20
A ebꞌ tzꞌucꞌan an̈, sbꞌajvaj ebꞌ. Sqꞌue somnaj ebꞌ yacꞌan oval ayic syucꞌan an̈ an̈ chiꞌ ebꞌ. A ebꞌ syacꞌbꞌat sbꞌa dꞌa scal uqꞌuel an̈ chiꞌ, te malaj spensar ebꞌ.2 A ebꞌ rey te ov, lajan ebꞌ icha junoc nocꞌ choj tzꞌel yav yuj yoval, a ebꞌ stecꞌbꞌej sbꞌa stzuntzan ebꞌ, ay smay scham ebꞌ yuj ebꞌ.
3 Te vachꞌ yic ebꞌ max mojan oval. Axo ebꞌ chuc spensar jun, syacꞌoch sbꞌa ebꞌ dꞌa scal oval chiꞌ.
4 A ebꞌ jaragana, max munlajlaj ebꞌ dꞌa stiempoal ayic tzꞌavchaj ixim aval, malaj pax tas sjachꞌ ebꞌ ayic tzꞌelul stiempoal jachꞌoj.
5 A tastac cꞌubꞌabꞌilel dꞌa co pensar, lajan icha junoc a aꞌ ay dꞌa yol junoc olan jul yich, palta axo ebꞌ ay spensar jun, syaln̈ej snachajel yuj ebꞌ tastac ay dꞌa co pensar chiꞌ.
6 Tzijtum ebꞌ tzꞌalani to tzon̈ xajanej ebꞌ, palta chequeln̈ej ebꞌ syal cacꞌanoch yipoc co cꞌool.
7 A ebꞌ tojol spensar, aton ebꞌ malaj jabꞌoc chucal dꞌa sbꞌeybꞌal, te tzalajcꞌolal scan ebꞌ yuninal ebꞌ.
8 Ayic tzꞌem cꞌojan ebꞌ rey dꞌa scꞌojnubꞌ yic schꞌolbꞌitan junoc tas ebꞌ, an̈ej syilanoch jun chucal chiꞌ ebꞌ, elan̈chamel sbꞌoi.
9 Malaj junoc on̈ syal calani to vachꞌ co pensar, mato malaj jabꞌoc co mul.
10 A echlabꞌ man̈ tzꞌacanoc yedꞌ chꞌan̈ cuerda nivac, max schalaj scꞌool Jehová.
11 A yuj sbꞌeybꞌal ebꞌ anima, scheclajeli tato vachꞌ spensar ebꞌ. Yedꞌ pax ebꞌ unin, a dꞌa ebꞌ scheclajeli tato vachꞌ ebꞌ, tato tojol pax ebꞌ.
12 A Jehová ix bꞌoan co chiquin yic scabꞌi yedꞌ yol co sat yic squilaꞌ.
13 Man̈ocn̈ej vayan̈ sco cꞌulejec, ta maay ol cot mebꞌail dꞌa quibꞌan̈, caqꞌuec quip co munlaji yic vachꞌ ol yacꞌ sobre tas sco vaꞌa.
14 “Chuclaj juntzan̈ a chon̈ tic,” xchi ebꞌ smanvaji, axo yic toxo ix manvaj ebꞌ chiꞌ, syalan ebꞌ, “Te jelan on̈, yujto yechel ix el tas ix co man tic,” xchi ebꞌ.
15 Man̈ jantacoc qꞌuen oro yedꞌ qꞌuen qꞌueen vachꞌ yilji dꞌa yolyibꞌan̈qꞌuinal tic, palta a ebꞌ slolon dꞌa jelanil, man̈ comonoc tzꞌilchaj ebꞌ.
16 A ebꞌ tzꞌoch fiadoral dꞌa junoc chꞌoc animail, yicꞌocabꞌel spichul ebꞌ yic syacꞌcan ebꞌ yuj smajananubꞌaloc.
17 A ebꞌ tzꞌicꞌan jabꞌoc vael dꞌa elcꞌal, man̈xo jantacoc svachꞌil svaji syabꞌ ebꞌ, palta axo dꞌa slajvubꞌalxo, icha val to a qꞌuen cꞌaj qꞌueen tzꞌoch dꞌa yol stiꞌ ebꞌ syabꞌi.
18 A junoc tas sco naꞌ, vachꞌ tzꞌajelcꞌochi tato sco cꞌanabꞌajej junoc razón vachꞌ. Syal cacꞌan ganar ebꞌ cajcꞌool dꞌa oval, tato vachꞌ scutej cacꞌan slajtial.
19 A ebꞌ alum pecal, max scꞌubꞌejel-laj juntzan̈ lolonel ebꞌ cꞌubꞌeltac yalji, yuj chiꞌ man̈ junn̈ejoc tzon̈ aj yedꞌ ebꞌ.
20 A ebꞌ sbꞌajan smam snun, slajviel sqꞌuinal ebꞌ icha junoc candil stupi.
21 A bꞌeyumal tzꞌilchaj dꞌa secojtaquil dꞌa sbꞌabꞌelal, a dꞌa slajvubꞌ cuseltacxo tzꞌajelcꞌochi.
22 Malajocabꞌ bꞌaqꞌuin̈ scalaꞌ: Ol co pac co bꞌa, mocabꞌ xco chioc. An̈ej to scacꞌoch Jehová dꞌa co cꞌool, yic Aꞌ ol on̈ colanoc.
23 A juntzan̈ echlabꞌ man̈ tzꞌacanoc, te chuc, chacbꞌilpaxel yuj Jehová.
24 A Jehová tzon̈ icꞌan bꞌeyoc, yuj chiꞌ man̈ cojtacoc tas ol ja dꞌa quichan̈.
25 Tato elan̈chamel scacꞌ co tiꞌ dꞌa Dios, slajvi chiꞌ sco naanxi co bꞌa, te ay smay.
26 A ebꞌ rey ay spensar, spechel ebꞌ chuc ebꞌ dꞌa yichan̈, scan ebꞌ chiꞌ dꞌa yalan̈ yuj ebꞌ.
27 A razón syacꞌ Dios dꞌayon̈, icha saquilqꞌuinal yaji yic squil co bꞌa yedꞌ co pensar.
28 A ebꞌ rey, yelxo te vachꞌ yajoch ebꞌ dꞌa yopisio, tato sbꞌeybꞌalej vachꞌcꞌolal ebꞌ yedꞌ tojolal.
29 A ebꞌ quelemtac ste tzalaj ebꞌ yedꞌ yip, axo ebꞌ ichamtac vinac te nivan yelcꞌoch ebꞌ yujto sacxo xil sjolom ebꞌ.
30 A ebꞌ chuc, sja spensar ebꞌ, ayic smacꞌji ebꞌ dꞌa junoc tzꞌuum, syactanpax ebꞌ scꞌulan chucal, ayic staji schiqꞌuil ebꞌ smacꞌji.