14
A ebꞌ ix ix ay spensar, vachꞌn̈ej yaj yol spat ebꞌ ix. Axo pax ebꞌ ix malaj spensar jun, juvinaquel yol spat ebꞌ ix yuuj.2 Tato vachꞌ co bꞌeybꞌal, te ay yelcꞌoch Jehová dꞌayon̈. Axo pax ebꞌ chuc sbꞌeybꞌal jun, malaj yelcꞌoch Jehová dꞌa ebꞌ.
3 A tas syal ebꞌ malaj spensar, a tzꞌicꞌancot yaelal dꞌa yibꞌan̈ ebꞌ. Axo pax tas syal ebꞌ ay spensar jun, a scolan ebꞌ.
4 Tato malaj nocꞌ vacax smunlaj dꞌa dꞌocoj luum, malaj ixim trigo sco moloꞌ. Yuj smunlajel nocꞌ vacax chiꞌ, nivan ixim trigo chiꞌ squicꞌaꞌ.
5 A ebꞌ testigo vachꞌ, an̈ej yel syal ebꞌ. Axo pax ebꞌ testigo chuc jun, secojtac tzꞌaj yesan ebꞌ.
6 A ebꞌ bꞌuchumtac, sayecꞌ jelanil ebꞌ, palta max ilchajlaj yuj ebꞌ. Axo pax ebꞌ jelan spensar jun, secojtac tzꞌaj yilchaj jelanil yuj ebꞌ.
7 Quiqꞌuequel co bꞌa dꞌa stzꞌey ebꞌ malaj spensar, yujto malaj tas ol quiqꞌuelta dꞌa slolonel ebꞌ syalaꞌ.
8 A ebꞌ ay spensar, sna val ebꞌ sicꞌlabꞌil tas scꞌulej. Axo pax ebꞌ malaj spensar jun, syacꞌ musansatil sbꞌa ebꞌ.
9 A ebꞌ malaj spensar, malaj tas sna ebꞌ yuj chucal scꞌulej. Axo pax ebꞌ anima vachꞌ spensar jun, snibꞌej ebꞌ to tzꞌacꞌji nivancꞌolal yuj Dios.
10 A on̈n̈ej cojtac tas yuj tzon̈ cusi, ma tas yuj tzon̈ tzalaji. A ebꞌ chꞌoc animail, malaj yalan yic ebꞌ dꞌa tas sco na chiꞌ.
11 A yin̈tilal ebꞌ chuc spensar, ol sateloc, palta a yin̈tilal ebꞌ vachꞌ spensar jun, ol qꞌuibꞌn̈ej.
12 Ay val bꞌeybꞌal te vachꞌ co naani, palta van on̈ yicꞌanbꞌat dꞌa chamel.
13 Ay bꞌaj tzon̈ tzevaji, palta cusnac co cꞌool. Ay bꞌaj tzon̈ te tzalaji, palta cuscꞌolalxo slajvielcꞌochi.
14 A ebꞌ tzꞌactancan vachꞌ bꞌeybꞌal, stzalaj ebꞌ yuj schuc bꞌeybꞌal. Axo pax ebꞌ anima vachꞌ spensar jun, stzalaj ebꞌ yuj svachꞌ bꞌeybꞌal.
15 A ebꞌ malaj spensar, masanil tas tzꞌalchaji syacꞌoch ebꞌ dꞌa scꞌool. Axo pax ebꞌ ay spensar jun, scham val yilan ebꞌ tas scꞌulej.
16 A ebꞌ ay spensar, ay xivcꞌolal ebꞌ, yuj chiꞌ syiqꞌuel sbꞌa ebꞌ dꞌa chucal. Axo pax ebꞌ malaj spensar jun, comonn̈ej syacꞌoch sbꞌa ebꞌ dꞌa yaln̈ej tas.
