16
A on̈ anima on̈ tic, sco naꞌ tas sco cꞌulej, palta an̈ej Jehová tzꞌalani tas tzꞌaj yelcꞌochi.2 A on̈ anima on̈ tic, sco naꞌ to a tas sco cꞌulej vachꞌn̈ej, palta a Jehová schꞌolbꞌitan tas nabꞌil cuuj chiꞌ.
3 Tato scacꞌoch masanil tas sco na co cꞌulej abꞌenal dꞌa yol scꞌabꞌ Jehová, vachꞌ tzꞌaj yelcꞌochi.
4 A Jehová ix bꞌoancan masanil tas yic tzꞌelcꞌoch tas nabꞌil yuuj, an̈ejtonaꞌ aꞌ ix naancani to a ebꞌ chuc, yovalil ol scha syaelal ebꞌ.
5 A ebꞌ syicꞌchaan̈ sbꞌa, chacbꞌilel ebꞌ yuj Jehová, yuj chiꞌ man̈ yojtacoclaj ebꞌ janicꞌ ol javoc yaelal dꞌa yibꞌan̈ ebꞌ yuuj.
6 Tato sco xajanej ebꞌ quetanimail, tato sco cꞌanabꞌajej tas scalaꞌ, tzꞌacꞌji nivancꞌolal co mul. Tato ay yelcꞌoch Jehová dꞌayon̈, squiqꞌuel co bꞌa dꞌa scal chucal.
7 Tato stzalaj Jehová yedꞌ co bꞌeybꞌal, tzꞌoch juncꞌolal dꞌa co cal yedꞌ ebꞌ ajcꞌol yajoch dꞌayon̈.
8 Vachꞌchom quenn̈ej tas squicꞌ dꞌa co munlajel dꞌa stojolal, yelxo te vachꞌ dꞌa yichan̈ pax bꞌaj te nivan tas scacꞌ ganar dꞌa spatic chucal.
9 A on̈ anima on̈ tic sco naꞌ tas sco cꞌulej, palta axo Jehová tzon̈ cuchbꞌan dꞌa tas sco cꞌulej chiꞌ.
10 A ebꞌ rey schecabꞌ Dios yaj ebꞌ, yuj chiꞌ man̈ smojoc chuc syutej ebꞌ schꞌolbꞌitan junoc tas.
11 A Jehová scha scꞌool masanil echlabꞌ tzꞌacan, yujto a ix acꞌancan masanil echlabꞌ chiꞌ.
12 A ebꞌ rey, a tas man̈ tojoloc, yovalil schaquel ebꞌ, yujto a yopisio ebꞌ chiꞌ yovalil a tojolal tzꞌicꞌan bꞌeyoc.
13 A ebꞌ yel syalaꞌ xajan ebꞌ yuj ebꞌ rey, stzalaj ebꞌ rey chiꞌ yedꞌ ebꞌ.
14 Tato scot yoval ebꞌ rey ay smay ay chamel, palta a ebꞌ ay spensar jun, say ebꞌ tas tzꞌaj sicbꞌi yoval ebꞌ rey chiꞌ.
15 Tato stzevaj ebꞌ rey, malaj chamel syal chiꞌ, axo svachꞌcꞌolal ebꞌ, lajan icha yasunal bꞌabꞌel n̈abꞌ.
16 Te vachꞌ quicoꞌ tato a jelanil yedꞌ aj pensaril tzꞌilchaj cuuj, dꞌa yichan̈ qꞌuen oro yedꞌ qꞌuen plata.
17 Tato tojol co bꞌeybꞌal, squiqꞌuel co bꞌa dꞌa scal chucal, tato sco yaꞌilej co bꞌeybꞌal, syalelcꞌochi to van co yaꞌilan co bꞌa.
18 Tato acꞌumtac scutej co bꞌa, ma squicꞌchaan̈ co bꞌa, tzon̈ icꞌjiemta, man̈xalaj tzꞌaj quelcꞌochi.
19 Más vachꞌ emnaquil scutej co bꞌa yedꞌ ebꞌ mebꞌaꞌ, dꞌa yichan̈ pax ay tas squicꞌ yedꞌ ebꞌ anima acꞌumtac.
20 A ebꞌ ojtannac yicꞌan bꞌey smunlajel, vachꞌn̈ej tzꞌaj yelcꞌoch ebꞌ. Te tzalajcꞌolal yic ebꞌ tzꞌacꞌanoch Jehová yipoc scꞌool.
21 A ebꞌ jelan spensar, syal anima to te ay spensar ebꞌ. A yuj lolonel vachꞌ syal ebꞌ, syicꞌ sjelanil anima chiꞌ.
22 Tato scham val co naani ayic mantzac co cꞌulej junoc tasi, ayton yiloj qꞌuinalil, palta tato sco cach ebꞌ malaj spensar, nabꞌan̈ej squixtej co bꞌa.
23 A ebꞌ jelan, cham snaan ebꞌ tas syutej ebꞌ sloloni, yuj tas syal ebꞌ chiꞌ, stzalaj ebꞌ anima.
24 A lolonel vachꞌ, lajan icha schiꞌal nocꞌ yal chabꞌ, tzon̈ tzalaj yuuj, syacꞌan co tecꞌanil.
25 Ay bꞌeybꞌal te vachꞌ co naani, palta van on̈ yicꞌanbꞌat dꞌa chamel.
26 Tato ay co vejel, scacꞌ val och dꞌa co cꞌool co munlaj sicꞌlabꞌil.
27 A ebꞌ chuc, ayn̈ejecꞌ chucal dꞌa spensar ebꞌ, a slolonel ebꞌ, lajan val icha sqꞌue n̈iln̈on yoc teꞌ cꞌacꞌ.
28 A ebꞌ chuc spensar, sqꞌuen̈ej vaan oval yuj ebꞌ. A yuj ebꞌ alum pecal, tzꞌoch ajcꞌolal dꞌa scal ebꞌ vachꞌ taxon yacꞌani.
29 A ebꞌ comonn̈ej smacꞌvaji, syacꞌ musansatil ebꞌ yamigo ebꞌ, yujto a ebꞌ, van yicꞌancanbꞌat ebꞌ dꞌa jun bꞌeybꞌal man̈ vachꞌoc.
30 A ebꞌ snaan yacꞌan chucal, smutzꞌmutzꞌan sat ebꞌ, tato toxo ix sna ebꞌ tas ol yutoc scꞌulan chucal chiꞌ, toxon̈ej snubꞌ stiꞌ ebꞌ.
31 A ebꞌ tzꞌichamaxi, aton jun chiꞌ scha ebꞌ spacoc yujto vachꞌ ix yutej sbꞌeybꞌal ebꞌ dꞌa yolyibꞌan̈qꞌuinal tic.
32 Yelxo te vachꞌ tato nivan scutej co cꞌool dꞌa yichan̈ pax to ste tecꞌton quip. Yelxo te vachꞌ tato sco yamoch vaan yoval co cꞌool dꞌa yichan̈ bꞌaj scan junoc chon̈abꞌil anima dꞌa yalan̈ co mandar.
33 Vachꞌchom scacꞌoch suerte dꞌa yibꞌan̈ junoc tas, palta an̈ej Jehová snaani tastac tzꞌajelcꞌoch smasanil.