18
A ebꞌ syiqꞌuel sbꞌa dꞌa scal ebꞌ yetanimail, an̈ej tas sgana ebꞌ sayeqꞌui, max schalaj yabꞌ junoc razón vachꞌ ebꞌ.2 A ebꞌ chuc spensar, malaj sgana ebꞌ scꞌaybꞌej junoc tas, an̈ej ebꞌ sgana syal yicoꞌ.
3 Tato tzꞌoch ebꞌ scꞌulan chucal dꞌa co cal, tzon̈ acꞌji qꞌuixvelal yuj ebꞌ. Tato tzꞌoch ebꞌ bꞌuchumtac dꞌa co cal, tzon̈ bꞌuchji yuj ebꞌ.
4 A tas syal ebꞌ anima ay spensar, nivan jelanil syal quicꞌan yuuj. A tas syal ebꞌ chiꞌ, lajan icha junoc a aꞌ jul yich, ma icha sical a aꞌ to sqꞌueul sjaj.
5 Tato ayic ebꞌ tzꞌoch smul syicꞌ ebꞌ vin̈ yajal, axo tas syal ebꞌ malaj smul, max schalaj yabꞌ ebꞌ vin̈, yelxo val man̈ vachꞌoc.
6 A yuj tas syal ebꞌ malaj spensar, sqꞌue vaan oval. A yuj tas syal ebꞌ chiꞌ scotcan dꞌa yibꞌan̈ ebꞌ.
7 A yuj tas syal ebꞌ chuc spensar, tzꞌochcan dꞌa yibꞌan̈ ebꞌ. Yuj tas syal ebꞌ chiꞌ, munil syaalej sbꞌa ebꞌ.
8 A tas syal ebꞌ alum pecal, lajan icha juntzan̈ tas vachꞌ sloji, scꞌoch val schiꞌal dꞌa scꞌol ebꞌ tzꞌabꞌan chiꞌ.
9 A ebꞌ jaragana yedꞌ ebꞌ sjuanel junoc tasi, ichato yucꞌtac sbꞌa ebꞌ.
10 A Jehová lajan icha junoc cuartel te vachꞌ, a dꞌay scꞌoch ebꞌ tojol spensar scol sbꞌa.
11 A snaan ebꞌ bꞌeyum to a sbꞌeyumal ebꞌ lajan icha junoc muro ayoch dꞌa junoc chon̈abꞌ yic scolji yuuj.
12 A icꞌojchan̈bꞌail tzon̈ icꞌjiemta yuuj, axo emnaquilal, tzon̈ icꞌjichaan̈ yuuj.
13 Yelxo te qꞌuixvelal tato tzon̈ comon tacꞌvi ayic manto cabꞌ junoc lolonel sicꞌlabꞌil.
14 Tato tecꞌan spixan junoc penaay, stechaj syaelal chiꞌ yuuj. Axo pax junoc man̈ tecꞌanoc spixan jun, maxtzac techajlaj yuuj.
15 A ebꞌ aj pensar, tzꞌilchaj jelanil yuj ebꞌ, yujto bꞌecan scꞌool ebꞌ scꞌaybꞌani.
16 Yuj tas co siej, yaln̈ej mach anima tzon̈ chaani, vachꞌchom ebꞌ anima nivac yopisio.
17 A ebꞌ bꞌabꞌel syal sbꞌa, ichato scol sbꞌa ebꞌ snaani, palta ayic scꞌoch ebꞌ yajcꞌool ebꞌ chiꞌ jun, scheclajeli tas yaj yoval ebꞌ chiꞌ.
18 A suerte tzꞌalani slajvi junoc oval, yuj chiꞌ spojchaj snan̈al ebꞌ van yacꞌan oval chiꞌ.
19 Tato sco tzuntzejcot yoval junoc co cꞌabꞌ coc, más secojtac co satanel junoc chon̈abꞌ ay smuroal yedꞌ spuertail vachꞌ yajoch yijchul dꞌa yichan̈ yic tzon̈ ochxi vachꞌil yedꞌoc, yujto tecꞌan yaj spensar.
20 A yuj tas scalaꞌ, scot yaelal ma scot tzalajcꞌolal dꞌayon̈.
21 A lolonel syal yicꞌancot co chamel, ma co qꞌuinal, yuj chiꞌ vachꞌ tato sco na tas scalaꞌ, yic vachꞌ tzon̈ elcꞌochi.
22 Ayic tzꞌoch yetbꞌeyum ebꞌ vin̈ vinac, tzꞌilchaj vachꞌilal yuj ebꞌ vin̈, yujto scha svachꞌcꞌolal Jehová ebꞌ vin̈.
23 A ebꞌ mebꞌaꞌ stevi ebꞌ, axo ebꞌ bꞌeyum, te acꞌumtac syutej sbꞌa ebꞌ stacꞌvi.
24 Tato te ay camigo, ay smay tzon̈ ixtaxel yuj ebꞌ. Palta ay pax ebꞌ camigo yelxo te vachꞌ dꞌa yichan̈ ebꞌ co cꞌabꞌ coc.