19
A junoc mebꞌaꞌ vachꞌ syutej sbꞌa, yelxo te vachꞌ yic dꞌa yichan̈ pax junoc chuc spensar tzꞌesani.2 Man̈ vachꞌoc tato dꞌa smasanil co cꞌol sco comon bꞌoej junoc tas man̈ cojtacoc. A tas sco cꞌulej dꞌa elan̈chamel ay bꞌaj man̈ vachꞌoc tzꞌajelcꞌochi.
3 A sman̈ pensaril ebꞌ anima scuchbꞌan satoc, axo tzꞌaji, a dꞌa yibꞌan̈ Jehová syacꞌoch ebꞌ.
4 A ebꞌ bꞌeyum, man̈ jantacoc anima tzꞌoch yamigooc ebꞌ yuj sbꞌeyumal chiꞌ, axo pax ebꞌ mebꞌaꞌ jun, tzꞌactajcan ebꞌ yuj ebꞌ yamigo chiꞌ.
5 A ebꞌ syacꞌoch sbꞌa testigoal dꞌa tas man̈ yeloc, yovalil syabꞌ syail ebꞌ. Axo ebꞌ tzꞌacꞌan es, man̈ ol colchajlaj ebꞌ.
6 A ebꞌ bꞌecan scꞌool sian junoc tas, masanil anima sayanecꞌ ebꞌ yuj yoch yamigooc.
7 A ebꞌ mebꞌaꞌ, spaticajel ebꞌ yuj ebꞌ scꞌabꞌyoc, ocxom pax ebꞌ yamigo ebꞌ, ¿tom ato ebꞌ chiꞌ man̈ ol actancan ebꞌ? Toxon̈ej syixtej sbꞌa ebꞌ yavtanxicot ebꞌ yamigo chiꞌ.
8 A ebꞌ sbꞌeybꞌalan tas vachꞌ scꞌaybꞌej, syaꞌilej sbꞌa ebꞌ, masanil tas te vachꞌ tzꞌajelcꞌoch dꞌa ebꞌ.
9 A ebꞌ tzꞌoch testigoal dꞌa tas man̈ yeloc, yovalil syabꞌ syail ebꞌ. Tzꞌacꞌjioch chamel dꞌa yibꞌan̈ ebꞌ ton̈ej tzꞌesan chiꞌ.
10 A ebꞌ chuc spensar, man̈ smojoc to syacꞌ tzalajbꞌoc scꞌool ebꞌ dꞌa vachꞌil, an̈ejtonaꞌ ebꞌ ayoch checabꞌoc, man̈ smojoc yacꞌan yajalil ebꞌ dꞌa yibꞌan̈ ebꞌ nivac vinac.
11 A ebꞌ syamanoch vaan yoval scꞌool, ay spensar ebꞌ, sbꞌinaj ebꞌ dꞌa vachꞌil tato ton̈ej smaqꞌuecꞌ ebꞌ yuj tas tzꞌutaji.
12 A yoval scꞌool ebꞌ vin̈ rey ay smay icha junoc nocꞌ choj tzꞌavaji. Axo pax svachꞌcꞌolal ebꞌ vin̈ jun, syicꞌcot vachꞌilal icha yal acꞌval tzꞌem dꞌa yibꞌan̈ an̈ an̈cꞌultac.
13 A ebꞌ uninabꞌil malaj spensar, syabꞌ syail smam ebꞌ yuuj. A ebꞌ ix ix ov dꞌa ebꞌ yetbꞌeyum, lajan ebꞌ ix icha junoc tzꞌuj sdꞌujdꞌujani.
14 Sco cha co pat yedꞌ co bꞌeyumal yuj tas syacꞌcan co mam. Axo ix quetbꞌeyum ay spensar, a dꞌa Jehová sco cha ix.
15 Yuj co jaraganail scot co vayan̈. Tato max yal-laj co cꞌool tzon̈ munlaji, ol cabꞌ syail yuj vejel.
16 A ebꞌ scꞌanabꞌajan junoc checnabꞌil, ichato van stan̈van sqꞌuinal ebꞌ. Axo pax ebꞌ max yil sbꞌeybꞌal jun, ol miljoccham ebꞌ.
17 A ebꞌ scolvaj dꞌa ebꞌ mebꞌaꞌ, ichato a dꞌa Jehová van yacꞌan ebꞌ majanil, axo Jehová chiꞌ ol acꞌan meltzaj jun majan chiꞌ dꞌa ebꞌ.
18 Co cachec ebꞌ cuninal yacbꞌan yunetacto ebꞌ yic max bꞌatcan ebꞌ dꞌa yol scꞌabꞌ chamel.
19 A ebꞌ scot yoval dꞌa elan̈chamel, schaocabꞌ spac ebꞌ icha dꞌa smojal. Tato sco col ebꞌ dꞌa syaelal chiꞌ, sbꞌeybꞌalejn̈ej yoval ebꞌ chiꞌ.
20 Tato sco cha cabꞌ razón yedꞌ co cachnabꞌil, ol on̈ jelanbꞌoc.
21 Man̈ jantacoc tas sco naꞌa, palta an̈ej tas sna Jehová tzꞌelcꞌochi.
22 A tas sco nibꞌejoch dꞌa ebꞌ quetanimail, to tzꞌelcꞌoch tas syal ebꞌ. Yelxo te vachꞌ tato mebꞌaꞌ on̈ dꞌa yichan̈ to squesej.
23 Tato ay yelcꞌoch Jehová dꞌa co sat, sco cha co qꞌuinal, yuuj paxi tzon̈ aj dꞌa tzalajcꞌolal, malaj tas scabꞌ syail.
24 A ebꞌ jaragana syaqꞌuem scꞌabꞌ ebꞌ dꞌa yol yucꞌabꞌ, palta te ajaltacxopax yicꞌanqꞌueta ebꞌ tas ayem dꞌa yol yucꞌabꞌ chiꞌ, yujto te jaragana ebꞌ.
25 Ayic tzꞌoch yaelal dꞌa yibꞌan̈ ebꞌ puch vinac, sjelanbꞌi spensar ebꞌ mantalaj spensar. Ayic scachji ebꞌ ay spensar, snachajel yuj ebꞌ dꞌa elan̈chamel.
26 A ebꞌ tzꞌelcꞌan junoc tas dꞌa smam, ma ebꞌ spechanel snun dꞌa spat, te qꞌuixvelal syutej sbꞌa ebꞌ.
27 Ex vuninal, tato max e cha eyabꞌ e cachnabꞌil, van eyicꞌancanel e bꞌa dꞌa cꞌaybꞌubꞌal te vachꞌ.
28 A ebꞌ testigo chuc spensar, malaj yelcꞌoch tojolal dꞌa ebꞌ, stzalaj ebꞌ yedꞌ schucal spensar chiꞌ.
29 Vachꞌxo yaj yaelal ol ja dꞌa yibꞌan̈ ebꞌ acꞌumtac. Vachꞌxo pax yaj teꞌ jixcꞌabꞌteꞌ ol jixchajoch dꞌa ebꞌ malaj spensar.