11
A echlabꞌ man̈ tzꞌacanoc, max schalaj scꞌol Jehová. Axo echlabꞌ tzꞌacan jun, stzalaj scꞌool yedꞌoc.2 A ebꞌ acꞌumtac, syacꞌ qꞌuixvelal sbꞌa ebꞌ. Axo ebꞌ emnaquil syutej sbꞌa, jelan tzꞌaj ebꞌ.
3 A ebꞌ tojol spensar, a stojolal ebꞌ chiꞌ scuchbꞌani. Axo pax ebꞌ chuc jun, satel ebꞌ yuj schabꞌsatil.
4 Ayic ol javoc scꞌual co chꞌolbꞌitaji, man̈xalaj yopisio co bꞌeyumal, axon̈ej co tojolal ol on̈ colanel dꞌa chamel.
5 Tato tojol scutej co bꞌa, a tojolal chiꞌ tzon̈ icꞌan bꞌey dꞌa vachꞌilal. Axo ebꞌ chuc jun, an̈ejaꞌ schucal ebꞌ chiꞌ tzꞌicꞌan sateli.
6 Tato tojol scutej co bꞌa, a tojolal chiꞌ tzon̈ colan dꞌa yol scꞌabꞌ chucal. A ebꞌ chuc sbꞌeybꞌal, a chucal snibꞌej ebꞌ, a tzꞌicꞌancot dꞌa yibꞌan̈ ebꞌ.
7 Ayic scham ebꞌ chuc, scham ebꞌ yedꞌ tas ayoch yipoc scꞌool. Maxtzac elcꞌochlaj tas nabꞌil yuj ebꞌ.
8 A Jehová scolan ebꞌ tojol spensar dꞌa scal yaelal, axo ebꞌ chuc tzꞌochcan dꞌa syaelal sqꞌuexuloc ebꞌ tojol spensar chiꞌ.
9 A yaloj pecal ebꞌ chuc, satel ebꞌ yetanimail ebꞌ yuuj. Palta a sjelanil ebꞌ vachꞌ spensar, aꞌ scolan ebꞌ anima chiꞌ.
10 Ayic sqꞌuechaan̈ ebꞌ vachꞌ spensar, ste tzalaj ebꞌ anima yuj ebꞌ. Axo yic scham ebꞌ chuc jun, tzꞌoch qꞌuin̈ yuj masanil ebꞌ anima.
11 A ebꞌ vachꞌ sbꞌeybꞌal, sqꞌue vaan schon̈abꞌ ebꞌ yuj sbꞌeybꞌal chiꞌ. Palta axo pax schon̈abꞌ ebꞌ chuc, satel yuj schucal sbꞌeybꞌal ebꞌ.
12 A ebꞌ malaj spensar, chuclaj tas syal ebꞌ dꞌa spatic ebꞌ yetanimail. Axo ebꞌ ay spensar jun, cham naabꞌil slolonel ebꞌ syalaꞌ.
13 A ebꞌ alum pecal, syalelta ebꞌ masanil tas tzꞌalchaj dꞌay dꞌa cꞌubꞌeltaquil. Axo ebꞌ vachꞌ spensar jun, a tas syabꞌ ebꞌ, ton̈ej sicꞌcan ebꞌ dꞌa spensar.
14 Tato malaj mach scuchbꞌan junoc chon̈abꞌ dꞌa vachꞌil, man̈ tecꞌanoc jun chon̈abꞌ chiꞌ. Palta tato tzijtum ebꞌ tzꞌacꞌvi razón, vachꞌ tzꞌelcꞌoch jun chon̈abꞌ chiꞌ.
15 Tato scacꞌoch co bꞌa fiadoral dꞌa junoc anima man̈ cojtacoc, chuc tzon̈ ajelcꞌochi, tato max co tacꞌ jun, malaj jabꞌoc tas sco naꞌa.
16 A ebꞌ ix ix vachꞌ spensar, tzꞌicꞌjichaan̈ ebꞌ ix. Axo ebꞌ vin̈ vinac pecꞌ tumin, an̈ej qꞌuen tumin chiꞌ tzꞌilchaj yuj ebꞌ vin̈.
