22
Tato vachꞌ co bꞌinaji, yelxo te vachꞌ dꞌa yichan̈ to te ay qꞌuen oro yedꞌ qꞌuen plata dꞌayon̈.2 A ebꞌ bꞌeyum yedꞌ ebꞌ mebꞌaꞌ, lajann̈ej ebꞌ, a Jehová ix bꞌoan ebꞌ.
3 A ebꞌ aj pensar syil ebꞌ tastac ay smay, scolan sbꞌa ebꞌ dꞌay. Axo pax ebꞌ malaj spensar jun, sbꞌeyn̈ejbꞌat ebꞌ masanto yalabꞌaj satcanbꞌat ebꞌ.
4 Tato emnaquil scutej co bꞌa, tato ay pax yelcꞌoch Jehová dꞌa co sat, squicꞌ co bꞌeyumal, tzon̈ bꞌinaji, snajatbꞌi co qꞌuinal.
5 A dꞌa yol sbꞌe ebꞌ chuc, ichato te ay teꞌ qꞌuiix yedꞌ yaal ayemi. Axo pax ebꞌ stan̈vej sbꞌa jun, man̈ junn̈ejoc sbꞌeyecꞌ ebꞌ yedꞌ ebꞌ chuc chiꞌ.
6 Tato sco cꞌaybꞌej ebꞌ unin dꞌa vachꞌ bꞌeybꞌal, axo ol och ebꞌ icham animail, man̈xo ol yicꞌcanel sbꞌa ebꞌ dꞌay.
7 A ebꞌ bꞌeyum, icha rey yaj ebꞌ dꞌa scal ebꞌ mebꞌaꞌ. Axo pax ebꞌ tzꞌacꞌan qꞌuen tumin majanil, yajal yaj ebꞌ dꞌa scal ebꞌ smajnan qꞌuen tumin chiꞌ.
8 A ebꞌ an̈ej chucal scꞌulej, an̈ej yaelal ol scha ebꞌ, man̈xo ol yal yixtan ebꞌ yetanimail ebꞌ.
9 A ebꞌ elbꞌen yuuj, ol scha vachꞌcꞌolal ebꞌ yuj spucanecꞌ tas vachꞌ svaji dꞌa scal ebꞌ mebꞌaꞌ.
10 Ayic spechjiel ebꞌ bꞌuchumtac, tzꞌem numnaj telajbꞌail, oval yedꞌ tzuntzojbꞌail.
11 A ebꞌ rey, ste tzalaj ebꞌ yedꞌ ebꞌ vachꞌ spensar, schꞌoxanpax svachꞌcꞌolal ebꞌ dꞌa ebꞌ vachꞌ sloloni.
12 A Jehová stan̈van ebꞌ aj pensar, stenanpaxecꞌ tastac syal ebꞌ tzꞌesani.
13 A ebꞌ jaragana syal ebꞌ to a dꞌa yol sbꞌe ebꞌ ay jun nocꞌ choj ayeqꞌui, to a nocꞌ ijan ix milancham ebꞌ yalani, yujto malaj sgana ebꞌ sbꞌat munlajel.
14 A slolonel ebꞌ ix ix smulan dꞌa yol scꞌabꞌ yetbꞌeyum, lajan icha junoc olan te jul yich, aton bꞌaj sbꞌatcan ebꞌ scatabꞌej Jehová.
15 A man̈ pensaril ayn̈ejecꞌ dꞌa ebꞌ unin, scan yuj ebꞌ tato smacꞌji ebꞌ dꞌa teꞌ jixcꞌabꞌ teꞌ.
16 A ebꞌ tzꞌixtan ebꞌ mebꞌaꞌ, yujto snibꞌejoch sbꞌa ebꞌ bꞌeyumal yedꞌ ebꞌ smontan ebꞌ bꞌeyum, a ebꞌ chiꞌ yuj mebꞌail ol satel ebꞌ.
A 30 slolonel ebꞌ aj pensar
17 Abꞌec jun tic, ol ex in cꞌaybꞌej dꞌa tastac yalnaccan ebꞌ aj pensar. Scham val e cꞌaybꞌani.
18 Vachꞌ tato tze sicꞌcan dꞌa e pensar yic vachꞌ tzeyalubꞌtan̈ej smasanil.
19 A ticnaic svacꞌ val eyojtaquejeli, yic vachꞌ tzeyacꞌoch Jehová yipoc e cꞌool.
20 Tic tzin tzꞌibꞌej 30 lolonel dꞌayex: A juntzan̈ lolonel tic, ay pensar vachꞌ yedꞌ jelanilal yedꞌnacochi.
21 Tato tze cꞌaybꞌej, ol eyojtaquej tastac vachꞌ yedꞌ tas yel, yic vachꞌ syal eyacꞌan razón vachꞌ dꞌa ebꞌ scꞌanbꞌan yabꞌ dꞌayex.
1
22 Man̈ eyixtej junoc mebꞌaꞌ yujto max yal-laj scolan sbꞌa. Man̈ eyixtejpax junoc mach malaj mach scolan dꞌa yichan̈ ebꞌ yajal,
23 yujto a Jehová ol colanoc, axo Jehová chiꞌ ol acꞌan spac dꞌayex yuj schucal tas tze cꞌulej chiꞌ.
2
24 Man̈ junoc tzex aj yedꞌ ebꞌ anima chuc spensar yedꞌ pax ebꞌ ton̈ej scomon chichon scꞌool,
25 axo talaj tzꞌaji, tze cꞌaybꞌan schucal bꞌeybꞌal ebꞌ chiꞌ, ichato van e sudꞌan e bꞌa dꞌay.
3
26 Malajocabꞌ bꞌaqꞌuin̈ tzeyacꞌoch e bꞌa e tupan sbꞌoc junocxo anima,
27 yujto ta malaj tas tzeyutej e tupani, axo tzꞌaji, a e vaynubꞌ tzꞌicꞌchajecꞌ dꞌayex.
4
28 Man̈ e qꞌuex stzꞌacan̈il sluum ebꞌ e mam eyicham yacꞌnaccanemi.
5
29 A ebꞌ vachꞌ syutej sbꞌa smunlaji, aton ebꞌ chiꞌ ol munlaj dꞌa ebꞌ rey, man̈oclaj dꞌa juntzan̈ anima malaj yelcꞌoch ol munlaj ebꞌ, yuj chiꞌ vachꞌ tzeyutej e munlaji.