17 A ebꞌ cꞌun scot yoval, malaj spensar ebꞌ, comonn̈ej syutej sbꞌa ebꞌ. A ebꞌ snaan chucal yic vachꞌ tzꞌecꞌ yuuj, chacbꞌilel ebꞌ
18 A spac scha ebꞌ malaj spensar, aton man̈ pensaril. Axo spac scha ebꞌ ay spensar jun, to svachꞌ jacvi spensar ebꞌ.
19 A ebꞌ chuc, syaqꞌuem sbꞌa ebꞌ dꞌa ebꞌ vachꞌ, stevioch ebꞌ dꞌa spuertail spat ebꞌ vachꞌ chiꞌ.
20 A ebꞌ mebꞌaꞌ, paticabꞌilel ebꞌ yuj ebꞌ yetanimail. Axo pax ebꞌ bꞌeyum jun, man̈ jantacoc yamigo ebꞌ.
21 Tzꞌoch co mul tato sco patiquejel ebꞌ quetanimail, palta te vachꞌ quicoꞌ tato tzꞌocꞌ co cꞌool dꞌa ebꞌ mebꞌaꞌ.
22 A ebꞌ an̈ej chucal sgana scꞌulej, sjuviel ebꞌ yuj tas sna chiꞌ. Axo pax ebꞌ sgana scꞌulan vachꞌil jun, xajan ebꞌ yuj Dios.
23 A junoc munlajel scacꞌ quip co bꞌoani, ay tas syacꞌ dꞌayon̈, tato an̈ej lolonel scacꞌ jun, scot mebꞌail dꞌa quibꞌan̈.
24 A snivanil yelcꞌoch ebꞌ ay spensar, aton sjelanil ebꞌ. Axo pax yic ebꞌ malaj spensar jun, aton sman̈ pensaril ebꞌ.
25 A ebꞌ testigo yel syalaꞌ, scol ebꞌ yetanimail ebꞌ dꞌa chamel. Palta a ebꞌ testigo esalvum jun, syacꞌ musansatil ebꞌ yajal ebꞌ.
26 A co xivcꞌolal dꞌa Jehová, tzon̈ scol yedꞌ ebꞌ cuninal, yujto yip co cꞌool yaji.
27 Tato ay yelcꞌoch Jehová dꞌa co sat, ay co qꞌuinal, a tzon̈ colanel dꞌa yol scꞌabꞌ chamel.
28 Tato ay ebꞌ rey ayoch reyal dꞌa jantac anima, sbꞌinaj val ebꞌ. Tato jayvan̈n̈ej anima bꞌaj ayoch ebꞌ reyal jun, slajviel ebꞌ.
29 Tato ay co nivancꞌolal, syalelcꞌochi to ay co pensar, tato cꞌun scot coval jun, syalelcꞌochi to malaj co pensar.
30 Tato juncꞌolaln̈ej yaj co pensar, vachꞌn̈ej yaj co nivanil. Tato ay co chichoncꞌolal jun, tzꞌoch co yabꞌil.
31 Tato squixtej ebꞌ mebꞌaꞌ, van co paticanel Dios ix on̈ bꞌoani. Tato ay yelcꞌoch Dios dꞌayon̈ jun, tzꞌocꞌ co cꞌool dꞌa ebꞌ.
32 A ebꞌ chuc, an̈ejaꞌ schucal ebꞌ chiꞌ tzꞌicꞌancot dꞌa yibꞌan̈. Axo ebꞌ vachꞌ spensar jun, ayn̈ejoch Dios yipoc scꞌol ebꞌ masanto scham ebꞌ.
33 A ebꞌ jelan, an̈ej jelanil molanecꞌ dꞌa spensar ebꞌ. Axo pax ebꞌ malaj spensar jun, max cꞌochlaj ijan snaan ebꞌ.
34 Tato a tojolal sbꞌeybꞌalej junoc chon̈abꞌ, sqꞌue val chaan̈, tato a chucal sbꞌeybꞌalej jun, tzꞌacꞌji qꞌuixvelal.
35 A ebꞌ checabꞌ ay spensar, stzalaj vin̈ rey yedꞌ ebꞌ. Axo pax ebꞌ checabꞌ malaj spensar jun, scot yoval scꞌol vin̈ rey dꞌa yibꞌan̈ ebꞌ.