17 Tato tzꞌocꞌ co cꞌool dꞌa ebꞌ quetanimail, a dꞌayon̈ syacꞌ vachꞌil. Tato scacꞌ chucal dꞌa ebꞌ quetanimail chiꞌ jun, an̈ejaꞌ on̈ squicꞌcot chucal dꞌa quibꞌan̈.
18 A ebꞌ chuc sbꞌeybꞌal, a tas vachꞌ scha ebꞌ spacoc yalani. Axo ebꞌ tojol spensar jun, val yel te vachꞌ tas scha ebꞌ spacoc sbꞌeybꞌal chiꞌ.
19 Tato sco bꞌeybꞌalej tojolal, vachꞌ ol ecꞌ yibꞌan̈qꞌuinal cuuj. Tato a chucal sco cꞌulej jun, ol on̈ cham yuuj.
20 A Jehová schacanel ebꞌ an̈ej chucal ayecꞌ dꞌa spensar scꞌulani, axo ebꞌ te vachꞌ sbꞌeybꞌal, stzalaj yedꞌ ebꞌ.
21 Ayic schꞌolbꞌitaj ebꞌ anima, max ecꞌbꞌatlaj yacꞌjioch yaelal dꞌa yibꞌan̈ ebꞌ chuc, axo ebꞌ tojol sbꞌeybꞌal, malaj tas tzꞌacꞌjioch dꞌa yibꞌan̈ ebꞌ.
22 A junoc ix ix te vachꞌ yilji, palta malaj spensar ix, lajan ix icha junoc qꞌuen qꞌueen xocanxocan nabꞌa oro ayoch dꞌa sn̈iꞌ nocꞌ chitam.
23 A tas snibꞌej ebꞌ tojol spensar, an̈ej vachꞌilal yedꞌnac. Axo tas snibꞌej ebꞌ chuc jun, an̈ej yaelal yedꞌnac.
24 A ebꞌ elbꞌen yuuj, siejbꞌat ebꞌ tastac ay dꞌay, tzꞌoch ebꞌ bꞌeyumal. Ay pax ebꞌ te ya yel yuuj, ste cotcan mebꞌail dꞌa yibꞌan̈ ebꞌ.
25 A val ebꞌ tzꞌel dꞌa scꞌool yacꞌani, yelxo val ste aj tastac dꞌa ebꞌ. A ebꞌ scolvaji, scolji pax ebꞌ.
26 A ebꞌ max chon̈anlaj ixim strigo, ton̈ej smolbꞌejcan ixim ebꞌ, te chuc syal anima dꞌa spatic ebꞌ. Axo ebꞌ yechel schon̈an ixim jun, a vachꞌil tzꞌaljican dꞌa yibꞌan̈ ebꞌ.
27 A ebꞌ ayecꞌ dꞌa spensar scꞌulan vachꞌil, a svachꞌcꞌolal ebꞌ anima tzꞌilchaj yuj ebꞌ. A pax ebꞌ scꞌulan chucal jun, a chucal chiꞌ sjavi dꞌa yibꞌan̈ ebꞌ.
28 Tato a co bꞌeyumal scacꞌoch yipoc co cꞌool, ol on̈ lajvoqueloc icha scꞌajbꞌanel teꞌ xiltac teꞌ. Tato tojol co pensar jun, vachꞌ ol on̈ elcꞌoch icha syaxbꞌi scꞌabꞌ te teꞌ.
29 A ebꞌ chuc syutej sbꞌa dꞌa smam snun, ma dꞌa ebꞌ yucꞌtac yedꞌ dꞌa ebꞌ yanabꞌ, malaj jabꞌoc tas ol acꞌjoccan dꞌa ebꞌ. A ebꞌ malaj spensar, checabꞌ tzꞌajn̈ejcan ebꞌ dꞌa ebꞌ ay spensar.
30 A spac scha ebꞌ vachꞌ spensar to snajatbꞌi sqꞌuinal ebꞌ. A ebꞌ jelan, vachꞌ smontan ebꞌ anima ebꞌ.
31 A ebꞌ tojol spensar scha spac ebꞌ dꞌa yolyibꞌan̈qꞌuinal tic. An̈ejtonaꞌ ebꞌ scꞌulan chucal yedꞌ ebꞌ ajmul, man̈ ol ecꞌbꞌatlaj schaan syaelal ebꞌ yuj chucal scꞌulej chiꞌ.