15
Tato sco pac junoc lolonel dꞌa emnaquilal, stup oval yuuj. Tato ov scutej co pacan jun, ste vachꞌ qꞌue vaan oval chiꞌ.2 Ayic slolon ebꞌ ay spensar, a jelanil syicꞌ ebꞌ anima dꞌa ebꞌ. Axo yic slolon ebꞌ malaj spensar jun, an̈ej man̈ pensaril syal ebꞌ.
3 Ayn̈ejecꞌ Jehová dꞌa masanil bꞌaj, syiln̈ej tas scꞌulej ebꞌ chuc yedꞌ ebꞌ vachꞌ.
4 A lolonel vachꞌ tzꞌalchaj dꞌayon̈, syacꞌ snivanil co cꞌool, ichato tzon̈ yan̈tej. Axo pax chucal lolonel tzꞌalchaj dꞌayon̈ jun, scabꞌ val syail yuuj.
5 A ebꞌ malaj spensar, chuc syabꞌ ebꞌ ayic tzꞌacꞌji scachnabꞌil ebꞌ yuj smam. Axo ebꞌ ay spensar jun, scha scꞌol scachnabꞌil ebꞌ syacꞌ smam.
6 Man̈ jantacoc tas ay dꞌa yol spat ebꞌ anima vachꞌ spensar. Axo ebꞌ chuc jun, max yacꞌlaj sgana ebꞌ yedꞌ tas syacꞌ ganar.
7 Ayic slolon ebꞌ ay spensar, a jelanil syalel ebꞌ. Axo ebꞌ malaj spensar jun, malaj yelcꞌoch tas syal ebꞌ.
8 A silabꞌ ebꞌ chuc, max schalaj scꞌol Jehová, palta scha val yabꞌi ayic slesalvi ebꞌ tojol spensar dꞌay.
9 Max schalaj scꞌool Jehová schuc bꞌeybꞌal ebꞌ chuc, palta te xajan ebꞌ sbꞌeybꞌalan tojolal yuuj.
10 A ebꞌ tzꞌactancan svachꞌ bꞌeybꞌal, smojton val yacꞌji syaelal ebꞌ. Smoj val scham ebꞌ malaj sgana scachji.
11 Syil Jehová chajtil yilji bꞌaj ay ebꞌ chamnac, ¿tocval max yil pax co pensar?
12 A ebꞌ te bꞌuchumtac, malaj sgana ebꞌ ay mach scachani, toxon max scꞌanbꞌej junoc razón ebꞌ dꞌa ebꞌ ay spensar.
13 A ebꞌ stzalaji, stzetzon sat ebꞌ. Axo pax ebꞌ scus jun, tzꞌoch pitzꞌan yaelal dꞌa spixan ebꞌ.
14 A ebꞌ ay spensar, snibꞌej ebꞌ svachꞌ ojtaquejel jelanil. Axo ebꞌ malaj spensar jun, stzalaj ebꞌ yedꞌ sman̈ pensaril chiꞌ.
15 A ebꞌ ilcꞌolal yaji, cuseltacn̈ej tzꞌecꞌ junjun cꞌu dꞌa ebꞌ. Axo pax ebꞌ tzalajcꞌolal yaj jun, qꞌuin̈n̈ej dꞌa ebꞌ junjun cꞌu.
16 Tato ay yelcꞌoch Jehová dꞌayon̈, yelxo te vachꞌ quicoꞌ vachꞌchom mebꞌaꞌ on̈, dꞌa yichan̈ pax to ay co tumin palta ilcꞌolaln̈ej caji.
17 Te vachꞌ tato sco xajanej co bꞌa vachꞌchom an̈ej an̈ itaj sco chiꞌa, dꞌa yichan̈ pax an̈ej nocꞌ chibꞌej sco chiꞌa tato ovaln̈ej caji.
18 A ebꞌ cꞌun scot yoval, an̈ej oval sqꞌue vaan yuj ebꞌ. Axo pax ebꞌ ay snivancꞌolal jun, syacꞌ tup oval ebꞌ.
19 A dꞌa ebꞌ jaragana, icha val to a te qꞌuiix ayem dꞌa yol sbꞌe ebꞌ. Axo pax ebꞌ anima vachꞌ spensar jun, vachꞌn̈ej sbꞌe ebꞌ.
20 A ebꞌ uninabꞌil ay spensar, syacꞌ tzalajbꞌoc scꞌool smam snun ebꞌ. Axo ebꞌ malaj spensar jun, syacꞌ qꞌuixvelal smam snun ebꞌ chiꞌ.
21 A ebꞌ malaj spensar, stzalaj ebꞌ yedꞌ sman̈ pensaril chiꞌ. Axo ebꞌ ay spensar jun, scham val yilan ebꞌ tas sbꞌeybꞌalej.
22 Tato max co cꞌanbꞌej razón, masanil tas sco naꞌ max elcꞌochlaj. Tato sco cha cabꞌ razón vachꞌ jun, vachꞌn̈ej tzꞌaj yelcꞌochi.
23 Te vachꞌ tato vachꞌ scutej co pacan lolonel. Tato scacꞌ junoc razón ayic ay ilcꞌolal, yelxo val te vachꞌ.
24 A ebꞌ ay spensar, sbꞌey ebꞌ dꞌa sbꞌeal qꞌuinal yic vachꞌ max bꞌatcan ebꞌ dꞌa sbꞌeal chamel.
25 A Jehová satanel tas ay dꞌa ebꞌ acꞌumtac, palta a stan̈van sluum ebꞌ ix ix chamnacxo yetbꞌeyum.
26 Max schalaj scꞌol Jehová tastac nabꞌil yuj ebꞌ chuc, palta a lolonel vachꞌ scha scꞌool.
27 A ebꞌ man̈ jantacoc tas snibꞌej, man̈ jantacoc tas syicꞌcot ebꞌ dꞌa yibꞌan̈ ebꞌ cajan yedꞌ dꞌa yol spat. Axo ebꞌ max chaan qꞌuen tumin yic smontaji, snajatbꞌi sqꞌuinal ebꞌ.
28 A ebꞌ tojol spensar, scham val snaan ebꞌ tas syutej spacan junoc lolonel. Axo pax ebꞌ chuc spensar jun, ton̈ej scomon alej chucal lolonel ebꞌ.
29 A Jehová sbꞌat mican dꞌa ebꞌ chuc sbꞌeybꞌal, palta smaclej yabꞌ slesal ebꞌ tojol spensar.
30 A ebꞌ stzetzon sat, stzalaj co cꞌol yuj ebꞌ. A junoc vachꞌ abꞌix syacꞌ co tecꞌanil.
31 Tato sco scha cabꞌ co cachnabꞌil, vachꞌ tzon̈ aj dꞌa scal ebꞌ jelan spensar.
32 Tato malaj co gana tzon̈ cachji, munil a dꞌayon̈ syacꞌ chucal. Tato scha co cꞌol co cachji jun, van quicꞌan co jelanil.
33 Tato sco cꞌanabꞌajej schecnabꞌil Jehová, squicꞌ co jelanil. Tato co gana nivan tzꞌaj quelcꞌochi, yovalil emnaquil scutej co bꞌa.