an̈ yax dꞌurinac yilji dꞌa yol scopail, secojtac tzꞌaj yucꞌchajemi,
32 palta axo dꞌa slajvubꞌal jun, lajan icha junoc nocꞌ chan man̈ jantacoc syail bꞌaj tzon̈ schiꞌa.
33 Man̈ jantacoc tas ol acꞌjoc eyil yuuj, tzijtum tastac man̈ vachꞌoc ol eyal yuj an̈, ay pax juntzan̈ tas man̈ vachꞌoc ol e naqꞌue yuj an̈ an̈ chiꞌ.
34 Icha val to a dꞌa yibꞌan̈ aꞌ mar ayex ecꞌ ol eyutej eyilani, oybꞌinacxo e sat, icha val to dꞌa schon steꞌal junoc nivan barco ayex qꞌue tzeyabꞌi.
35 Axo ol eyalan icha tic: Ix on̈ smacꞌ ebꞌ, palta maj cabꞌlaj syail, ix on̈ macꞌji yedꞌ nocꞌ tzꞌuum, palta maj cabꞌlaj, axo ol el lenaj an̈ dꞌa co sat, ol on̈ bꞌatxoc co say an̈, xe chama.