17
Vachꞌchom ton̈ej tzon̈ chꞌec vaꞌi, palta tato juncꞌolal caji, másxo vachꞌ dꞌa yichan̈ pax to qꞌuin̈ ayon̈ dꞌa junjun cꞌu, tato ovaln̈ej caji.2 A ebꞌ checabꞌ ay spensar, ecꞌbꞌal yopisio ebꞌ yuj spatrón dꞌa yichan̈ junoc yuninal malaj tzꞌochi, ay yalan yic ebꞌ schaan smacbꞌen yedꞌ ebꞌ uninabꞌil chiꞌ.
3 A qꞌuen oro yedꞌ qꞌuen plata tzꞌacꞌchaj proval qꞌuen dꞌa cal cꞌacꞌ tato vachꞌ qꞌueen, axo co pensar a Jehová schꞌolbꞌitani.
4 A ebꞌ chuc sbꞌeybꞌal, scha juntzan̈ chucal lolonel ebꞌ. A ebꞌ esalvum, scha juntzan̈ esal lolonel ebꞌ.
5 Tato tzon̈ bꞌuchvaj dꞌa ebꞌ mebꞌaꞌ, a dꞌa Dios tzon̈ bꞌuchvaji, yujto aton ix bꞌoan ebꞌ. Tato tzon̈ tzalaji ayic sjavi cuscꞌolal dꞌa yibꞌan̈ ebꞌ, max ecꞌbꞌatlaj yacꞌji co yaelal.
6 A snivanil yelcꞌoch ebꞌ ichamtac vinac, aton ebꞌ yixchiquin ebꞌ. A ebꞌ uninabꞌil, ma isilabꞌil, sqꞌuechaan̈ ebꞌ yuj smam snun.
7 A ebꞌ malaj spensar, man̈ smojoc syal lolonel yic jelanil ebꞌ. A ebꞌ yajal, man̈ smojoc a es syal ebꞌ.
8 A ebꞌ sbꞌeybꞌalan yacꞌan tumin dꞌa elcꞌaltac, a snaan ebꞌ to vachꞌ tzꞌelcꞌoch ebꞌ, yujto yaln̈ej bꞌaj tzꞌecꞌ ebꞌ syaln̈ej icha snibꞌej ebꞌ.
9 A ebꞌ stechaj yacꞌan nivancꞌolal bꞌaj tzꞌixtaji, snibꞌej ebꞌ to xajan tzꞌilji ebꞌ yuj anima. Axo pax ebꞌ an̈ejaꞌ yalubꞌtan̈an junoc lolonel jun, tzꞌel ebꞌ svachꞌcꞌool ebꞌ dꞌa stzꞌey.
10 Nivan tas sbꞌo yuj junoc bꞌelan̈ cachnabꞌil dꞌa ebꞌ ay spensar, dꞌa yichan̈ pax to jantac smacꞌji ebꞌ malaj spensar.
11 A junoc pitn̈ej syutej sbꞌa, an̈ej chucal sayaꞌ, schecchajbꞌat junoc checabꞌ malaj yoqꞌuelcꞌolal dꞌay.
12 Tato sco chalaj co bꞌa yedꞌ junoc nocꞌ nun oso elcꞌabꞌilbꞌat yuneꞌ, yelxo val vachꞌ quic dꞌa yichan̈ to sco chalaj co bꞌa yedꞌ junoc anima chuc spensar van scꞌulan chucal.
13 A ebꞌ chuc syutej spactzitan vachꞌil, malaj bꞌaqꞌuin̈ tzꞌel yaelal dꞌa yol spat ebꞌ.
14 Icha yaj a aꞌ molaneqꞌui ayic sjacvielta aꞌ, cꞌojancꞌolal yelta aꞌ masanto snivanbꞌi yelta aꞌ, icha chiꞌ yaj junoc oval quenn̈ej tzꞌaj yel yich, palta nivan tzꞌajelcꞌochi, yuj chiꞌ vachꞌ tato scacꞌ nivancꞌolal a manto el yich oval chiꞌ.
15 Tato a ebꞌ juez tzꞌacꞌan nivancꞌolal dꞌa yibꞌan̈ ebꞌ ay smul, ma syacꞌoch yaelal dꞌa yibꞌan̈ ebꞌ malaj smul, a val chabꞌ chiꞌ max schalaj scꞌol Jehová.
16 ¿Tas yuj sja ebꞌ chuc spensar yedꞌ stumin, yic snibꞌej ebꞌ sman sjelanil? ¿Tas val ol och yuj ebꞌ? Ina toxonton malaj spensar ebꞌ.
17 A ebꞌ vachꞌ yacꞌantaxon quedꞌoc, ayn̈ejoch ebꞌ quedꞌoc. Ayic ay co yaelal, icha val co cꞌabꞌ coc syutej sbꞌa ebꞌ dꞌayon̈.
18 A ebꞌ malaj spensar, yaln̈ej mach bꞌaj tzꞌochcan ebꞌ fiadoral, stacꞌvancanoch ebꞌ dꞌa yibꞌan̈.
19 A ebꞌ scham val stzuntzan ebꞌ yetanimail, schampax val ebꞌ yacꞌan oval. A ebꞌ syicꞌchaan̈ sbꞌa, munil syacꞌ lajvoquel sbꞌa ebꞌ.
20 A ebꞌ te chuc spensar, malaj bꞌaqꞌuin̈ tzꞌilchaj vachꞌilal yuj ebꞌ. A ebꞌ slolon dꞌa chabꞌsatil, scotcan yaelal dꞌa yibꞌan̈ ebꞌ.
21 A ebꞌ smam ebꞌ chuc spensar, malaj tzalajcꞌolal scha ebꞌ yuj ebꞌ yuninal chiꞌ, an̈ej cuscꞌolal schaꞌ ebꞌ.
22 A tzalajcꞌolal lajan icha junoc remeyo, axo pax cuscꞌolal jun, ton̈ej syiqꞌuel quip.
23 A ebꞌ yajal chuc, scha qꞌuen tumin ebꞌ dꞌa elcꞌaltac yic vachꞌ max sbꞌolaj yaj oval ebꞌ dꞌa vachꞌilal.
24 A ebꞌ ay spensar, a jelanil sayecꞌ ebꞌ. Axo ebꞌ malaj spensar jun, ton̈ej tzꞌecꞌ qꞌueleloc ebꞌ.
25 A ebꞌ uninabꞌil malaj spensar, an̈ej yoval smam snun ebꞌ syicꞌcoti, an̈ej scuscꞌolal ebꞌ syacꞌ ebꞌ.
26 Man̈ vachꞌoc tato tzꞌicꞌjiel smultu ebꞌ malaj smul, ocxom val to tzꞌicꞌjiel junoc dꞌa yopisio yujto vachꞌ syutej sbꞌa.
27 A ebꞌ malaj val tas syalaꞌ yedꞌ ebꞌ syamoch vaan sbꞌa, aj pensar ebꞌ.
28 A ebꞌ anima malaj spensar, tato max comon lolon ebꞌ, tzam nachaji to ay spensar ebꞌ.