13
A ebꞌ uninabꞌil ay spensar, scha scꞌol ebꞌ scachji yuj smam. Axo ebꞌ malaj spensar jun, max schalaj scꞌol ebꞌ scachji.2 Tato vachꞌ scutej co loloni, vachꞌ pax tas sco cha spacoc. Tato squixtej ebꞌ quetanimail jun, sco cha co yaelal dꞌa smojal.
3 Tato cham sco naꞌ tas scalaꞌ, syalelcꞌochi to van co colan co qꞌuinal. Tato tzon̈ comon lolon jun, a co yaelal squicꞌcot dꞌa quibꞌan̈.
4 A ebꞌ malaj sgana smunlaji, ay tas snibꞌej ebꞌ, palta max ilchajlaj yuj ebꞌ. Axo pax ebꞌ smunlaj jun, masanil tastac ay dꞌa ebꞌ.
5 A ebꞌ tojol spensar, schaquel esal lolonel ebꞌ. Axo ebꞌ chuc spensar jun, an̈ej chucal tzꞌalchaj dꞌa spatic ebꞌ.
6 A tojol pensaril, a scolan ebꞌ sbꞌeybꞌalan tojolal chiꞌ. A chucal, a satanel ebꞌ sbꞌeybꞌalan chucal chiꞌ.
7 Ay ebꞌ malaj jabꞌoc tas dꞌay, palta icha ebꞌ bꞌeyum syutej sbꞌa ebꞌ. Ay pax ebꞌ jun, masanil tastac ay dꞌa ebꞌ, palta icha mebꞌaꞌ syutej sbꞌa ebꞌ.
8 A ebꞌ bꞌeyum, smanxielta sbꞌa ebꞌ dꞌa yol scꞌabꞌ ebꞌ elcꞌum yedꞌ stumin. Axo pax ebꞌ mebꞌaꞌ jun, malaj bꞌaqꞌuin̈ tzꞌelcꞌajbꞌat ebꞌ.
9 A ebꞌ tojol spensar, lajan ebꞌ icha junoc tas copanel scꞌacꞌal. Axo pax ebꞌ chuc spensar jun, lajan ebꞌ icha junoc candil tupnac.
10 A ebꞌ acꞌumtac, an̈ej oval sqꞌue vaan yuj ebꞌ. Axo ebꞌ emnaquil syutej sbꞌa jun, scha yabꞌ razón ebꞌ.
11 A qꞌuen tumin junn̈ej rato tzꞌacꞌji ganar dꞌa chucal, junn̈ej pax rato slajviel qꞌueen. Axo pax qꞌuen tumin jabꞌjabꞌil smolchaj jun, snivanbꞌi qꞌueen.
12 A ebꞌ max elcꞌoch tas snibꞌej, te cuscꞌolal tzꞌajcan ebꞌ. Axo pax ebꞌ tzꞌelcꞌoch tas snibꞌej jun, ste tzalaj ebꞌ.
13 A ebꞌ max cꞌanabꞌajan checnabꞌil, sjavi yaelal dꞌa yibꞌan̈ ebꞌ. Axo pax ebꞌ scꞌanabꞌajan checnabꞌil jun, te vachꞌ spac scha ebꞌ.
14 A cꞌaybꞌubꞌal syacꞌ ebꞌ ay spensar, syacꞌ co qꞌuinal, aꞌ tzon̈ colanelta dꞌa yol scꞌabꞌ chamel.
15 A ebꞌ tzꞌacꞌan razón vachꞌ, nibꞌabꞌil ebꞌ. Axo pax ebꞌ a chucal syal jun, sbꞌatcan ebꞌ dꞌa syaelal.
16 A ebꞌ ay spensar, scham val snaan ebꞌ tas scꞌulej. Axo pax ebꞌ malaj spensar jun, a tas scꞌulej ebꞌ schꞌoxaneli to malaj spensar ebꞌ.
17 A ebꞌ checabꞌ chuc syutej tas checji scꞌulej, an̈ej oval sqꞌue vaan yuj ebꞌ. Axo ebꞌ checabꞌ vachꞌ syutej tas checji scꞌulej jun, syicꞌcot juncꞌolal ebꞌ.
18 Tato chuc scabꞌi tzꞌacꞌji razón dꞌayon̈, an̈ej mebꞌail yedꞌ qꞌuixvelal sjavi dꞌa quibꞌan̈. Tato sco cha cabꞌ co cachnabꞌil jun, tzon̈ icꞌjichaan̈.
19 Ayic tzꞌilchajcꞌoch cuuj tas sco nibꞌej, tzon̈ te tzalaji, palta a ebꞌ malaj spensar, malaj sgana ebꞌ yactancan chucal.
20 Tato junn̈ej tzon̈ ecꞌ yedꞌ ebꞌ ay spensar, squicꞌ co jelanil dꞌa ebꞌ. Tato junn̈ej tzon̈ ecꞌ yedꞌ ebꞌ malaj spensar jun, tzon̈ satcanel yedꞌ ebꞌ.
21 A ebꞌ chuc tzacꞌann̈ejoch yaelal yuj ebꞌ. Axo pax ebꞌ tojol spensar jun, a vachꞌil scha ebꞌ spacoc.
22 A ebꞌ vachꞌ spensar, syacꞌcan smacbꞌen ebꞌ yixchiquin ebꞌ. Axo sbꞌeyumal ebꞌ chuc jun, a dꞌa ebꞌ vachꞌ spensar scani.
23 A dꞌa sluum ebꞌ mebꞌaꞌ, man̈ jantacoc tas vachꞌ syal yel dꞌa sat, palta yuj sman̈ pensaril ebꞌ, malaj tas syicꞌ ebꞌ dꞌa sluum chiꞌ.
24 Tato max cacꞌ tzalaj ebꞌ cuninal, man̈ xajanoc ebꞌ cuuj syal chiꞌ. Tato sco xajanej ebꞌ jun, yunetacto ebꞌ sco yamanoch cacꞌan tzalaj ebꞌ.
25 A ebꞌ tojol spensar, sva ebꞌ masanto sbꞌudꞌji ebꞌ. Axo pax ebꞌ chuc spensar jun, tzꞌochn̈ej svejel ebꞌ.