12
Tato ay yelcꞌoch dꞌayon̈ ayic tzon̈ cachji, vanton co xajanan jelanil syal chiꞌ. Tato schichon co cꞌool ayic tzon̈ cachji jun, malaj co pensar.2 A ebꞌ anima vachꞌ spensar, schꞌox svachꞌcꞌolal Jehová dꞌa ebꞌ, axo ebꞌ chuc spensar jun, tzꞌacꞌji syaelal ebꞌ dꞌa smojal yuuj.
3 A chucal malaj jabꞌoc tas syacꞌ yipoc co cꞌool. Axo pax vachꞌ pensaril jun, syacꞌ val co tecꞌanil.
4 A junoc ix ix te vachꞌ spensar, cꞌacꞌ scꞌool vin̈ yetbꞌeyum ix yuuj. Axo pax junoc ix ix te chuc spensar jun, tzꞌixtaxel vin̈ yetbꞌeyum ix yuuj.
5 A ebꞌ anima tojol spensar, an̈ej tojolal nabꞌil yuj ebꞌ. Axo pax ebꞌ chuc spensar jun, an̈ej acꞌoj musansatil anima naan yuj ebꞌ.
6 A yuj slolonel ebꞌ chuc, scham anima. Axo pax yuj slolonel ebꞌ vachꞌ spensar jun, scolchaj ebꞌ anima dꞌa chamel.
7 Ayic sjavi syaelal ebꞌ chuc, satel ebꞌ. Axo pax ebꞌ vachꞌ spensar, nivan tiempo syil ebꞌ yedꞌ ebꞌ yuninal.
8 A ebꞌ anima jelan spensar, vachꞌ lolonel tzꞌalchaj dꞌa ebꞌ. Axo pax ebꞌ ayoch chucal dꞌa spensar jun, paticabꞌil el ebꞌ.
9 A ebꞌ malaj yelcꞌochi, palta ay ebꞌ tzꞌacꞌan servil ebꞌ, te vachꞌ yic ebꞌ dꞌa yichan̈ pax ebꞌ nivac vinac syutej sbꞌa, palta malaj tas vachꞌ svaan ebꞌ.
10 A ebꞌ tojol spensar, syaꞌilej nocꞌ smolbꞌetzal nocꞌ ebꞌ. Axo pax ebꞌ chuc spensar jun, syixtej nocꞌ smolbꞌetzal nocꞌ ebꞌ.
11 A ebꞌ smunlaj dꞌa sat luum tic, jantac tas vachꞌ svaan ebꞌ. Axo ebꞌ malaj spensar jun, ton̈ej sbꞌalecꞌ tiempo ebꞌ.
12 A ebꞌ chuc sbꞌeybꞌal, snibꞌejoch sbꞌa ebꞌ bꞌeyumal yuj chucal scꞌulej. Axo pax ebꞌ vachꞌ spensar jun, a dꞌa smunlajel ebꞌ syiqꞌuelta tas tzꞌoch yuuj.
13 A ebꞌ chuc, syaalej sbꞌa ebꞌ yuj es syalaꞌ. Axo pax ebꞌ tojol spensar jun, vachꞌn̈ej tzꞌaj yel ebꞌ dꞌa tas sja dꞌa yibꞌan̈.
14 Junjun mach scha spac yuj tastac syalaꞌ, schaan pax spac yuj tastac scꞌulej.
15 A ebꞌ malaj spensar, vachꞌn̈ej tas scꞌulej ebꞌ snaani. Axo pax ebꞌ ay spensar jun, scha yabꞌ razón ebꞌ.
16 A ebꞌ malaj spensar, elan̈chamel schꞌoxel yoval scꞌol ebꞌ. Axo pax ebꞌ ay spensar jun, ton̈ej smaqꞌuecꞌ ebꞌ tas tzꞌutaji.
17 A ebꞌ testigo vachꞌ, an̈ej yel syal ebꞌ. Axo pax ebꞌ testigo chuc jun, an̈ej es syal ebꞌ.
18 A ebꞌ comonn̈ej sloloni, syacꞌ echnaj spixan ebꞌ yetanimail ebꞌ icha yedꞌ junoc qꞌuen cuchilubꞌ. Axo pax ebꞌ jelan spensar jun, snivanej scꞌol ebꞌ anima ebꞌ yedꞌ tas syalaꞌ.
19 A ebꞌ an̈ej yel syalaꞌ, nivan tiempo syil ebꞌ. Axo ebꞌ tzꞌesan jun, elan̈chamel satel ebꞌ.
20 A ebꞌ chuc, an̈ej acꞌoj musansatil naan yuj ebꞌ. Axo ebꞌ sayanecꞌ juncꞌolal, a tzalajcꞌolal tzꞌilchaj yuj ebꞌ.
21 A ebꞌ vachꞌ spensar, malaj chucal sja dꞌa yibꞌan̈ ebꞌ. A ebꞌ chuc jun, sja bꞌulnaj juntzan̈ yaelal dꞌa yibꞌan̈ ebꞌ.
22 A Jehová schacanel ebꞌ esalvum. Axo pax ebꞌ an̈ej yel syal jun, xajan ebꞌ yuuj.
23 A ebꞌ jelan spensar, max yicꞌchaan̈ sbꞌa ebꞌ yuj tas yojtac. Axo ebꞌ malaj spensar jun, schꞌoxel sman̈ pensaril ebꞌ.
24 A ebꞌ smunlaji, syacꞌ mandar ebꞌ. Axo pax ebꞌ malaj sgana smunlaj jun, checabꞌ tzꞌaj ebꞌ.
25 A ilcꞌolal syacꞌ cus co cꞌool. Axo pax junoc vachꞌ lolonel jun, syacꞌ co tzalajcꞌolal.
26 A ebꞌ tojol spensar, cuchbꞌum tzꞌaj ebꞌ dꞌa ebꞌ yetanimail dꞌa vachꞌil. Axo pax ebꞌ chuc spensar jun, scuchbꞌejbꞌat ebꞌ yetanimail ebꞌ dꞌa chucal.
27 A ebꞌ jaragana pechum nocꞌ, max sbꞌolaj nocꞌ syamchaj yuj ebꞌ. Axo pax ebꞌ jelan spensar jun, jantac bꞌeyumal tzꞌilchaj yuj ebꞌ.
28 Tato sco bꞌeybꞌalej tojol pensaril, syacꞌ co qꞌuinal. A dꞌa jun bꞌeybꞌal chiꞌ malaj chamel.