21
A dꞌa yol scꞌabꞌ Jehová, ataꞌ ayoch spensar ebꞌ rey, icha secojtaquil sqꞌuexchaj sbꞌe a aꞌ, icha chiꞌ tzꞌaj sqꞌuexchaj spensar ebꞌ rey chiꞌ yuuj.2 A ebꞌ anima sna ebꞌ to vachꞌn̈ej tas scꞌulej ebꞌ, palta a Jehová schꞌolbꞌitan tas yaj spensar ebꞌ.
3 Tato sco bꞌeybꞌalej vachꞌilal yedꞌ tojolal, a juntzan̈ chiꞌ ecꞌalto yelcꞌoch dꞌa yol sat Jehová dꞌa yichan̈ juntzan̈ silabꞌ.
4 A ebꞌ anima malaj yelcꞌoch Jehová dꞌay, a tas scꞌulej ebꞌ yuj yacꞌumtaquil yedꞌ yicꞌojchan̈bꞌail, chuc toni.
5 A junoc tas cham naabꞌil tzꞌaji, vachꞌ tzꞌelcꞌochi. Axo pax tas comonn̈ej sbꞌo jun, a mebꞌail scotcan yuuj.
6 A ebꞌ syicꞌ sbꞌeyumal yuj es syalaꞌ, junn̈ej rato slajviel sbꞌeyumal ebꞌ chiꞌ, axo chamel sjacan dꞌa yibꞌan̈ ebꞌ.
7 A ebꞌ chuc, an̈ejaꞌ schucal ebꞌ chiꞌ sataneli, yujto malaj sgana ebꞌ sbꞌeybꞌalej tojolal.
8 A sbꞌeybꞌal ebꞌ chuc spensar, man̈ tojoloc, axo pax sbꞌeybꞌal ebꞌ vachꞌ spensar jun, te tojol.
9 Yelxo te vachꞌ tzon̈ aj dꞌa junoc yuneꞌ pat co chꞌocoj, dꞌa yichan̈ pax tzon̈ aj dꞌa junoc nivan pat te vachꞌ yedꞌ junoc ix ix ayn̈ejcot yoval.
10 A ebꞌ chuc, an̈ej chucal sna ebꞌ scꞌulej, man̈ jabꞌoc tzꞌocꞌ scꞌool ebꞌ dꞌa ebꞌ yetanimail.
11 Ayic tzꞌacꞌjioch syaelal ebꞌ puch vinac, scꞌaybꞌejcan jelanil ebꞌ mantalaj spensar. A ebꞌ ay spensar, ton̈ej tzꞌalji dꞌa ebꞌ, snachajel jelanil yuj ebꞌ.
12 A Dios tojol toni, scham val yilan ebꞌ chuc, yuj chiꞌ a tzꞌacꞌanoch syaelal ebꞌ, yic satel ebꞌ.
13 Tato max co cha cabꞌi ayic stevioch ebꞌ mebꞌaꞌ dꞌayon̈, axo pax yic tzon̈ tevi dꞌa Jehová yic sco cꞌanan colval dꞌay, max schapaxlaj yabꞌ dꞌayon̈.
14 A silabꞌ tzꞌacꞌji dꞌa cꞌubꞌeltac, stup yoval scꞌool ebꞌ anima yuuj.
15 Ayic sbꞌo junoc lolonel dꞌa tojolal, a ebꞌ vachꞌ spensar ste tzalaj ebꞌ, axo ebꞌ chuc spensar jun, ste xiv ebꞌ yuuj.
16 A ebꞌ tzꞌicꞌancanel sbꞌa dꞌa vachꞌ bꞌeybꞌal, van sbꞌatcan ebꞌ dꞌa scal ebꞌ chamnac.
17 A ebꞌ tzꞌacꞌanoch sbꞌa dꞌa masanil tas snibꞌej, dꞌa uqꞌuel an̈ yedꞌ dꞌa nivac vael, val yel scotcan mebꞌail dꞌa yibꞌan̈ ebꞌ.
18 A ebꞌ anima man̈ vachꞌoc sbꞌeybꞌal yedꞌ ebꞌ esalvum, syabꞌ val syail ebꞌ sqꞌuexuloc ebꞌ tojol spensar.
19 Yelxo te vachꞌ tato tzon̈ cajnaj dꞌa junoc lugar bꞌaj tzꞌinan, dꞌa yichan̈ pax tzon̈ aj yedꞌ junoc ix ix ayn̈ejcot yoval to ya yecvi.
20 A dꞌa spat ebꞌ jelan spensar, ay stumin ebꞌ molbꞌil yuuj, ay pax tas sva ebꞌ, axo pax ebꞌ malaj spensar jun, slajel masanil tas tzꞌilchaj yuj ebꞌ.
21 A ebꞌ sbꞌeybꞌalan tojolal yedꞌ vachꞌilal, ay sqꞌuinal ebꞌ, bꞌinajnac pax ebꞌ, vachꞌn̈ej tzꞌelcꞌoch ebꞌ.
22 A ebꞌ ay spensar, syal yoch ebꞌ yacꞌ oval dꞌa junoc chon̈abꞌ ayoch yilumal sicꞌlabꞌil, syacꞌan telvoc smuroal jun chon̈abꞌ chiꞌ ebꞌ.
23 A ebꞌ man̈ comonoc sloloni, scol sbꞌa ebꞌ dꞌa scal yaelal.
24 A ebꞌ acꞌumtac, tzꞌecꞌxo val ebꞌ dꞌa yibꞌan̈ yicꞌanchaan̈ sbꞌa, tzꞌel specal ebꞌ yuj tas sbꞌo chiꞌ, te bꞌuchumtac pax ebꞌ.
25 A ebꞌ jaragana, ste nibꞌejoch tastac ebꞌ, palta max ilchajlaj yuj ebꞌ yujto malaj sgana ebꞌ smunlaji.
26 Junjun cꞌu snibꞌejn̈ej juntzan̈ tastac ebꞌ, axo pax ebꞌ tojol jun, elbꞌenn̈ej tastac yuj ebꞌ.
27 Max schalaj scꞌool yofrenda ebꞌ chuc Jehová, ocxom val ebꞌ syacꞌ yofrenda yedꞌ schuc pensaril.
28 A ebꞌ syacꞌoch sbꞌa testigoal dꞌa es ol satcanel ebꞌ, palta axo pax ebꞌ scham val smaclan yabꞌ jun, vachꞌn̈ej tzꞌaj spactzitan ebꞌ.
29 A ebꞌ chuc ton̈ej stzꞌac yal ebꞌ to te juncꞌolal yaj ebꞌ, axo pax ebꞌ vachꞌ spensar jun, yel juncꞌolal ton val yaj ebꞌ.
30 Vachꞌchom ay mach te jelan, te aj pensar, ma tzijtum tas yojtac, palta max yal-laj scachanoch vaan tas sgana Jehová.
31 A ebꞌ anima, sbꞌoꞌoch stzꞌuum schej ebꞌ ayic sbꞌat ebꞌ dꞌa oval, palta an̈ej yuj Jehová syacꞌ ganar oval chiꞌ ebꞌ.